Texts

Help

Select a text:
Bibliography
Select a chapter:
 (no revisions)
Show parallels  Show headlines
Use dependency labeler
Chapter id: 1781
  • Click on a sentence to show its analysis
  • Keep the mouse pointer over a lemma to show its meanings.
purā rāma mahābāho mahābalaparākrama / (1.1) Par.?
rūpam āsīn mamācintyaṃ triṣu lokeṣu viśrutam / (1.2) Par.?
yathā somasya śakrasya sūryasya ca yathā vapuḥ // (1.3) Par.?
so 'haṃ rūpam idaṃ kṛtvā lokavitrāsanaṃ mahat / (2.1) Par.?
ṛṣīn vanagatān rāma trāsayāmi tatas tataḥ // (2.2) Par.?
tataḥ sthūlaśirā nāma maharṣiḥ kopito mayā / (3.1) Par.?
saṃcinvan vividhaṃ vanyaṃ rūpeṇānena dharṣitaḥ // (3.2) Par.?
tenāham uktaḥ prekṣyaivaṃ ghoraśāpābhidhāyinā / (4.1) Par.?
etad eva nṛśaṃsaṃ te rūpam astu vigarhitam // (4.2) Par.?
sa mayā yācitaḥ kruddhaḥ śāpasyānto bhaved iti / (5.1) Par.?
abhiśāpakṛtasyeti tenedaṃ bhāṣitaṃ vacaḥ // (5.2) Par.?
yadā chittvā bhujau rāmas tvāṃ dahed vijane vane / (6.1) Par.?
tadā tvaṃ prāpsyase rūpaṃ svam eva vipulaṃ śubham // (6.2) Par.?
śriyā virājitaṃ putraṃ danos tvaṃ viddhi lakṣmaṇa / (7.1) Par.?
indrakopād idaṃ rūpaṃ prāptam evaṃ raṇājire // (7.2) Par.?
ahaṃ hi tapasogreṇa pitāmaham atoṣayam / (8.1) Par.?
dīrgham āyuḥ sa me prādāt tato māṃ vibhramo 'spṛśat // (8.2) Par.?
dīrgham āyur mayā prāptaṃ kiṃ me śakraḥ kariṣyati / (9.1) Par.?
ity evaṃ buddhim āsthāya raṇe śakram adharṣayam // (9.2) Par.?
tasya bāhupramuktena vajreṇa śataparvaṇā / (10.1) Par.?
sakthinī ca śiraś caiva śarīre saṃpraveśitam // (10.2) Par.?
sa mayā yācyamānaḥ sann ānayad yamasādanam / (11.1) Par.?
pitāmahavacaḥ satyaṃ tad astv iti mamābravīt // (11.2) Par.?
anāhāraḥ kathaṃ śakto bhagnasakthiśiromukhaḥ / (12.1) Par.?
vajreṇābhihataḥ kālaṃ sudīrgham api jīvitum // (12.2) Par.?
evam uktas tu me śakro bāhū yojanam āyatau / (13.1) Par.?
prādād āsyaṃ ca me kukṣau tīkṣṇadaṃṣṭram akalpayat // (13.2) Par.?
so 'haṃ bhujābhyāṃ dīrghābhyāṃ samākṛṣya vanecarān / (14.1) Par.?
siṃhadvipamṛgavyāghrān bhakṣayāmi samantataḥ // (14.2) Par.?
sa tu mām abravīd indro yadā rāmaḥ salakṣmaṇaḥ / (15.1) Par.?
chetsyate samare bāhū tadā svargaṃ gamiṣyasi // (15.2) Par.?
sa tvaṃ rāmo 'si bhadraṃ te nāham anyena rāghava / (16.1) Par.?
śakyo hantuṃ yathātattvam evam uktaṃ maharṣiṇā // (16.2) Par.?
ahaṃ hi matisācivyaṃ kariṣyāmi nararṣabha / (17.1) Par.?
mitraṃ caivopadekṣyāmi yuvābhyāṃ saṃskṛto 'gninā // (17.2) Par.?
evam uktas tu dharmātmā danunā tena rāghavaḥ / (18.1) Par.?
idaṃ jagāda vacanaṃ lakṣmaṇasyopaśṛṇvataḥ // (18.2) Par.?
rāvaṇena hṛtā sītā mama bhāryā yaśasvinī / (19.1) Par.?
niṣkrāntasya janasthānāt saha bhrātrā yathāsukham // (19.2) Par.?
nāmamātraṃ tu jānāmi na rūpaṃ tasya rakṣasaḥ / (20.1) Par.?
nivāsaṃ vā prabhāvaṃ vā vayaṃ tasya na vidmahe // (20.2) Par.?
śokārtānām anāthānām evaṃ viparidhāvatām / (21.1) Par.?
kāruṇyaṃ sadṛśaṃ kartum upakāre ca vartatām // (21.2) Par.?
kāṣṭhāny ānīya śuṣkāṇi kāle bhagnāni kuñjaraiḥ / (22.1) Par.?
bhakṣyāmas tvāṃ vayaṃ vīra śvabhre mahati kalpite // (22.2) Par.?
sa tvaṃ sītāṃ samācakṣva yena vā yatra vā hṛtā / (23.1) Par.?
kuru kalyāṇam atyarthaṃ yadi jānāsi tattvataḥ // (23.2) Par.?
evam uktas tu rāmeṇa vākyaṃ danur anuttamam / (24.1) Par.?
provāca kuśalo vaktuṃ vaktāram api rāghavam // (24.2) Par.?
divyam asti na me jñānaṃ nābhijānāmi maithilīm / (25.1) Par.?
yas tāṃ jñāsyati taṃ vakṣye dagdhaḥ svaṃ rūpam āsthitaḥ // (25.2) Par.?
adagdhasya hi vijñātuṃ śaktir asti na me prabho / (26.1) Par.?
rākṣasaṃ taṃ mahāvīryaṃ sītā yena hṛtā tava // (26.2) Par.?
vijñānaṃ hi mahad bhraṣṭaṃ śāpadoṣeṇa rāghava / (27.1) Par.?
svakṛtena mayā prāptaṃ rūpaṃ lokavigarhitam // (27.2) Par.?
kiṃ tu yāvan na yāty astaṃ savitā śrāntavāhanaḥ / (28.1) Par.?
tāvan mām avaṭe kṣiptvā daha rāma yathāvidhi // (28.2) Par.?
dagdhas tvayāham avaṭe nyāyena raghunandana / (29.1) Par.?
vakṣyāmi tam ahaṃ vīra yas taṃ jñāsyati rākṣasam // (29.2) Par.?
tena sakhyaṃ ca kartavyaṃ nyāyyavṛttena rāghava / (30.1) Par.?
kalpayiṣyati te prītaḥ sāhāyyaṃ laghuvikramaḥ // (30.2) Par.?
na hi tasyāsty avijñātaṃ triṣu lokeṣu rāghava / (31.1) Par.?
sarvān parisṛto lokān purā vai kāraṇāntare // (31.2) Par.?
Duration=0.1173210144043 secs.