Texts

Help

Select a text:
Bibliography
Select a chapter:
 (no revisions)
Associated topic(s): Buddha's life

Show parallels  Show headlines
Use dependency labeler
Chapter id: 6986
  • Click on a sentence to show its analysis
  • Keep the mouse pointer over a lemma to show its meanings.
tato mārabalaṃ jitvā dhairyeṇa ca śamena ca / (1.1) Par.?
paramārthaṃ vijijñāsuḥ sa dadhyau dhyānakovidaḥ // (1.2) Par.?
sarveṣu dhyānavidhiṣu prāpya caiśvaryamuttamam / (2.1) Par.?
sasmāra prathame yāme pūrvajanmaparaṃparām // (2.2) Par.?
amutrāhamayaṃ nāma cyutastasmādihāgataḥ / (3.1) Par.?
iti janmasahasrāṇi sasmārānubhavanniva // (3.2) Par.?
smṛtvā janma ca mṛtyuṃ ca tāsu tāsūpapattiṣu / (4.1) Par.?
tataḥ sattveṣu kāruṇyaṃ cakāra karuṇātmakaḥ // (4.2) Par.?
kṛtveha svajanotsargaṃ punaranyatra ca kriyāḥ / (5.1) Par.?
atrāṇaḥ khalu loko 'yaṃ paribhramati cakravat // (5.2) Par.?
ityevaṃ smaratastasya babhūva niyatātmanaḥ / (6.1) Par.?
kadalīgarbhaniḥsāraḥ saṃsāra iti niścayaḥ // (6.2) Par.?
dvitīye tvāgate yāme so 'dvitīyaparākramaḥ / (7.1) Par.?
divyaṃ lebhe paraṃ cakṣuḥ sarvacakṣuṣmatāṃ varaḥ // (7.2) Par.?
tatastena sa divyena pariśuddhena cakṣuṣā / (8.1) Par.?
dadarśa nikhilaṃ lokamādarśa iva nirmale // (8.2) Par.?
sattvānāṃ paśyatastasya nikṛṣṭotkṛṣṭakarmaṇām / (9.1) Par.?
pracyutiṃ copapattiṃ ca vavṛdhe karuṇātmatā // (9.2) Par.?
ime duṣkṛtakarmāṇaḥ prāṇino yānti durgatim / (10.1) Par.?
ime 'nye śubhakarmāṇaḥ pratiṣṭhante tripiṣṭape // (10.2) Par.?
upapannāḥ pratibhaye narake bhṛśadāruṇe / (11.1) Par.?
amī duḥkhairbahuvidhaiḥ pīḍyante kṛpaṇaṃ bata // (11.2) Par.?
pāyyante kvathitaṃ kecid agnivarṇam ayorasam / (12.1) Par.?
āropyante ruvanto 'nye niṣṭaptastambhamāyasam // (12.2) Par.?
pacyante piṣṭavatkecidayaskumbhīṣvavāṅmukhāḥ / (13.1) Par.?
dahyante karuṇaṃ keciddīpteṣvaṅgārarāśiṣu // (13.2) Par.?
kecittīkṣṇair ayodaṃṣṭrair bhakṣyante dāruṇaiḥ śvabhiḥ / (14.1) Par.?
keciddhṛṣṭair ayastuṇḍair vāyasair āyasairiva // (14.2) Par.?
keciddāhapariśrāntāḥ śītacchāyābhikāṅkṣiṇaḥ / (15.1) Par.?
asipattravanaṃ nīlaṃ baddhā iva viśantyamī // (15.2) Par.?
pāṭyante dāruvatkecitkuṭhārairbaddhabāhavaḥ / (16.1) Par.?
duḥkhe 'pi na vipacyante karmabhirdhāritāsavaḥ // (16.2) Par.?
sukhaṃ syāditi yatkarma kṛtaṃ duḥkhanivṛttaye / (17.1) Par.?
phalaṃ tasyedamavaśairduḥkhamevopabhujyate // (17.2) Par.?
sukhārthamaśubhaṃ kṛtvā ya ete bhṛśaduḥkhitāḥ / (18.1) Par.?
āsvādaḥ sa kimeteṣāṃ karoti sukhamaṇvapi // (18.2) Par.?
hasadbhiryatkṛtaṃ karma kaluṣaṃ kaluṣātmabhiḥ / (19.1) Par.?
etatpariṇate kāle krośadbhiranubhūyate // (19.2) Par.?
yadyevaṃ pāpakarmāṇaḥ paśyeyuḥ karmaṇāṃ phalam / (20.1) Par.?
vameyuruṣṇaṃ rudhiraṃ marmasvabhihatā iva // (20.2) Par.?
ime 'nye karmabhiścitraiś cittavispandasaṃbhavaiḥ / (21.1) Par.?
tiryagyonau vicitrāyām upapannāstapasvinaḥ // (21.2) Par.?
māṃsatvagbāladantārthaṃ vairādapi madādapi / (22.1) Par.?
hanyante kṛpaṇaṃ yatra bandhūnāṃ paśyatāmapi // (22.2) Par.?
aśaknuvanto 'pyavaśāḥ kṣuttarṣaśramapīḍitāḥ / (23.1) Par.?
go'śvabhūtāśca vāhyante pratodakṣatamūrtayaḥ // (23.2) Par.?
vāhyante gajabhūtāśca balīyāṃso 'pi durbalaiḥ / (24.1) Par.?
aṅkuśakliṣṭamūrdhānastāḍitāḥ pādapārṣṇibhiḥ // (24.2) Par.?
satsvapyanyeṣu duḥkheṣu duḥkhaṃ yatra viśeṣataḥ / (25.1) Par.?
parasparavirodhācca parādhīnatayaiva ca // (25.2) Par.?
khasthāḥ khasthairhi bādhyante jalasthā jalacāribhiḥ / (26.1) Par.?
sthalasthāḥ sthalasaṃsthaiśca prāpya caivetaretaraiḥ // (26.2) Par.?
upapannāstathā ceme mātsaryākrāntacetasaḥ / (27.1) Par.?
pitṛloke nirāloke kṛpaṇaṃ bhuñjate phalam // (27.2) Par.?
sūcīchidropamamukhāḥ parvatopamakukṣayaḥ / (28.1) Par.?
kṣuttarṣajanitair duḥkhaiḥ pīḍyante duḥkhabhāginaḥ // (28.2) Par.?
āśayā samatikrāntā dhāryamāṇāḥ svakarmabhiḥ / (29.1) Par.?
labhante na hyamī bhoktuṃ praviddhānyaśucīnyapi // (29.2) Par.?
puruṣo yadi jānīta mātsaryasyedṛśaṃ phalam / (30.1) Par.?
sarvathā śibivaddadyāccharīrāvayavānapi // (30.2) Par.?
ime 'nye narakaprakhye garbhasaṃjñe 'śucihrade / (31.1) Par.?
upapannā manuṣyeṣu duḥkhamarchanti jantavaḥ // (31.2) Par.?
Duration=0.12036800384521 secs.