Texts

tataḥ sa karmaṇā tasya vismito bhīmavikramaḥ / (1.1) Par.?

hanumān roṣatāmrākṣo rakṣo'dhipam avaikṣata // (1.2) Par.?

bhrājamānaṃ mahārheṇa kāñcanena virājatā / (2.1) Par.?

muktājālāvṛtenātha mukuṭena mahādyutim // (2.2) Par.?

vajrasaṃyogasaṃyuktair mahārhamaṇivigrahaiḥ / (3.1) Par.?

haimair ābharaṇaiścitrair manaseva prakalpitaiḥ // (3.2) Par.?

mahārhakṣaumasaṃvītaṃ raktacandanarūṣitam / (4.1) Par.?

svanuliptaṃ vicitrābhir vividhābhiśca bhaktibhiḥ // (4.2) Par.?

vipulair darśanīyaiśca raktākṣair bhīmadarśanaiḥ / (5.1) Par.?

dīptatīkṣṇamahādaṃṣṭraiḥ pralambadaśanacchadaiḥ // (5.2) Par.?

śirobhir daśabhir vīraṃ bhrājamānaṃ mahaujasam / (6.1) Par.?

nānāvyālasamākīrṇaiḥ śikharair iva mandaram // (6.2) Par.?

nīlāñjanacayaprakhyaṃ hāreṇorasi rājatā / (7.1) Par.?

pūrṇacandrābhavaktreṇa sabalākam ivāmbudam // (7.2) Par.?

bāhubhir baddhakeyūraiścandanottamarūṣitaiḥ / (8.1) Par.?

bhrājamānāṅgadaiḥ pīnaiḥ pañcaśīrṣair ivoragaiḥ // (8.2) Par.?

mahati sphāṭike citre ratnasaṃyogasaṃskṛte / (9.1) Par.?

uttamāstaraṇāstīrṇe upaviṣṭaṃ varāsane // (9.2) Par.?

alaṃkṛtābhir atyarthaṃ pramadābhiḥ samantataḥ / (10.1) Par.?

vālavyajanahastābhir ārāt samupasevitam // (10.2) Par.?

durdhareṇa prahastena mahāpārśvena rakṣasā / (11.1) Par.?

mantribhir mantratattvajñair nikumbhena ca mantriṇā // (11.2) Par.?

upopaviṣṭaṃ rakṣobhiścaturbhir baladarpitaiḥ / (12.1) Par.?

kṛtsnaiḥ parivṛtaṃ lokaṃ caturbhir iva sāgaraiḥ // (12.2) Par.?

mantribhir mantratattvajñair anyaiśca śubhabuddhibhiḥ / (13.1) Par.?

anvāsyamānaṃ sacivaiḥ surair iva sureśvaram // (13.2) Par.?

apaśyad rākṣasapatiṃ hanūmān atitejasam / (14.1) Par.?

viṣṭhitaṃ meruśikhare satoyam iva toyadam // (14.2) Par.?

sa taiḥ sampīḍyamāno 'pi rakṣobhir bhīmavikramaiḥ / (15.1) Par.?

vismayaṃ paramaṃ gatvā rakṣo'dhipam avaikṣata // (15.2) Par.?

bhrājamānaṃ tato dṛṣṭvā hanumān rākṣaseśvaram / (16.1) Par.?

manasā cintayāmāsa tejasā tasya mohitaḥ // (16.2) Par.?

aho rūpam aho dhairyam aho sattvam aho dyutiḥ / (17.1) Par.?

aho rākṣasarājasya sarvalakṣaṇayuktatā // (17.2) Par.?

yadyadharmo na balavān syād ayaṃ rākṣaseśvaraḥ / (18.1) Par.?

syād ayaṃ suralokasya saśakrasyāpi rakṣitā // (18.2) Par.?

tena bibhyati khalvasmāl lokāḥ sāmaradānavāḥ / (19.1) Par.?

ayaṃ hyutsahate kruddhaḥ kartum ekārṇavaṃ jagat // (19.2) Par.?

iti cintāṃ bahuvidhām akaronmatimān kapiḥ / (20.1) Par.?

dṛṣṭvā rākṣasarājasya prabhāvam amitaujasaḥ // (20.2) Par.?