Texts

Help

Select a text:
Bibliography
Select a chapter:
 (no revisions)
Show parallels  Show headlines
Use dependency labeler
Chapter id: 1699
  • Click on a sentence to show its analysis
  • Keep the mouse pointer over a lemma to show its meanings.
tac chrutvā rākṣasendrasya vākyaṃ vākyaviśāradaḥ / (1.1) Par.?
pratyuvāca mahāprājño mārīco rākṣaseśvaram // (1.2) Par.?
sulabhāḥ puruṣā rājan satataṃ priyavādinaḥ / (2.1) Par.?
apriyasya ca pathyasya vaktā śrotā ca durlabhaḥ // (2.2) Par.?
na nūnaṃ budhyase rāmaṃ mahāvīryaṃ guṇonnatam / (3.1) Par.?
ayuktacāraś capalo mahendravaruṇopamam // (3.2) Par.?
api svasti bhavet tāta sarveṣāṃ bhuvi rakṣasām / (4.1) Par.?
api rāmo na saṃkruddhaḥ kuryāl lokam arākṣasam // (4.2) Par.?
api te jīvitāntāya notpannā janakātmajā / (5.1) Par.?
api sītā nimittaṃ ca na bhaved vyasanaṃ mahat // (5.2) Par.?
api tvām īśvaraṃ prāpya kāmavṛttaṃ niraṅkuśam / (6.1) Par.?
na vinaśyet purī laṅkā tvayā saha sarākṣasā // (6.2) Par.?
tvadvidhaḥ kāmavṛtto hi duḥśīlaḥ pāpamantritaḥ / (7.1) Par.?
ātmānaṃ svajanaṃ rāṣṭraṃ sa rājā hanti durmatiḥ // (7.2) Par.?
na ca pitrā parityakto nāmaryādaḥ kathaṃcana / (8.1) Par.?
na lubdho na ca duḥśīlo na ca kṣatriyapāṃsanaḥ // (8.2) Par.?
na ca dharmaguṇair hīnaḥ kausalyānandavardhanaḥ / (9.1) Par.?
na ca tīkṣṇo hi bhūtānāṃ sarveṣāṃ ca hite rataḥ // (9.2) Par.?
vañcitaṃ pitaraṃ dṛṣṭvā kaikeyyā satyavādinam / (10.1) Par.?
kariṣyāmīti dharmātmā tataḥ pravrajito vanam // (10.2) Par.?
kaikeyyāḥ priyakāmārthaṃ pitur daśarathasya ca / (11.1) Par.?
hitvā rājyaṃ ca bhogāṃś ca praviṣṭo daṇḍakāvanam // (11.2) Par.?
na rāmaḥ karkaśas tāta nāvidvān nājitendriyaḥ / (12.1) Par.?
anṛtaṃ na śrutaṃ caiva naiva tvaṃ vaktum arhasi // (12.2) Par.?
rāmo vigrahavān dharmaḥ sādhuḥ satyaparākramaḥ / (13.1) Par.?
rājā sarvasya lokasya devānām iva vāsavaḥ // (13.2) Par.?
kathaṃ tvaṃ tasya vaidehīṃ rakṣitāṃ svena tejasā / (14.1) Par.?
icchasi prasabhaṃ hartuṃ prabhām iva vivasvataḥ // (14.2) Par.?
śarārciṣam anādhṛṣyaṃ cāpakhaḍgendhanaṃ raṇe / (15.1) Par.?
rāmāgniṃ sahasā dīptaṃ na praveṣṭuṃ tvam arhasi // (15.2) Par.?
dhanurvyāditadīptāsyaṃ śarārciṣam amarṣaṇam / (16.1) Par.?
cāpabāṇadharaṃ vīraṃ śatrusenāpahāriṇam // (16.2) Par.?
rājyaṃ sukhaṃ ca saṃtyajya jīvitaṃ ceṣṭam ātmanaḥ / (17.1) Par.?
nātyāsādayituṃ tāta rāmāntakam ihārhasi // (17.2) Par.?
aprameyaṃ hi tattejo yasya sā janakātmajā / (18.1) Par.?
na tvaṃ samarthas tāṃ hartuṃ rāmacāpāśrayāṃ vane // (18.2) Par.?
prāṇebhyo 'pi priyatarā bhāryā nityam anuvratā / (19.1) Par.?
dīptasyeva hutāśasya śikhā sītā sumadhyamā // (19.2) Par.?
kim udyamaṃ vyartham imaṃ kṛtvā te rākṣasādhipa / (20.1) Par.?
dṛṣṭaś cet tvaṃ raṇe tena tadantaṃ tava jīvitam / (20.2) Par.?
jīvitaṃ ca sukhaṃ caiva rājyaṃ caiva sudurlabham // (20.3) Par.?
sa sarvaiḥ sacivaiḥ sārdhaṃ vibhīṣaṇapuraskṛtaiḥ / (21.1) Par.?
mantrayitvā tu dharmiṣṭhaiḥ kṛtvā niścayam ātmanaḥ // (21.2) Par.?
doṣāṇāṃ ca guṇānāṃ ca sampradhārya balābalam / (22.1) Par.?
ātmanaś ca balaṃ jñātvā rāghavasya ca tattvataḥ / (22.2) Par.?
hitaṃ hi tava niścitya kṣamaṃ tvaṃ kartum arhasi // (22.3) Par.?
ahaṃ tu manye tava na kṣamaṃ raṇe samāgamaṃ kosalarājasūnunā / (23.1) Par.?
idaṃ hi bhūyaḥ śṛṇu vākyam uttamaṃ kṣamaṃ ca yuktaṃ ca niśācarādhipa // (23.2) Par.?
Duration=0.085497140884399 secs.