Texts

taṃ tu rāmaḥ samāśvāsya bhrātaraṃ guruvatsalam / (1.1) Par.?

lakṣmaṇena saha bhrātrā praṣṭuṃ samupacakrame // (1.2) Par.?

kim etad iccheyam ahaṃ śrotuṃ pravyāhṛtaṃ tvayā / (2.1) Par.?

yasmāt tvam āgato deśam imaṃ cīrajaṭājinī // (2.2) Par.?

yannimittam imaṃ deśaṃ kṛṣṇājinajaṭādharaḥ / (3.1) Par.?

hitvā rājyaṃ praviṣṭas tvaṃ tat sarvaṃ vaktum arhasi // (3.2) Par.?

ity uktaḥ kekayīputraḥ kākutsthena mahātmanā / (4.1) Par.?

pragṛhya balavad bhūyaḥ prāñjalir vākyam abravīt // (4.2) Par.?

āryaṃ tātaḥ parityajya kṛtvā karma suduṣkaram / (5.1) Par.?

gataḥ svargaṃ mahābāhuḥ putraśokābhipīḍitaḥ // (5.2) Par.?

striyā niyuktaḥ kaikeyyā mama mātrā paraṃtapa / (6.1) Par.?

cakāra sumahat pāpam idam ātmayaśoharam // (6.2) Par.?

sā rājyaphalam aprāpya vidhavā śokakarśitā / (7.1) Par.?

patiṣyati mahāghore niraye jananī mama // (7.2) Par.?

tasya me dāsabhūtasya prasādaṃ kartum arhasi / (8.1) Par.?

abhiṣiñcasva cādyaiva rājyena maghavān iva // (8.2) Par.?

imāḥ prakṛtayaḥ sarvā vidhavā mātaraś ca yāḥ / (9.1) Par.?

tvatsakāśam anuprāptāḥ prasādaṃ kartum arhasi // (9.2) Par.?

tadānupūrvyā yuktaṃ ca yuktaṃ cātmani mānada / (10.1) Par.?

rājyaṃ prāpnuhi dharmeṇa sakāmān suhṛdaḥ kuru // (10.2) Par.?

bhavatv avidhavā bhūmiḥ samagrā patinā tvayā / (11.1) Par.?

śaśinā vimaleneva śāradī rajanī yathā // (11.2) Par.?

ebhiś ca sacivaiḥ sārdhaṃ śirasā yācito mayā / (12.1) Par.?

bhrātuḥ śiṣyasya dāsasya prasādaṃ kartum arhasi // (12.2) Par.?

tad idaṃ śāśvataṃ pitryaṃ sarvaṃ sacivamaṇḍalam / (13.1) Par.?

pūjitaṃ puruṣavyāghra nātikramitum utsahe // (13.2) Par.?

evam uktvā mahābāhuḥ sabāṣpaḥ kekayīsutaḥ / (14.1) Par.?

rāmasya śirasā pādau jagrāha bharataḥ punaḥ // (14.2) Par.?

taṃ mattam iva mātaṃgaṃ niḥśvasantaṃ punaḥ punaḥ / (15.1) Par.?

bhrātaraṃ bharataṃ rāmaḥ pariṣvajyedam abravīt // (15.2) Par.?

kulīnaḥ sattvasampannas tejasvī caritavrataḥ / (16.1) Par.?

rājyahetoḥ kathaṃ pāpam ācaret tvadvidho janaḥ // (16.2) Par.?

na doṣaṃ tvayi paśyāmi sūkṣmam apy arisūdana / (17.1) Par.?

na cāpi jananīṃ bālyāt tvaṃ vigarhitum arhasi // (17.2) Par.?

yāvat pitari dharmajña gauravaṃ lokasatkṛte / (18.1) Par.?

tāvad dharmabhṛtāṃ śreṣṭha jananyām api gauravam // (18.2) Par.?

etābhyāṃ dharmaśīlābhyāṃ vanaṃ gaccheti rāghava / (19.1) Par.?

mātāpitṛbhyām ukto 'haṃ katham anyat samācare // (19.2) Par.?

tvayā rājyam ayodhyāyāṃ prāptavyaṃ lokasatkṛtam / (20.1) Par.?

vastavyaṃ daṇḍakāraṇye mayā valkalavāsasā // (20.2) Par.?

evaṃ kṛtvā mahārājo vibhāgaṃ lokasaṃnidhau / (21.1) Par.?

vyādiśya ca mahātejā divaṃ daśaratho gataḥ // (21.2) Par.?

sa ca pramāṇaṃ dharmātmā rājā lokagurus tava / (22.1) Par.?

pitrā dattaṃ yathābhāgam upabhoktuṃ tvam arhasi // (22.2) Par.?

caturdaśa samāḥ saumya daṇḍakāraṇyam āśritaḥ / (23.1) Par.?

upabhokṣye tv ahaṃ dattaṃ bhāgaṃ pitrā mahātmanā // (23.2) Par.?

yad abravīn māṃ naralokasatkṛtaḥ pitā mahātmā vibudhādhipopamaḥ / (24.1) Par.?

tad eva manye paramātmano hitaṃ na sarvalokeśvarabhāvam avyayam // (24.2) Par.?