Texts

gate purohite rāmaḥ snāto niyatamānasaḥ / (1.1) Par.?

saha patnyā viśālākṣyā nārāyaṇam upāgamat // (1.2) Par.?

pragṛhya śirasā pātrīṃ haviṣo vidhivat tadā / (2.1) Par.?

mahate daivatāyājyaṃ juhāva jvalite 'nale // (2.2) Par.?

śeṣaṃ ca haviṣas tasya prāśyāśāsyātmanaḥ priyam / (3.1) Par.?

dhyāyan nārāyaṇaṃ devaṃ svāstīrṇe kuśasaṃstare // (3.2) Par.?

vāgyataḥ saha vaidehyā bhūtvā niyatamānasaḥ / (4.1) Par.?

śrīmaty āyatane viṣṇoḥ śiśye naravarātmajaḥ // (4.2) Par.?

ekayāmāvaśiṣṭāyāṃ rātryāṃ prativibudhya saḥ / (5.1) Par.?

alaṃkāravidhiṃ kṛtsnaṃ kārayāmāsa veśmanaḥ // (5.2) Par.?

tatra śṛṇvan sukhā vācaḥ sūtamāgadhabandinām / (6.1) Par.?

pūrvāṃ saṃdhyām upāsīno jajāpa yatamānasaḥ // (6.2) Par.?

tuṣṭāva praṇataś caiva śirasā madhusūdanam / (7.1) Par.?

vimalakṣaumasaṃvīto vācayāmāsa ca dvijān // (7.2) Par.?

teṣāṃ puṇyāhaghoṣo 'tha gambhīramadhuras tadā / (8.1) Par.?

ayodhyāṃ pūrayāmāsa tūryaghoṣānunāditaḥ // (8.2) Par.?

kṛtopavāsaṃ tu tadā vaidehyā saha rāghavam / (9.1) Par.?

ayodhyānilayaḥ śrutvā sarvaḥ pramudito janaḥ // (9.2) Par.?

tataḥ paurajanaḥ sarvaḥ śrutvā rāmābhiṣecanam / (10.1) Par.?

prabhātāṃ rajanīṃ dṛṣṭvā cakre śobhāṃ parāṃ punaḥ // (10.2) Par.?

sitābhraśikharābheṣu devatāyataneṣu ca / (11.1) Par.?

catuṣpatheṣu rathyāsu caityeṣv aṭṭālakeṣu ca // (11.2) Par.?

nānāpaṇyasamṛddheṣu vaṇijām āpaṇeṣu ca / (12.1) Par.?

kuṭumbināṃ samṛddheṣu śrīmatsu bhavaneṣu ca // (12.2) Par.?

sabhāsu caiva sarvāsu vṛkṣeṣv ālakṣiteṣu ca / (13.1) Par.?

dhvajāḥ samucchritāś citrāḥ patākāś cābhavaṃs tadā // (13.2) Par.?

naṭanartakasaṃghānāṃ gāyakānāṃ ca gāyatām / (14.1) Par.?

manaḥkarṇasukhā vācaḥ śuśruvuś ca tatas tataḥ // (14.2) Par.?

rāmābhiṣekayuktāś ca kathāś cakrur mitho janāḥ / (15.1) Par.?

rāmābhiṣeke samprāpte catvareṣu gṛheṣu ca // (15.2) Par.?

bālā api krīḍamānā gṛhadvāreṣu saṃghaśaḥ / (16.1) Par.?

rāmābhiṣekasaṃyuktāś cakrur eva mithaḥ kathāḥ // (16.2) Par.?

kṛtapuṣpopahāraś ca dhūpagandhādhivāsitaḥ / (17.1) Par.?

rājamārgaḥ kṛtaḥ śrīmān paurai rāmābhiṣecane // (17.2) Par.?

prakāśīkaraṇārthaṃ ca niśāgamanaśaṅkayā / (18.1) Par.?

dīpavṛkṣāṃs tathā cakrur anu rathyāsu sarvaśaḥ // (18.2) Par.?

alaṃkāraṃ purasyaivaṃ kṛtvā tatpuravāsinaḥ / (19.1) Par.?

ākāṅkṣamāṇā rāmasya yauvarājyābhiṣecanam // (19.2) Par.?

sametya saṃghaśaḥ sarve catvareṣu sabhāsu ca / (20.1) Par.?

kathayanto mithas tatra praśaśaṃsur janādhipam // (20.2) Par.?

aho mahātmā rājāyam ikṣvākukulanandanaḥ / (21.1) Par.?

jñātvā yo vṛddham ātmānaṃ rāmaṃ rājye 'bhiṣekṣyati // (21.2) Par.?

sarve hy anugṛhītāḥ sma yan no rāmo mahīpatiḥ / (22.1) Par.?

cirāya bhavitā goptā dṛṣṭalokaparāvaraḥ // (22.2) Par.?

anuddhatamanā vidvān dharmātmā bhrātṛvatsalaḥ / (23.1) Par.?

yathā ca bhrātṛṣu snigdhas tathāsmāsv api rāghavaḥ // (23.2) Par.?

ciraṃ jīvatu dharmātmā rājā daśaratho 'naghaḥ / (24.1) Par.?

yatprasādenābhiṣiktaṃ rāmaṃ drakṣyāmahe vayam // (24.2) Par.?

evaṃvidhaṃ kathayatāṃ paurāṇāṃ śuśruvus tadā / (25.1) Par.?

digbhyo 'pi śrutavṛttāntāḥ prāptā jānapadā janāḥ // (25.2) Par.?

te tu digbhyaḥ purīṃ prāptā draṣṭuṃ rāmābhiṣecanam / (26.1) Par.?

rāmasya pūrayāmāsuḥ purīṃ jānapadā janāḥ // (26.2) Par.?

janaughais tair visarpadbhiḥ śuśruve tatra nisvanaḥ / (27.1) Par.?

parvasūdīrṇavegasya sāgarasyeva nisvanaḥ // (27.2) Par.?

tatas tad indrakṣayasaṃnibhaṃ puraṃ didṛkṣubhir jānapadair upāgataiḥ / (28.1) Par.?

samantataḥ sasvanam ākulaṃ babhau samudrayādobhir ivārṇavodakam // (28.2) Par.?