Texts

tataḥ sa madhyaṃ gatam aṃśumantaṃ jyotsnāvitānaṃ mahad udvamantam / (1.1) Par.?

dadarśa dhīmān divi bhānumantaṃ goṣṭhe vṛṣaṃ mattam iva bhramantam // (1.2) Par.?

lokasya pāpāni vināśayantaṃ mahodadhiṃ cāpi samedhayantam / (2.1) Par.?

bhūtāni sarvāṇi virājayantaṃ dadarśa śītāṃśum athābhiyāntam // (2.2) Par.?

yā bhāti lakṣmīr bhuvi mandarasthā tathā pradoṣeṣu ca sāgarasthā / (3.1) Par.?

tathaiva toyeṣu ca puṣkarasthā rarāja sā cāruniśākarasthā // (3.2) Par.?

haṃso yathā rājatapañjarasthaḥ siṃho yathā mandarakandarasthaḥ / (4.1) Par.?

vīro yathā garvitakuñjarasthaś candro 'pi babhrāja tathāmbarasthaḥ // (4.2) Par.?

sthitaḥ kakudmān iva tīkṣṇaśṛṅgo mahācalaḥ śveta ivoccaśṛṅgaḥ / (5.1) Par.?

hastīva jāmbūnadabaddhaśṛṅgo vibhāti candraḥ paripūrṇaśṛṅgaḥ // (5.2) Par.?

prakāśacandrodayanaṣṭadoṣaḥ pravṛddharakṣaḥpiśitāśadoṣaḥ / (6.1) Par.?

rāmābhirāmeritacittadoṣaḥ svargaprakāśo bhagavān pradoṣaḥ // (6.2) Par.?

tantrīsvanāḥ karṇasukhāḥ pravṛttāḥ svapanti nāryaḥ patibhiḥ suvṛttāḥ / (7.1) Par.?

naktaṃcarāścāpi tathā pravṛttā vihartum atyadbhutaraudravṛttāḥ // (7.2) Par.?

mattapramattāni samākulāni rathāśvabhadrāsanasaṃkulāni / (8.1) Par.?

vīraśriyā cāpi samākulāni dadarśa dhīmān sa kapiḥ kulāni // (8.2) Par.?

parasparaṃ cādhikam ākṣipanti bhujāṃśca pīnān adhivikṣipanti / (9.1) Par.?

mattapralāpān adhivikṣipanti mattāni cānyonyam adhikṣipanti // (9.2) Par.?

rakṣāṃsi vakṣāṃsi ca vikṣipanti gātrāṇi kāntāsu ca vikṣipanti / (10.1) Par.?

dadarśa kāntāśca samālapanti tathāparāstatra punaḥ svapanti // (10.2) Par.?

mahāgajaiś cāpi tathā nadadbhiḥ supūjitaiś cāpi tathā susadbhiḥ / (11.1) Par.?

rarāja vīraiśca viniḥśvasadbhir hrado bhujaṅgair iva niḥśvasadbhiḥ // (11.2) Par.?

buddhipradhānān rucirābhidhānān saṃśraddadhānāñ jagataḥ pradhānān / (12.1) Par.?

nānāvidhānān rucirābhidhānān dadarśa tasyāṃ puri yātudhānān // (12.2) Par.?

nananda dṛṣṭvā sa ca tān surūpān nānāguṇān ātmaguṇānurūpān / (13.1) Par.?

vidyotamānān sa ca tān surūpān dadarśa kāṃścic ca punar virūpān // (13.2) Par.?

tato varārhāḥ suviśuddhabhāvās teṣāṃ striyastatra mahānubhāvāḥ / (14.1) Par.?

priyeṣu pāneṣu ca saktabhāvā dadarśa tārā iva suprabhāvāḥ // (14.2) Par.?

śriyā jvalantīstrapayopagūḍhā niśīthakāle ramaṇopagūḍhāḥ / (15.1) Par.?

dadarśa kāścit pramadopagūḍhā yathā vihaṃgāḥ kusumopagūḍhāḥ // (15.2) Par.?

anyāḥ punar harmyatalopaviṣṭās tatra priyāṅkeṣu sukhopaviṣṭāḥ / (16.1) Par.?

bhartuḥ priyā dharmaparā niviṣṭā dadarśa dhīmān madanābhiviṣṭāḥ // (16.2) Par.?

aprāvṛtāḥ kāñcanarājivarṇāḥ kāścit parārdhyāstapanīyavarṇāḥ / (17.1) Par.?

punaśca kāścicchaśalakṣmavarṇāḥ kāntaprahīṇā rucirāṅgavarṇāḥ // (17.2) Par.?

tataḥ priyān prāpya mano'bhirāmān suprītiyuktāḥ prasamīkṣya rāmāḥ / (18.1) Par.?

gṛheṣu hṛṣṭāḥ paramābhirāmā haripravīraḥ sa dadarśa rāmāḥ // (18.2) Par.?

candraprakāśāśca hi vaktramālā vakrākṣipakṣmāśca sunetramālāḥ / (19.1) Par.?

vibhūṣaṇānāṃ ca dadarśa mālāḥ śatahradānām iva cārumālāḥ // (19.2) Par.?

na tveva sītāṃ paramābhijātāṃ pathi sthite rājakule prajātām / (20.1) Par.?

latāṃ praphullām iva sādhujātāṃ dadarśa tanvīṃ manasābhijātām // (20.2) Par.?

sanātane vartmani saṃniviṣṭāṃ rāmekṣaṇīṃ tāṃ madanābhiviṣṭām / (21.1) Par.?

bhartur manaḥ śrīmad anupraviṣṭāṃ strībhyo varābhyaśca sadā viśiṣṭām // (21.2) Par.?

uṣṇārditāṃ sānusṛtāsrakaṇṭhīṃ purā varārhottamaniṣkakaṇṭhīm / (22.1) Par.?

sujātapakṣmām abhiraktakaṇṭhīṃ vane pravṛttām iva nīlakaṇṭhīm // (22.2) Par.?

avyaktalekhām iva candralekhāṃ pāṃsupradigdhām iva hemalekhām / (23.1) Par.?

kṣataprarūḍhām iva bāṇalekhāṃ vāyuprabhinnām iva meghalekhām // (23.2) Par.?

sītām apaśyanmanujeśvarasya rāmasya patnīṃ vadatāṃ varasya / (24.1) Par.?

babhūva duḥkhābhihataścirasya plavaṃgamo manda ivācirasya // (24.2) Par.?