Texts

dattvā tu saha vaidehyā brāhmaṇebhyo dhanaṃ bahu / (1.1) Par.?

jagmatuḥ pitaraṃ draṣṭuṃ sītayā saha rāghavau // (1.2) Par.?

tato gṛhīte duṣprekṣye aśobhetāṃ tadāyudhe / (2.1) Par.?

mālādāmabhir āsakte sītayā samalaṃkṛte // (2.2) Par.?

tataḥ prāsādaharmyāṇi vimānaśikharāṇi ca / (3.1) Par.?

adhiruhya janaḥ śrīmān udāsīno vyalokayat // (3.2) Par.?

na hi rathyāḥ sma śakyante gantuṃ bahujanākulāḥ / (4.1) Par.?

āruhya tasmāt prāsādān dīnāḥ paśyanti rāghavam // (4.2) Par.?

padātiṃ varjitacchattraṃ rāmaṃ dṛṣṭvā tadā janāḥ / (5.1) Par.?

ūcur bahuvidhā vācaḥ śokopahatacetasaḥ // (5.2) Par.?

yaṃ yāntam anuyāti sma caturaṅgabalaṃ mahat / (6.1) Par.?

tam ekaṃ sītayā sārdham anuyāti sma lakṣmaṇaḥ // (6.2) Par.?

aiśvaryasya rasajñaḥ san kāmināṃ caiva kāmadaḥ / (7.1) Par.?

necchaty evānṛtaṃ kartuṃ pitaraṃ dharmagauravāt // (7.2) Par.?

yā na śakyā purā draṣṭuṃ bhūtair ākāśagair api / (8.1) Par.?

tām adya sītāṃ paśyanti rājamārgagatā janāḥ // (8.2) Par.?

aṅgarāgocitāṃ sītāṃ raktacandanasevinīm / (9.1) Par.?

varṣam uṣṇaṃ ca śītaṃ ca neṣyaty āśu vivarṇatām // (9.2) Par.?

adya nūnaṃ daśarathaḥ sattvam āviśya bhāṣate / (10.1) Par.?

na hi rājā priyaṃ putraṃ vivāsayitum arhati // (10.2) Par.?

nirguṇasyāpi putrasya kathaṃ syād vipravāsanam / (11.1) Par.?

kiṃ punar yasya loko 'yaṃ jito vṛttena kevalam // (11.2) Par.?

ānṛśaṃsyam anukrośaḥ śrutaṃ śīlaṃ damaḥ śamaḥ / (12.1) Par.?

rāghavaṃ śobhayanty ete ṣaḍguṇāḥ puruṣottamam // (12.2) Par.?

tasmāt tasyopaghātena prajāḥ paramapīḍitāḥ / (13.1) Par.?

audakānīva sattvāni grīṣme salilasaṃkṣayāt // (13.2) Par.?

pīḍayā pīḍitaṃ sarvaṃ jagad asya jagatpateḥ / (14.1) Par.?

mūlasyevopaghātena vṛkṣaḥ puṣpaphalopagaḥ // (14.2) Par.?

te lakṣmaṇa iva kṣipraṃ sapatnyaḥ sahabāndhavāḥ / (15.1) Par.?

gacchantam anugacchāmo yena gacchati rāghavaḥ // (15.2) Par.?

udyānāni parityajya kṣetrāṇi ca gṛhāṇi ca / (16.1) Par.?

ekaduḥkhasukhā rāmam anugacchāma dhārmikam // (16.2) Par.?

samuddhṛtanidhānāni paridhvastājirāṇi ca / (17.1) Par.?

upāttadhanadhānyāni hṛtasārāṇi sarvaśaḥ // (17.2) Par.?

rajasābhyavakīrṇāni parityaktāni daivataiḥ / (18.1) Par.?

asmattyaktāni veśmāni kaikeyī pratipadyatām // (18.2) Par.?

vanaṃ nagaram evāstu yena gacchati rāghavaḥ / (19.1) Par.?

asmābhiś ca parityaktaṃ puraṃ saṃpadyatāṃ vanam // (19.2) Par.?

bilāni daṃṣṭriṇaḥ sarve sānūni mṛgapakṣiṇaḥ / (20.1) Par.?

asmattyaktaṃ prapadyantāṃ sevyamānaṃ tyajantu ca // (20.2) Par.?

ity evaṃ vividhā vāco nānājanasamīritāḥ / (21.1) Par.?

śuśrāva rāmaḥ śrutvā ca na vicakre 'sya mānasam // (21.2) Par.?

pratīkṣamāṇo 'bhijanaṃ tadārtam anārtarūpaḥ prahasann ivātha / (22.1) Par.?

jagāma rāmaḥ pitaraṃ didṛkṣuḥ pitur nideśaṃ vidhivac cikīrṣuḥ // (22.2) Par.?

tat pūrvam aikṣvākasuto mahātmā rāmo gamiṣyan vanam ārtarūpam / (23.1) Par.?

vyatiṣṭhata prekṣya tadā sumantraṃ pitur mahātmā pratihāraṇārtham // (23.2) Par.?

pitur nideśena tu dharmavatsalo vanapraveśe kṛtabuddhiniścayaḥ / (24.1) Par.?

sa rāghavaḥ prekṣya sumantram abravīn nivedayasvāgamanaṃ nṛpāya me // (24.2) Par.?