Texts

tataḥ śāsanam ājñāya bhrātuḥ śubhataraṃ priyam / (1.1) Par.?

gatvā sa praviveśāśu suyajñasya niveśanam // (1.2) Par.?

taṃ vipram agnyagārasthaṃ vanditvā lakṣmaṇo 'bravīt / (2.1) Par.?

sakhe 'bhyāgaccha paśya tvaṃ veśma duṣkarakāriṇaḥ // (2.2) Par.?

tataḥ saṃdhyām upāsyāśu gatvā saumitriṇā saha / (3.1) Par.?

juṣṭaṃ tat prāviśal lakṣmyā ramyaṃ rāmaniveśanam // (3.2) Par.?

tam āgataṃ vedavidaṃ prāñjaliḥ sītayā saha / (4.1) Par.?

suyajñam abhicakrāma rāghavo 'gnim ivārcitam // (4.2) Par.?

jātarūpamayair mukhyair aṅgadaiḥ kuṇḍalaiḥ śubhaiḥ / (5.1) Par.?

sahemasūtrair maṇibhiḥ keyūrair valayair api // (5.2) Par.?

anyaiś ca ratnair bahubhiḥ kākutsthaḥ pratyapūjayat / (6.1) Par.?

suyajñaṃ sa tadovāca rāmaḥ sītāpracoditaḥ // (6.2) Par.?

hāraṃ ca hemasūtraṃ ca bhāryāyai saumya hāraya / (7.1) Par.?

raśanāṃ cādhunā sītā dātum icchati te sakhe // (7.2) Par.?

paryaṅkam agryāstaraṇaṃ nānāratnavibhūṣitam / (8.1) Par.?

tam apīcchati vaidehī pratiṣṭhāpayituṃ tvayi // (8.2) Par.?

nāgaḥ śatruṃjayo nāma mātulo yaṃ dadau mama / (9.1) Par.?

taṃ te gajasahasreṇa dadāmi dvijapuṃgava // (9.2) Par.?

ity uktaḥ sa hi rāmeṇa suyajñaḥ pratigṛhya tat / (10.1) Par.?

rāmalakṣmaṇasītānāṃ prayuyojāśiṣaḥ śivāḥ // (10.2) Par.?

atha bhrātaram avyagraṃ priyaṃ rāmaḥ priyaṃvadaḥ / (11.1) Par.?

saumitriṃ tam uvācedaṃ brahmeva tridaśeśvaram // (11.2) Par.?

agastyaṃ kauśikaṃ caiva tāv ubhau brāhmaṇottamau / (12.1) Par.?

arcayāhūya saumitre ratnaiḥ sasyam ivāmbubhiḥ // (12.2) Par.?

kausalyāṃ ca ya āśīrbhir bhaktaḥ paryupatiṣṭhati / (13.1) Par.?

ācāryas taittirīyāṇām abhirūpaś ca vedavit // (13.2) Par.?

tasya yānaṃ ca dāsīś ca saumitre saṃpradāpaya / (14.1) Par.?

kauśeyāni ca vastrāṇi yāvat tuṣyati sa dvijaḥ // (14.2) Par.?

sūtaś citrarathaś cāryaḥ sacivaḥ suciroṣitaḥ / (15.1) Par.?

toṣayainaṃ mahārhaiś ca ratnair vastrair dhanais tathā // (15.2) Par.?

śālivāhasahasraṃ ca dve śate bhadrakāṃs tathā / (16.1) Par.?

vyañjanārthaṃ ca saumitre gosahasram upākuru // (16.2) Par.?

tataḥ sa puruṣavyāghras tad dhanaṃ lakṣmaṇaḥ svayam / (17.1) Par.?

yathoktaṃ brāhmaṇendrāṇām adadād dhanado yathā // (17.2) Par.?

athābravīd bāṣpakalāṃs tiṣṭhataś copajīvinaḥ / (18.1) Par.?

sampradāya bahu dravyam ekaikasyopajīvinaḥ // (18.2) Par.?

lakṣmaṇasya ca yad veśma gṛhaṃ ca yad idaṃ mama / (19.1) Par.?

aśūnyaṃ kāryam ekaikaṃ yāvadāgamanaṃ mama // (19.2) Par.?

ity uktvā duḥkhitaṃ sarvaṃ janaṃ tam upajīvinam / (20.1) Par.?

uvācedaṃ dhanādhyakṣaṃ dhanam ānīyatām iti / (20.2) Par.?

tato 'sya dhanam ājahruḥ sarvam evopajīvinaḥ // (20.3) Par.?

tataḥ sa puruṣavyāghras tad dhanaṃ sahalakṣmaṇaḥ / (21.1) Par.?

dvijebhyo bālavṛddhebhyaḥ kṛpaṇebhyo 'bhyadāpayat // (21.2) Par.?

tatrāsīt piṅgalo gārgyas trijaṭo nāma vai dvijaḥ / (22.1) Par.?

ā pañcamāyāḥ kakṣyāyā nainaṃ kaścid avārayat // (22.2) Par.?

sa rājaputram āsādya trijaṭo vākyam abravīt / (23.1) Par.?

nirdhano bahuputro 'smi rājaputra mahāyaśaḥ / (23.2) Par.?

uñchavṛttir vane nityaṃ pratyavekṣasva mām iti // (23.3) Par.?

tam uvāca tato rāmaḥ parihāsasamanvitam / (24.1) Par.?

gavāṃ sahasram apy ekaṃ na tu viśrāṇitaṃ mayā / (24.2) Par.?

parikṣipasi daṇḍena yāvat tāvad avāpsyasi // (24.3) Par.?

sa śāṭīṃ tvaritaḥ kaṭyāṃ saṃbhrāntaḥ pariveṣṭya tām / (25.1) Par.?

āvidhya daṇḍaṃ cikṣepa sarvaprāṇena vegitaḥ // (25.2) Par.?

uvāca ca tato rāmas taṃ gārgyam abhisāntvayan / (26.1) Par.?

manyur na khalu kartavyaḥ parihāso hy ayaṃ mama // (26.2) Par.?

tataḥ sabhāryas trijaṭo mahāmunir gavām anīkaṃ pratigṛhya moditaḥ / (27.1) Par.?

yaśobalaprītisukhopabṛṃhiṇīs tad āśiṣaḥ pratyavadan mahātmanaḥ // (27.2) Par.?