Texts

praviśya tu mahāraṇyaṃ daṇḍakāraṇyam ātmavān / (1.1) Par.?

dadarśa rāmo durdharṣas tāpasāśramamaṇḍalam // (1.2) Par.?

kuśacīraparikṣiptaṃ brāhmyā lakṣmyā samāvṛtam / (2.1) Par.?

yathā pradīptaṃ durdharṣaṃ gagane sūryamaṇḍalam // (2.2) Par.?

śaraṇyaṃ sarvabhūtānāṃ susaṃmṛṣṭājiraṃ sadā / (3.1) Par.?

pūjitaṃ copanṛttaṃ ca nityam apsarasāṃ gaṇaiḥ // (3.2) Par.?

viśālair agniśaraṇaiḥ srugbhāṇḍair ajinaiḥ kuśaiḥ / (4.1) Par.?

samidbhis toyakalaśaiḥ phalamūlaiś ca śobhitam // (4.2) Par.?

āraṇyaiś ca mahāvṛkṣaiḥ puṇyaiḥ svāduphalair vṛtam / (5.1) Par.?

balihomārcitaṃ puṇyaṃ brahmaghoṣanināditam // (5.2) Par.?

puṣpair vanyaiḥ parikṣiptaṃ padminyā ca sapadmayā / (6.1) Par.?

phalamūlāśanair dāntaiś cīrakṛṣṇājināmbaraiḥ // (6.2) Par.?

sūryavaiśvānarābhaiś ca purāṇair munibhir vṛtam / (7.1) Par.?

puṇyaiś ca niyatāhāraiḥ śobhitaṃ paramarṣibhiḥ // (7.2) Par.?

tad brahmabhavanaprakhyaṃ brahmaghoṣanināditam / (8.1) Par.?

brahmavidbhir mahābhāgair brāhmaṇair upaśobhitam // (8.2) Par.?

tad dṛṣṭvā rāghavaḥ śrīmāṃs tāpasāśramamaṇḍalam / (9.1) Par.?

abhyagacchan mahātejā vijyaṃ kṛtvā mahad dhanuḥ // (9.2) Par.?

divyajñānopapannās te rāmaṃ dṛṣṭvā maharṣayaḥ / (10.1) Par.?

abhyagacchaṃs tadā prītā vaidehīṃ ca yaśasvinīm // (10.2) Par.?

te taṃ somam ivodyantaṃ dṛṣṭvā vai dharmacāriṇaḥ / (11.1) Par.?

maṅgalāni prayuñjānāḥ pratyagṛhṇan dṛḍhavratāḥ // (11.2) Par.?

rūpasaṃhananaṃ lakṣmīṃ saukumāryaṃ suveṣatām / (12.1) Par.?

dadṛśur vismitākārā rāmasya vanavāsinaḥ // (12.2) Par.?

vaidehīṃ lakṣmaṇaṃ rāmaṃ netrair animiṣair iva / (13.1) Par.?

āścaryabhūtān dadṛśuḥ sarve te vanacāriṇaḥ // (13.2) Par.?

atrainaṃ hi mahābhāgāḥ sarvabhūtahite ratāḥ / (14.1) Par.?

atithiṃ parṇaśālāyāṃ rāghavaṃ saṃnyaveśayan // (14.2) Par.?

tato rāmasya satkṛtya vidhinā pāvakopamāḥ / (15.1) Par.?

ājahrus te mahābhāgāḥ salilaṃ dharmacāriṇaḥ // (15.2) Par.?

mūlaṃ puṣpaṃ phalaṃ vanyam āśramaṃ ca mahātmanaḥ / (16.1) Par.?

nivedayitvā dharmajñās tataḥ prāñjalayo 'bruvan // (16.2) Par.?

dharmapālo janasyāsya śaraṇyaś ca mahāyaśāḥ / (17.1) Par.?

pūjanīyaś ca mānyaś ca rājā daṇḍadharo guruḥ // (17.2) Par.?

indrasyeva caturbhāgaḥ prajā rakṣati rāghava / (18.1) Par.?

rājā tasmād varān bhogān bhuṅkte lokanamaskṛtaḥ // (18.2) Par.?

te vayaṃ bhavatā rakṣyā bhavadviṣayavāsinaḥ / (19.1) Par.?

nagarastho vanastho vā tvaṃ no rājā janeśvaraḥ // (19.2) Par.?

nyastadaṇḍā vayaṃ rājañ jitakrodhā jitendriyāḥ / (20.1) Par.?

rakṣitavyās tvayā śaśvad garbhabhūtās tapodhanāḥ // (20.2) Par.?

evam uktvā phalair mūlaiḥ puṣpair vanyaiś ca rāghavam / (21.1) Par.?

anyaiś ca vividhāhāraiḥ salakṣmaṇam apūjayan // (21.2) Par.?

tathānye tāpasāḥ siddhā rāmaṃ vaiśvānaropamāḥ / (22.1) Par.?

nyāyavṛttā yathānyāyaṃ tarpayāmāsur īśvaram // (22.2) Par.?