Texts

tau tu tatra sthitau dṛṣṭvā bhrātarau rāmalakṣmaṇau / (1.1) Par.?

bāhupāśaparikṣiptau kabandho vākyam abravīt // (1.2) Par.?

tiṣṭhataḥ kiṃ nu māṃ dṛṣṭvā kṣudhārtaṃ kṣatriyarṣabhau / (2.1) Par.?

āhārārthaṃ tu saṃdiṣṭau daivena gatacetasau // (2.2) Par.?

tac chrutvā lakṣmaṇo vākyaṃ prāptakālaṃ hitaṃ tadā / (3.1) Par.?

uvācārtisamāpanno vikrame kṛtaniścayaḥ // (3.2) Par.?

tvāṃ ca māṃ ca purā tūrṇam ādatte rākṣasādhamaḥ / (4.1) Par.?

tasmād asibhyām asyāśu bāhū chindāvahai gurū // (4.2) Par.?

tatas tau deśakālajñau khaḍgābhyām eva rāghavau / (5.1) Par.?

achindatāṃ susaṃhṛṣṭau bāhū tasyāṃsadeśayoḥ // (5.2) Par.?

dakṣiṇo dakṣiṇaṃ bāhum asaktam asinā tataḥ / (6.1) Par.?

cicheda rāmo vegena savyaṃ vīras tu lakṣmaṇaḥ // (6.2) Par.?

sa papāta mahābāhuś chinnabāhur mahāsvanaḥ / (7.1) Par.?

khaṃ ca gāṃ ca diśaś caiva nādayañ jalado yathā // (7.2) Par.?

sa nikṛttau bhujau dṛṣṭvā śoṇitaughapariplutaḥ / (8.1) Par.?

dīnaḥ papraccha tau vīrau kau yuvām iti dānavaḥ // (8.2) Par.?

iti tasya bruvāṇasya lakṣmaṇaḥ śubhalakṣaṇaḥ / (9.1) Par.?

śaśaṃsa tasya kākutsthaṃ kabandhasya mahābalaḥ // (9.2) Par.?

ayam ikṣvākudāyādo rāmo nāma janaiḥ śrutaḥ / (10.1) Par.?

asyaivāvarajaṃ viddhi bhrātaraṃ māṃ ca lakṣmaṇam // (10.2) Par.?

asya devaprabhāvasya vasato vijane vane / (11.1) Par.?

rakṣasāpahṛtā bhāryā yām icchantāv ihāgatau // (11.2) Par.?

tvaṃ tu ko vā kimarthaṃ vā kabandha sadṛśo vane / (12.1) Par.?

āsyenorasi dīptena bhagnajaṅgho viceṣṭase // (12.2) Par.?

evam uktaḥ kabandhas tu lakṣmaṇenottaraṃ vacaḥ / (13.1) Par.?

uvāca paramaprītas tad indravacanaṃ smaran // (13.2) Par.?

svāgataṃ vāṃ naravyāghrau diṣṭyā paśyāmi cāpy aham / (14.1) Par.?

diṣṭyā cemau nikṛttau me yuvābhyāṃ bāhubandhanau // (14.2) Par.?

virūpaṃ yac ca me rūpaṃ prāptaṃ hy avinayād yathā / (15.1) Par.?

tan me śṛṇu naravyāghra tattvataḥ śaṃsatas tava // (15.2) Par.?