Texts

tapyamānaṃ tathā rāmaṃ sītāharaṇakarśitam / (1.1) Par.?

lokānām abhave yuktaṃ saṃvartakam ivānalam // (1.2) Par.?

vīkṣamāṇaṃ dhanuḥ sajyaṃ niḥśvasantaṃ muhur muhuḥ / (2.1) Par.?

hantukāmaṃ paśuṃ rudraṃ kruddhaṃ dakṣakratau yathā // (2.2) Par.?

adṛṣṭapūrvaṃ saṃkruddhaṃ dṛṣṭvā rāmaṃ sa lakṣmaṇaḥ / (3.1) Par.?

abravīt prāñjalir vākyaṃ mukhena pariśuṣyatā // (3.2) Par.?

purā bhūtvā mṛdur dāntaḥ sarvabhūtahite rataḥ / (4.1) Par.?

na krodhavaśam āpannaḥ prakṛtiṃ hātum arhasi // (4.2) Par.?

candre lakṣmīḥ prabhā sūrye gatir vāyau bhuvi kṣamā / (5.1) Par.?

etac ca niyataṃ sarvaṃ tvayi cānuttamaṃ yaśaḥ // (5.2) Par.?

na tu jānāmi kasyāyaṃ bhagnaḥ sāṃgrāmiko rathaḥ / (6.1) Par.?

kena vā kasya vā hetoḥ sāyudhaḥ saparicchadaḥ // (6.2) Par.?

khuranemikṣataś cāyaṃ sikto rudhirabindubhiḥ / (7.1) Par.?

deśo nivṛttasaṃgrāmaḥ sughoraḥ pārthivātmaja // (7.2) Par.?

ekasya tu vimardo 'yaṃ na dvayor vadatāṃ vara / (8.1) Par.?

na hi vṛttaṃ hi paśyāmi balasya mahataḥ padam // (8.2) Par.?

naikasya tu kṛte lokān vināśayitum arhasi / (9.1) Par.?

yuktadaṇḍā hi mṛdavaḥ praśāntā vasudhādhipāḥ // (9.2) Par.?

sadā tvaṃ sarvabhūtānāṃ śaraṇyaḥ paramā gatiḥ / (10.1) Par.?

ko nu dārapraṇāśaṃ te sādhu manyeta rāghava // (10.2) Par.?

saritaḥ sāgarāḥ śailā devagandharvadānavāḥ / (11.1) Par.?

nālaṃ te vipriyaṃ kartuṃ dīkṣitasyeva sādhavaḥ // (11.2) Par.?

yena rājan hṛtā sītā tam anveṣitum arhasi / (12.1) Par.?

maddvitīyo dhanuṣpāṇiḥ sahāyaiḥ paramarṣibhiḥ // (12.2) Par.?

samudraṃ ca viceṣyāmaḥ parvatāṃś ca vanāni ca / (13.1) Par.?

guhāś ca vividhā ghorā nalinīḥ pārvatīś ca ha // (13.2) Par.?

devagandharvalokāṃś ca viceṣyāmaḥ samāhitāḥ / (14.1) Par.?

yāvan nādhigamiṣyāmas tava bhāryāpahāriṇam // (14.2) Par.?

na cet sāmnā pradāsyanti patnīṃ te tridaśeśvarāḥ / (15.1) Par.?

kosalendra tataḥ paścāt prāptakālaṃ kariṣyasi // (15.2) Par.?

śīlena sāmnā vinayena sītāṃ nayena na prāpsyasi cen narendra / (16.1) Par.?

tataḥ samutsādaya hemapuṅkhair mahendravajrapratimaiḥ śaraughaiḥ // (16.2) Par.?