Texts

guruḥ ācāryaḥ pañcārthajñānopadeṣṭā // (1) Par.?

tasya bhaktiḥ śraddhā sarvaduḥkhābhibhūtasya mamāyam eva trātety eṣā bhāvanā kāryā // (2) Par.?

tathā coktam / (3.1) Par.?

gurur devo guruḥ svāmī ityādi na ca kāraṇapravacanayor bhaktivirodhas tadanumatyaiva tayor bhaktisambhavāt // (3.2) Par.?

yatas tu tayor bhaktiḥ kartavyeti nānumanyate sa gurur eva na bhavati ananugrahakāritvāt // (4) Par.?

sā ca gurubhaktis tad anabhipretam pariharatotthānādikaṃ kurvatā ca satataṃ sevanīyā // (5) Par.?

jñātvā tadabhiprāyam aśāstroktam api taddhitaṃ kartavyam // (6) Par.?

tathā coktam / (7.1) Par.?

granthārthaviduṣaḥ ityādi // (7.2) Par.?

yad eva hi guror abhipretaṃ tad eva vihitaṃ śāstrānuktam api śreyaskari bhavati rāmasya mātṛvadhavat // (8) Par.?

guror vākyāni ca śraddheyāni anyathā doṣaśravaṇāt tattvajñānālābhaprasaṅgāc ca // (9) Par.?

bhaktibalavihīno hi grahaṇādyupeto 'pi jñānāvalepenānyathā 'pi śāstrārthaṃ pratipadyata ity ato grahaṇādyupetasya bhaktir eva balam // (10) Par.?

bhāṣyavirodho 'pi nāsti // (11) Par.?

yato balam aṣṭāṅgaṃ brahmacaryam ity asyāyam arthaḥ // (12) Par.?

aṣṭānāṃ grahaṇādīnām aṅgam aṣṭāṅgaṃ bhaktir evocyate vedāṅgavadarthāntarābhidhānāt // (13) Par.?

saiva brahmacaryanimittatvāt brahmacaryam ity ucyate // (14) Par.?

yadi punar yathāśrutārthaḥ syāt tadā vāsovidhānam ityādijñāpakābhidhānavirodhaḥ syād iti // (15) Par.?

vidhāv adhikṛtasya dvitīyaṃ balam āha // (16) Par.?

prasādaś ca mateḥ iti // (17) Par.?

matiprasādaśabdenākaluṣatvam uktam // (18) Par.?

sati hi tasmin matiḥ prasannā bhavati // (19) Par.?

tathā ca balam akaluṣatvam iti bhāṣyam // (20) Par.?

atrāpi tarhi spaṣṭābhidhānaṃ kim arthaṃ na kṛtam // (21) Par.?

matiprasādahetor anyasyāpy āśaucavyāmohādyabhāvasya balatvajñāpanārthaṃ pradhānāpekṣayā tv akaluṣatvam uktam // (22) Par.?

caśabdaḥ pūrvoktabalasya vidyamānasyāpi caritārthatvāt tadbalatvaṃ prādhānyān na cintyata iti sūcayati / (23.1) Par.?

tac cākaluṣatvaṃ dvividhaṃ param aparaṃ ca // (23.2) Par.?

tatra kaluṣatvabījasadbhāve 'py utpannakaluṣatvanirodhi yāvad anāgataṃ kaluṣaṃ notpadyate tāvatkālaṃ yad akaluṣatvaṃ tad aparaṃ yad bījakṣayād atyantanimittasadbhāve 'pi kaluṣaṃ notpadyate tat param iti // (24) Par.?

yogakriyāyām adhikṛtasya tṛtīyaṃ balam āha // (25) Par.?

dvaṃdvajayas tathā iti // (26) Par.?

ādhyātmikādhibhautikādhidaivikāni duḥkhasādhanāni dvaṃdvāni teṣāṃ jayaḥ sahiṣṇutvaṃ dvaṃdvānabhibhāvyatvam ity arthaḥ // (27) Par.?

tathāśabdaḥ samānārthe // (28) Par.?

yathā prāguktabale saty apy acaritārthavidhyadhikṛtasyākaluṣatvam eva balaṃ cintyate tathā baladvayasadbhāve 'py acaritārthaṃ dvaṃdvasahiṣṇutvam eva prādhānyena balaṃ cintyata iti // (29) Par.?

tad api dvividhaṃ parāparabhedāt yat tāvad akṣapite pāpe yogakriyāyām abhiniviṣṭasya sādhakasya mṛdumadhyamaśītātapādibhir anubhāvyatvaṃ dhyānādyabhyāsas tad aparam // (30) Par.?

yat kṣapite niḥśeṣapāpe guhādeśaṃ gatasyātitīvrair api śītādibhir anabhibhāvyasvalakṣaṇaṃ dvaṃdvasahiṣṇutvaṃ tat param // (31) Par.?

bhāṣyakṛtā tu param eva gomṛgadharmatvaṃ vyākhyātam // (32) Par.?

akaluṣatvavad abhyūhya śiṣyā aparaṃ gomṛgadharmitvaṃ pratipatsyanta ity abhiprāyavatā noktam iti // (33.1) Par.?

sadāsmṛtyadhikṛtasya caturthaṃ balam āha dharmaś caiva iti // (34) Par.?

evaśabdo 'vadhāraṇe // (35) Par.?

yadā dharma evāvasthitas tadā balam ity arthaḥ // (36) Par.?

īṣadadharmasadbhāve 'py avadhāraṇe nāsti doṣaḥ kṛṣṇabindusadbhāve śukla evāyaṃ paṭa iti yathā // (37) Par.?

caśabdaḥ pūrvoktabalatrayasadbhāve 'pi dharma evācaritārthatvena balam iti sūcayati // (38) Par.?

niṣṭhāyogayuktasya pañcamaṃ balam āha apramāda iti // (39) Par.?

viśiṣṭaṃ jñānam evātrāpramāda ity abhipretam // (40) Par.?

tathā ca bhāṣyam asya tu jñānam asti yasmād āhāpramādī iti // (41) Par.?

caśabdaḥ śarīrendriyadharmādharmavyāvṛttau satyām apramāda eva balam iti sūcayati balānāṃ nyūnādhikabhāvavyavacchedaṃ ceti // (42) Par.?

balaṃ pañcavidham ity upasaṃhāraḥ // (43) Par.?

smṛtam ity āptoktatvaṃ darśayati // (44) Par.?

nanu ca tatra balacintā yujyate yatra tat sampādya śatrukṣaya upapadyate // (45) Par.?

atra punar mokṣaśāstre vītarāgasya niṣparigrahasya śatrava eva na vidyante kutaḥ tatkṣaya ity ato 'tra balacintānupapanneti // (46) Par.?

naitad evam // (47) Par.?

atrāpi sādhakasyājñānādiśatruhānyupapattes tatpratipādanārtham āha // (48.1) Par.?