Texts

tataḥ samupajighrantī kapirājasya tanmukham / (1.1) Par.?

patiṃ lokāc cyutaṃ tārā mṛtaṃ vacanam abravīt // (1.2) Par.?

śeṣe tvaṃ viṣame duḥkham akṛtvā vacanaṃ mama / (2.1) Par.?

upalopacite vīra suduḥkhe vasudhātale // (2.2) Par.?

mattaḥ priyatarā nūnaṃ vānarendra mahī tava / (3.1) Par.?

śeṣe hi tāṃ pariṣvajya māṃ ca na pratibhāṣase // (3.2) Par.?

sugrīva eva vikrānto vīra sāhasikapriya / (4.1) Par.?

ṛkṣavānaramukhyās tvāṃ balinaṃ paryupāsate // (4.2) Par.?

eṣāṃ vilapitaṃ kṛcchram aṅgadasya ca śocataḥ / (5.1) Par.?

mama cemāṃ giraṃ śrutvā kiṃ tvaṃ na pratibudhyase // (5.2) Par.?

idaṃ tac chūraśayanaṃ yatra śeṣe hato yudhi / (6.1) Par.?

śāyitā nihatā yatra tvayaiva ripavaḥ purā // (6.2) Par.?

viśuddhasattvābhijana priyayuddha mama priya / (7.1) Par.?

mām anāthāṃ vihāyaikāṃ gatas tvam asi mānada // (7.2) Par.?

śūrāya na pradātavyā kanyā khalu vipaścitā / (8.1) Par.?

śūrabhāryāṃ hatāṃ paśya sadyo māṃ vidhavāṃ kṛtām // (8.2) Par.?

avabhagnaś ca me māno bhagnā me śāśvatī gatiḥ / (9.1) Par.?

agādhe ca nimagnāsmi vipule śokasāgare // (9.2) Par.?

aśmasāramayaṃ nūnam idaṃ me hṛdayaṃ dṛḍham / (10.1) Par.?

bhartāraṃ nihataṃ dṛṣṭvā yan nādya śatadhā gatam // (10.2) Par.?

suhṛc caiva hi bhartā ca prakṛtyā ca mama priyaḥ / (11.1) Par.?

āhave ca parākrāntaḥ śūraḥ pañcatvam āgataḥ // (11.2) Par.?

patihīnā tu yā nārī kāmaṃ bhavatu putriṇī / (12.1) Par.?

dhanadhānyaiḥ supūrṇāpi vidhavety ucyate budhaiḥ // (12.2) Par.?

svagātraprabhave vīra śeṣe rudhiramaṇḍale / (13.1) Par.?

kṛmirāgaparistome tvam evaṃ śayane yathā // (13.2) Par.?

reṇuśoṇitasaṃvītaṃ gātraṃ tava samantataḥ / (14.1) Par.?

parirabdhuṃ na śaknomi bhujābhyāṃ plavagarṣabha // (14.2) Par.?

kṛtakṛtyo 'dya sugrīvo vaire 'sminn atidāruṇe / (15.1) Par.?

yasya rāmavimuktena hṛtam ekeṣuṇā bhayam // (15.2) Par.?

śareṇa hṛdi lagnena gātrasaṃsparśane tava / (16.1) Par.?

vāryāmi tvāṃ nirīkṣantī tvayi pañcatvam āgate // (16.2) Par.?

udbabarha śaraṃ nīlas tasya gātragataṃ tadā / (17.1) Par.?

girigahvarasaṃlīnaṃ dīptam āśīviṣaṃ yathā // (17.2) Par.?

tasya niṣkṛṣyamāṇasya bāṇasya ca babhau dyutiḥ / (18.1) Par.?

astamastakasaṃruddho raśmir dinakarād iva // (18.2) Par.?

petuḥ kṣatajadhārās tu vraṇebhyas tasya sarvaśaḥ / (19.1) Par.?

tāmragairikasaṃpṛktā dhārā iva dharādharāt // (19.2) Par.?

avakīrṇaṃ vimārjantī bhartāraṃ raṇareṇunā / (20.1) Par.?

asrair nayanajaiḥ śūraṃ siṣecāstrasamāhatam // (20.2) Par.?

rudhirokṣitasarvāṅgaṃ dṛṣṭvā vinihataṃ patim / (21.1) Par.?

uvāca tārā piṅgākṣaṃ putram aṅgadam aṅganā // (21.2) Par.?

avasthāṃ paścimāṃ paśya pituḥ putra sudāruṇām / (22.1) Par.?

samprasaktasya vairasya gato 'ntaḥ pāpakarmaṇā // (22.2) Par.?

bālasūryodayatanuṃ prayāntaṃ yamasādanam / (23.1) Par.?

abhivādaya rājānaṃ pitaraṃ putra mānadam // (23.2) Par.?

evam uktaḥ samutthāya jagrāha caraṇau pituḥ / (24.1) Par.?

bhujābhyāṃ pīnavṛttābhyām aṅgado 'ham iti bruvan // (24.2) Par.?

abhivādayamānaṃ tvām aṅgadaṃ tvaṃ yathāpurā / (25.1) Par.?

dīrghāyur bhava putreti kimarthaṃ nābhibhāṣase // (25.2) Par.?

ahaṃ putrasahāyā tvām upāse gatacetanam / (26.1) Par.?

siṃhena nihataṃ sadyo gauḥ savatseva govṛṣam // (26.2) Par.?

iṣṭvā saṃgrāmayajñena nānāpraharaṇāmbhasā / (27.1) Par.?

asminn avabhṛthe snātaḥ kathaṃ patnyā mayā vinā // (27.2) Par.?

yā dattā devarājena tava tuṣṭena saṃyuge / (28.1) Par.?

śātakumbhamayīṃ mālāṃ tāṃ te paśyāmi neha kim // (28.2) Par.?

rājaśrīr na jahāti tvāṃ gatāsum api mānada / (29.1) Par.?

sūryasyāvartamānasya śailarājam iva prabhā // (29.2) Par.?

na me vacaḥ pathyam idaṃ tvayā kṛtaṃ na cāsmi śaktā hi nivāraṇe tava / (30.1) Par.?

hatā saputrāsmi hatena saṃyuge saha tvayā śrīr vijahāti mām iha // (30.2) Par.?