Texts

tataḥ śūrpaṇakhāṃ kruddhāṃ bruvatīṃ paruṣaṃ vacaḥ / (1.1) Par.?

amātyamadhye saṃkruddhaḥ paripapraccha rāvaṇaḥ // (1.2) Par.?

kaś ca rāmaḥ kathaṃvīryaḥ kiṃrūpaḥ kiṃparākramaḥ / (2.1) Par.?

kimarthaṃ daṇḍakāraṇyaṃ praviṣṭaś ca suduścaram // (2.2) Par.?

āyudhaṃ kiṃ ca rāmasya nihatā yena rākṣasāḥ / (3.1) Par.?

kharaś ca nihataḥ saṃkhye dūṣaṇas triśirās tathā // (3.2) Par.?

ity uktā rākṣasendreṇa rākṣasī krodhamūrchitā / (4.1) Par.?

tato rāmaṃ yathānyāyam ākhyātum upacakrame // (4.2) Par.?

dīrghabāhur viśālākṣaś cīrakṛṣṇājināmbaraḥ / (5.1) Par.?

kandarpasamarūpaś ca rāmo daśarathātmajaḥ // (5.2) Par.?

śakracāpanibhaṃ cāpaṃ vikṛṣya kanakāṅgadam / (6.1) Par.?

dīptān kṣipati nārācān sarpān iva mahāviṣān // (6.2) Par.?

nādadānaṃ śarān ghorān na muñcantaṃ mahābalam / (7.1) Par.?

na kārmukaṃ vikarṣantaṃ rāmaṃ paśyāmi saṃyuge // (7.2) Par.?

hanyamānaṃ tu tat sainyaṃ paśyāmi śaravṛṣṭibhiḥ / (8.1) Par.?

indreṇevottamaṃ sasyam āhataṃ tv aśmavṛṣṭibhiḥ // (8.2) Par.?

rakṣasāṃ bhīmavīryāṇāṃ sahasrāṇi caturdaśa / (9.1) Par.?

nihatāni śarais tīkṣṇais tenaikena padātinā // (9.2) Par.?

ardhādhikamuhūrtena kharaś ca sahadūṣaṇaḥ / (10.1) Par.?

ṛṣīṇām abhayaṃ dattaṃ kṛtakṣemāś ca daṇḍakāḥ // (10.2) Par.?

ekā kathaṃcin muktāhaṃ paribhūya mahātmanā / (11.1) Par.?

strīvadhaṃ śaṅkamānena rāmeṇa viditātmanā // (11.2) Par.?

bhrātā cāsya mahātejā guṇatas tulyavikramaḥ / (12.1) Par.?

anuraktaś ca bhaktaś ca lakṣmaṇo nāma vīryavān // (12.2) Par.?

amarṣī durjayo jetā vikrānto buddhimān balī / (13.1) Par.?

rāmasya dakṣiṇo bāhur nityaṃ prāṇo bahiścaraḥ // (13.2) Par.?

rāmasya tu viśālākṣī dharmapatnī yaśasvinī / (14.1) Par.?

sītā nāma varārohā vaidehī tanumadhyamā // (14.2) Par.?

naiva devī na gandharvī na yakṣī na ca kiṃnarī / (15.1) Par.?

tathārūpā mayā nārī dṛṣṭapūrvā mahītale // (15.2) Par.?

yasya sītā bhaved bhāryā yaṃ ca hṛṣṭā pariṣvajet / (16.1) Par.?

atijīvet sa sarveṣu lokeṣv api puraṃdarāt // (16.2) Par.?

sā suśīlā vapuḥślāghyā rūpeṇāpratimā bhuvi / (17.1) Par.?

tavānurūpā bhāryā sā tvaṃ ca tasyās tathā patiḥ // (17.2) Par.?

tāṃ tu vistīrṇajaghanāṃ pīnottuṅgapayodharām / (18.1) Par.?

bhāryārthe tu tavānetum udyatāhaṃ varānanām // (18.2) Par.?

tāṃ tu dṛṣṭvādya vaidehīṃ pūrṇacandranibhānanām / (19.1) Par.?

manmathasya śarāṇāṃ ca tvaṃ vidheyo bhaviṣyasi // (19.2) Par.?

yadi tasyām abhiprāyo bhāryārthe tava jāyate / (20.1) Par.?

śīghram uddhriyatāṃ pādo jayārtham iha dakṣiṇaḥ // (20.2) Par.?

kuru priyaṃ tathā teṣāṃ rakṣasāṃ rākṣaseśvara / (21.1) Par.?

vadhāt tasya nṛśaṃsasya rāmasyāśramavāsinaḥ // (21.2) Par.?

taṃ śarair niśitair hatvā lakṣmaṇaṃ ca mahāratham / (22.1) Par.?

hatanāthāṃ sukhaṃ sītāṃ yathāvad upabhokṣyase // (22.2) Par.?

rocate yadi te vākyaṃ mamaitad rākṣaseśvara / (23.1) Par.?

kriyatāṃ nirviśaṅkena vacanaṃ mama rāghava // (23.2) Par.?

niśamya rāmeṇa śarair ajihmagair hatāñ janasthānagatān niśācarān / (24.1) Par.?

kharaṃ ca buddhvā nihataṃ ca dūṣaṇaṃ tvam adya kṛtyaṃ pratipattum arhasi // (24.2) Par.?