Texts

tasminn eva tataḥ kāle rājaputrī tvaninditā / (1.1) Par.?

rūpayauvanasampannaṃ bhūṣaṇottamabhūṣitam // (1.2) Par.?

tato dṛṣṭvaiva vaidehī rāvaṇaṃ rākṣasādhipam / (2.1) Par.?

prāvepata varārohā pravāte kadalī yathā // (2.2) Par.?

ūrubhyām udaraṃ chādya bāhubhyāṃ ca payodharau / (3.1) Par.?

upaviṣṭā viśālākṣī rudantī varavarṇinī // (3.2) Par.?

daśagrīvastu vaidehīṃ rakṣitāṃ rākṣasīgaṇaiḥ / (4.1) Par.?

dadarśa dīnāṃ duḥkhārtaṃ nāvaṃ sannām ivārṇave // (4.2) Par.?

asaṃvṛtāyām āsīnāṃ dharaṇyāṃ saṃśitavratām / (5.1) Par.?

chinnāṃ prapatitāṃ bhūmau śākhām iva vanaspateḥ / (5.2) Par.?

malamaṇḍanadigdhāṅgīṃ maṇḍanārhām amaṇḍitām // (5.3) Par.?

samīpaṃ rājasiṃhasya rāmasya viditātmanaḥ / (6.1) Par.?

saṃkalpahayasaṃyuktair yāntīm iva manorathaiḥ // (6.2) Par.?

śuṣyantīṃ rudatīm ekāṃ dhyānaśokaparāyaṇām / (7.1) Par.?

duḥkhasyāntam apaśyantīṃ rāmāṃ rāmam anuvratām // (7.2) Par.?

veṣṭamānām athāviṣṭāṃ pannagendravadhūm iva / (8.1) Par.?

dhūpyamānāṃ graheṇeva rohiṇīṃ dhūmaketunā // (8.2) Par.?

vṛttaśīle kule jātām ācāravati dhārmike / (9.1) Par.?

punaḥ saṃskāram āpannāṃ jātām iva ca duṣkule // (9.2) Par.?

sannām iva mahākīrtiṃ śraddhām iva vimānitām / (10.1) Par.?

prajñām iva parikṣīṇām āśāṃ pratihatām iva // (10.2) Par.?

āyatīm iva vidhvastām ājñāṃ pratihatām iva / (11.1) Par.?

dīptām iva diśaṃ kāle pūjām apahṛtām iva // (11.2) Par.?

padminīm iva vidhvastāṃ hataśūrāṃ camūm iva / (12.1) Par.?

prabhām iva tapodhvastām upakṣīṇām ivāpagām // (12.2) Par.?

vedīm iva parāmṛṣṭāṃ śāntām agniśikhām iva / (13.1) Par.?

paurṇamāsīm iva niśāṃ rāhugrastendumaṇḍalām // (13.2) Par.?

utkṛṣṭaparṇakamalāṃ vitrāsitavihaṃgamām / (14.1) Par.?

hastihastaparāmṛṣṭām ākulāṃ padminīm iva // (14.2) Par.?

patiśokāturāṃ śuṣkāṃ nadīṃ visrāvitām iva / (15.1) Par.?

parayā mṛjayā hīnāṃ kṛṣṇapakṣe niśām iva // (15.2) Par.?

sukumārīṃ sujātāṅgīṃ ratnagarbhagṛhocitām / (16.1) Par.?

tapyamānām ivoṣṇena mṛṇālīm aciroddhṛtām // (16.2) Par.?

gṛhītāmālitāṃ stambhe yūthapena vinākṛtām / (17.1) Par.?

niḥśvasantīṃ suduḥkhārtāṃ gajarājavadhūm iva // (17.2) Par.?

ekayā dīrghayā veṇyā śobhamānām ayatnataḥ / (18.1) Par.?

nīlayā nīradāpāye vanarājyā mahīm iva // (18.2) Par.?

upavāsena śokena dhyānena ca bhayena ca / (19.1) Par.?

parikṣīṇāṃ kṛśāṃ dīnām alpāhārāṃ tapodhanām // (19.2) Par.?

āyācamānāṃ duḥkhārtāṃ prāñjaliṃ devatām iva / (20.1) Par.?

bhāvena raghumukhyasya daśagrīvaparābhavam // (20.2) Par.?

samīkṣamāṇāṃ rudatīm aninditāṃ supakṣmatāmrāyataśuklalocanām / (21.1) Par.?

anuvratāṃ rāmam atīva maithilīṃ pralobhayāmāsa vadhāya rāvaṇaḥ // (21.2) Par.?