Texts

saṃdiṣṭo rākṣasendreṇa prahastasya suto balī / (1.1) Par.?

jambumālī mahādaṃṣṭro nirjagāma dhanurdharaḥ // (1.2) Par.?

raktamālyāmbaradharaḥ sragvī rucirakuṇḍalaḥ / (2.1) Par.?

mahān vivṛttanayanaścaṇḍaḥ samaradurjayaḥ // (2.2) Par.?

dhanuḥ śakradhanuḥprakhyaṃ mahad rucirasāyakam / (3.1) Par.?

visphārayāṇo vegena vajrāśanisamasvanam // (3.2) Par.?

tasya visphāraghoṣeṇa dhanuṣo mahatā diśaḥ / (4.1) Par.?

pradiśaśca nabhaścaiva sahasā samapūryata // (4.2) Par.?

rathena kharayuktena tam āgatam udīkṣya saḥ / (5.1) Par.?

hanūmān vegasampanno jaharṣa ca nanāda ca // (5.2) Par.?

taṃ toraṇaviṭaṅkasthaṃ hanūmantaṃ mahākapim / (6.1) Par.?

jambumālī mahābāhur vivyādha niśitaiḥ śaraiḥ // (6.2) Par.?

ardhacandreṇa vadane śirasyekena karṇinā / (7.1) Par.?

bāhvor vivyādha nārācair daśabhistaṃ kapīśvaram // (7.2) Par.?

tasya tacchuśubhe tāmraṃ śareṇābhihataṃ mukham / (8.1) Par.?

śaradīvāmbujaṃ phullaṃ viddhaṃ bhāskararaśminā // (8.2) Par.?

cukopa bāṇābhihato rākṣasasya mahākapiḥ / (9.1) Par.?

tataḥ pārśve 'tivipulāṃ dadarśa mahatīṃ śilām // (9.2) Par.?

tarasā tāṃ samutpāṭya cikṣepa balavad balī / (10.1) Par.?

tāṃ śarair daśabhiḥ kruddhastāḍayāmāsa rākṣasaḥ // (10.2) Par.?

vipannaṃ karma tad dṛṣṭvā hanūmāṃścaṇḍavikramaḥ / (11.1) Par.?

sālaṃ vipulam utpāṭya bhrāmayāmāsa vīryavān // (11.2) Par.?

bhrāmayantaṃ kapiṃ dṛṣṭvā sālavṛkṣaṃ mahābalam / (12.1) Par.?

cikṣepa subahūn bāṇāñ jambumālī mahābalaḥ // (12.2) Par.?

sālaṃ caturbhiścicheda vānaraṃ pañcabhir bhuje / (13.1) Par.?

urasyekena bāṇena daśabhistu stanāntare // (13.2) Par.?

sa śaraiḥ pūritatanuḥ krodhena mahatā vṛtaḥ / (14.1) Par.?

tam eva parighaṃ gṛhya bhrāmayāmāsa vegitaḥ // (14.2) Par.?

ativego 'tivegena bhrāmayitvā balotkaṭaḥ / (15.1) Par.?

parighaṃ pātayāmāsa jambumāler mahorasi // (15.2) Par.?

tasya caiva śiro nāsti na bāhū na ca jānunī / (16.1) Par.?

na dhanur na ratho nāśvāstatrādṛśyanta neṣavaḥ // (16.2) Par.?

sa hatastarasā tena jambumālī mahārathaḥ / (17.1) Par.?

papāta nihato bhūmau cūrṇitāṅgavibhūṣaṇaḥ // (17.2) Par.?

jambumāliṃ ca nihataṃ kiṃkarāṃśca mahābalān / (18.1) Par.?

cukrodha rāvaṇaḥ śrutvā kopasaṃraktalocanaḥ // (18.2) Par.?

sa roṣasaṃvartitatāmralocanaḥ prahastaputre nihate mahābale / (19.1) Par.?

amātyaputrān ativīryavikramān samādideśāśu niśācareśvaraḥ // (19.2) Par.?