Texts

rāmacāpavisṛṣṭena śareṇāntakareṇa tam / (1.1) Par.?

dṛṣṭvā vinihataṃ bhūmau tārā tārādhipānanā // (1.2) Par.?

sā samāsādya bhartāraṃ paryaṣvajata bhāminī / (2.1) Par.?

iṣuṇābhihataṃ dṛṣṭvā vālinaṃ kuñjaropamam // (2.2) Par.?

vānarendraṃ mahendrābhaṃ śokasaṃtaptamānasā / (3.1) Par.?

tārā tarum ivonmūlaṃ paryadevayad āturā // (3.2) Par.?

raṇe dāruṇavikrānta pravīra plavatāṃ vara / (4.1) Par.?

kiṃ dīnām apurobhāgām adya tvaṃ nābhibhāṣase // (4.2) Par.?

uttiṣṭha hariśārdūla bhajasva śayanottamam / (5.1) Par.?

naivaṃvidhāḥ śerate hi bhūmau nṛpatisattamāḥ // (5.2) Par.?

atīva khalu te kāntā vasudhā vasudhādhipa / (6.1) Par.?

gatāsur api yāṃ gātrair māṃ vihāya niṣevase // (6.2) Par.?

vyaktam anyā tvayā vīra dharmataḥ sampravartitā / (7.1) Par.?

kiṣkindheva purī ramyā svargamārge vinirmitā // (7.2) Par.?

yāny asmābhis tvayā sārdhaṃ vaneṣu madhugandhiṣu / (8.1) Par.?

vihṛtāni tvayā kāle teṣām uparamaḥ kṛtaḥ // (8.2) Par.?

nirānandā nirāśāhaṃ nimagnā śokasāgare / (9.1) Par.?

tvayi pañcatvam āpanne mahāyūthapayūthape // (9.2) Par.?

hṛdayaṃ susthiraṃ mahyaṃ dṛṣṭvā vinihataṃ bhuvi / (10.1) Par.?

yan na śokābhisaṃtaptaṃ sphuṭate 'dya sahasradhā // (10.2) Par.?

sugrīvasya tvayā bhāryā hṛtā sa ca vivāsitaḥ / (11.1) Par.?

yat tat tasya tvayā vyuṣṭiḥ prāpteyaṃ plavagādhipa // (11.2) Par.?

niḥśreyasaparā mohāt tvayā cāhaṃ vigarhitā / (12.1) Par.?

yaiṣābruvaṃ hitaṃ vākyaṃ vānarendrahitaiṣiṇī // (12.2) Par.?

kālo niḥsaṃśayo nūnaṃ jīvitāntakaras tava / (13.1) Par.?

balād yenāvapanno 'si sugrīvasyāvaśo vaśam // (13.2) Par.?

vaidhavyaṃ śokasaṃtāpaṃ kṛpaṇaṃ kṛpaṇā satī / (14.1) Par.?

aduḥkhopacitā pūrvaṃ vartayiṣyāmy anāthavat // (14.2) Par.?

lālitaś cāṅgado vīraḥ sukumāraḥ sukhocitaḥ / (15.1) Par.?

vatsyate kām avasthāṃ me pitṛvye krodhamūrchite // (15.2) Par.?

kuruṣva pitaraṃ putra sudṛṣṭaṃ dharmavatsalam / (16.1) Par.?

durlabhaṃ darśanaṃ tv asya tava vatsa bhaviṣyati // (16.2) Par.?

samāśvāsaya putraṃ tvaṃ saṃdeśaṃ saṃdiśasva ca / (17.1) Par.?

mūrdhni cainaṃ samāghrāya pravāsaṃ prasthito hy asi // (17.2) Par.?

rāmeṇa hi mahat karma kṛtaṃ tvām abhinighnatā / (18.1) Par.?

ānṛṇyaṃ tu gataṃ tasya sugrīvasya pratiśrave // (18.2) Par.?

sakāmo bhava sugrīva rumāṃ tvaṃ pratipatsyase / (19.1) Par.?

bhuṅkṣva rājyam anudvignaḥ śasto bhrātā ripus tava // (19.2) Par.?

kiṃ mām evaṃ vilapatīṃ premṇā tvaṃ nābhibhāṣase / (20.1) Par.?

imāḥ paśya varā bahvīr bhāryās te vānareśvara // (20.2) Par.?

tasyā vilapitaṃ śrutvā vānaryaḥ sarvataś ca tāḥ / (21.1) Par.?

parigṛhyāṅgadaṃ dīnaṃ duḥkhārtāḥ paricukruśuḥ // (21.2) Par.?

kim aṅgadaṃ sāṅgada vīrabāho vihāya yāsy adya cirapravāsam / (22.1) Par.?

na yuktam evaṃ guṇasaṃnikṛṣṭaṃ vihāya putraṃ priyaputra gantum // (22.2) Par.?

kim apriyaṃ te priyacāruveṣa kṛtaṃ mayā nātha sutena vā te / (23.1) Par.?

sahāyinīm adya vihāya vīra yamakṣayaṃ gacchasi durvinītam // (23.2) Par.?

yady apriyaṃ kiṃcid asaṃpradhārya kṛtaṃ mayā syāt tava dīrghabāho / (24.1) Par.?

kṣamasva me taddharivaṃśanātha vrajāmi mūrdhnā tava vīra pādau // (24.2) Par.?

tathā tu tārā karuṇaṃ rudantī bhartuḥ samīpe saha vānarībhiḥ / (25.1) Par.?

vyavasyata prāyam anindyavarṇā upopaveṣṭuṃ bhuvi yatra vālī // (25.2) Par.?