Texts

viśeṣeṇa tu sugrīvo hanumatyartham uktavān / (1.1) Par.?

sa hi tasmin hariśreṣṭhe niścitārtho 'rthasādhane // (1.2) Par.?

na bhūmau nāntarikṣe vā nāmbare nāmarālaye / (2.1) Par.?

nāpsu vā gatisaṃgaṃ te paśyāmi haripuṃgava // (2.2) Par.?

sāsurāḥ sahagandharvāḥ sanāganaradevatāḥ / (3.1) Par.?

viditāḥ sarvalokās te sasāgaradharādharāḥ // (3.2) Par.?

gatir vegaś ca tejaś ca lāghavaṃ ca mahākape / (4.1) Par.?

pitus te sadṛśaṃ vīra mārutasya mahaujasaḥ // (4.2) Par.?

tejasā vāpi te bhūtaṃ samaṃ bhuvi na vidyate / (5.1) Par.?

tad yathā labhyate sītā tattvam evopapādaya // (5.2) Par.?

tvayy eva hanumann asti balaṃ buddhiḥ parākramaḥ / (6.1) Par.?

deśakālānuvṛttaś ca nayaś ca nayapaṇḍita // (6.2) Par.?

tataḥ kāryasamāsaṅgam avagamya hanūmati / (7.1) Par.?

viditvā hanumantaṃ ca cintayāmāsa rāghavaḥ // (7.2) Par.?

sarvathā niścitārtho 'yaṃ hanūmati harīśvaraḥ / (8.1) Par.?

niścitārthataraś cāpi hanūmān kāryasādhane // (8.2) Par.?

tad evaṃ prasthitasyāsya parijñātasya karmabhiḥ / (9.1) Par.?

bhartrā parigṛhītasya dhruvaḥ kāryaphalodayaḥ // (9.2) Par.?

taṃ samīkṣya mahātejā vyavasāyottaraṃ harim / (10.1) Par.?

kṛtārtha iva saṃvṛttaḥ prahṛṣṭendriyamānasaḥ // (10.2) Par.?

dadau tasya tataḥ prītaḥ svanāmāṅkopaśobhitam / (11.1) Par.?

aṅgulīyam abhijñānaṃ rājaputryāḥ paraṃtapaḥ // (11.2) Par.?

anena tvāṃ hariśreṣṭha cihnena janakātmajā / (12.1) Par.?

matsakāśād anuprāptam anudvignānupaśyati // (12.2) Par.?

vyavasāyaś ca te vīra sattvayuktaś ca vikramaḥ / (13.1) Par.?

sugrīvasya ca saṃdeśaḥ siddhiṃ kathayatīva me // (13.2) Par.?

sa tad gṛhya hariśreṣṭhaḥ sthāpya mūrdhni kṛtāñjaliḥ / (14.1) Par.?

vanditvā caraṇau caiva prasthitaḥ plavagottamaḥ // (14.2) Par.?

sa tat prakarṣan hariṇāṃ balaṃ mahad babhūva vīraḥ pavanātmajaḥ kapiḥ / (15.1) Par.?

gatāmbude vyomni viśuddhamaṇḍalaḥ śaśīva nakṣatragaṇopaśobhitaḥ // (15.2) Par.?

atibala balam āśritas tavāhaṃ harivaravikrama vikramair analpaiḥ / (16.1) Par.?

pavanasuta yathābhigamyate sā janakasutā hanumaṃs tathā kuruṣva // (16.2) Par.?