Texts

Help

Select a text:
Bibliography
Select a chapter:
 (no revisions)
Show parallels  Show headlines
Use dependency labeler
Chapter id: 3618
  • Click on a sentence to show its analysis
  • Keep the mouse pointer over a lemma to show its meanings.
tataḥ śaraṃ dāśarathiḥ saṃdhāyāmitrakarśanaḥ / (1.1) Par.?
sasarja rākṣasendrāya kruddhaḥ sarpa iva śvasan // (1.2) Par.?
tasya jyātalanirghoṣaṃ sa śrutvā rāvaṇātmajaḥ / (2.1) Par.?
vivarṇavadano bhūtvā lakṣmaṇaṃ samudaikṣata // (2.2) Par.?
taṃ viṣaṇṇamukhaṃ dṛṣṭvā rākṣasaṃ rāvaṇātmajam / (3.1) Par.?
saumitriṃ yuddhasaṃsaktaṃ pratyuvāca vibhīṣaṇaḥ // (3.2) Par.?
nimittānyanupaśyāmi yānyasmin rāvaṇātmaje / (4.1) Par.?
tvara tena mahābāho bhagna eṣa na saṃśayaḥ // (4.2) Par.?
tataḥ saṃdhāya saumitriḥ śarān agniśikhopamān / (5.1) Par.?
mumoca niśitāṃstasmai sarvān iva viṣolbaṇān // (5.2) Par.?
śakrāśanisamasparśair lakṣmaṇenāhataḥ śaraiḥ / (6.1) Par.?
muhūrtam abhavanmūḍhaḥ sarvasaṃkṣubhitendriyaḥ // (6.2) Par.?
upalabhya muhūrtena saṃjñāṃ pratyāgatendriyaḥ / (7.1) Par.?
dadarśāvasthitaṃ vīraṃ vīro daśarathātmajam // (7.2) Par.?
so 'bhicakrāma saumitriṃ roṣāt saṃraktalocanaḥ / (8.1) Par.?
abravīccainam āsādya punaḥ sa paruṣaṃ vacaḥ // (8.2) Par.?
kiṃ na smarasi tad yuddhe prathame matparākramam / (9.1) Par.?
nibaddhastvaṃ saha bhrātrā yadā yudhi viceṣṭase // (9.2) Par.?
yuvā khalu mahāyuddhe śakrāśanisamaiḥ śaraiḥ / (10.1) Par.?
śāyinau prathamaṃ bhūmau visaṃjñau sapuraḥsarau // (10.2) Par.?
smṛtir vā nāsti te manye vyaktaṃ vā yamasādanam / (11.1) Par.?
gantum icchasi yasmāt tvaṃ māṃ dharṣayitum icchasi // (11.2) Par.?
yadi te prathame yuddhe na dṛṣṭo matparākramaḥ / (12.1) Par.?
adya tvāṃ darśayiṣyāmi tiṣṭhedānīṃ vyavasthitaḥ // (12.2) Par.?
ityuktvā saptabhir bāṇair abhivivyādha lakṣmaṇam / (13.1) Par.?
daśabhiśca hanūmantaṃ tīkṣṇadhāraiḥ śarottamaiḥ // (13.2) Par.?
tataḥ śaraśatenaiva suprayuktena vīryavān / (14.1) Par.?
krodhād dviguṇasaṃrabdho nirbibheda vibhīṣaṇam // (14.2) Par.?
tad dṛṣṭvendrajitaḥ karma kṛtaṃ rāmānujastadā / (15.1) Par.?
acintayitvā prahasannaitat kiṃcid iti bruvan // (15.2) Par.?
mumoca sa śarān ghorān saṃgṛhya narapuṃgavaḥ / (16.1) Par.?
abhītavadanaḥ kruddho rāvaṇiṃ lakṣmaṇo yudhi // (16.2) Par.?
naivaṃ raṇagatāḥ śūrāḥ praharanti niśācara / (17.1) Par.?
laghavaścālpavīryāśca sukhā hīme śarāstava // (17.2) Par.?
naivaṃ śūrāstu yudhyante samare jayakāṅkṣiṇaḥ / (18.1) Par.?
ityevaṃ taṃ bruvāṇastu śaravarṣair avākirat // (18.2) Par.?
tasya bāṇaistu vidhvastaṃ kavacaṃ hemabhūṣitam / (19.1) Par.?
vyaśīryata rathopasthe tārājālam ivāmbarāt // (19.2) Par.?
vidhūtavarmā nārācair babhūva sa kṛtavraṇaḥ / (20.1) Par.?
indrajit samare śūraḥ prarūḍha iva sānumān // (20.2) Par.?
abhīkṣṇaṃ niśvasantau hi yudhyetāṃ tumulaṃ yudhi / (21.1) Par.?
śarasaṃkṛttasarvāṅgau sarvato rudhirokṣitau // (21.2) Par.?
astrāṇyastravidāṃ śreṣṭhau darśayantau punaḥ punaḥ / (22.1) Par.?
śarān uccāvacākārān antarikṣe babandhatuḥ // (22.2) Par.?
vyapetadoṣam asyantau laghucitraṃ ca suṣṭhu ca / (23.1) Par.?
ubhau tu tumulaṃ ghoraṃ cakratur nararākṣasau // (23.2) Par.?
tayoḥ pṛthakpṛthag bhīmaḥ śuśruve talanisvanaḥ / (24.1) Par.?
sughorayor niṣṭanator gagane meghayor iva // (24.2) Par.?
te gātrayor nipatitā rukmapuṅkhāḥ śarā yudhi / (25.1) Par.?
asṛgdigdhā viniṣpetur viviśur dharaṇītalam // (25.2) Par.?
anyaiḥ suniśitaiḥ śastrair ākāśe saṃjaghaṭṭire / (26.1) Par.?
babhañjuścichiduścāpi tayor bāṇāḥ sahasraśaḥ // (26.2) Par.?
sa babhūva raṇe ghorastayor bāṇamayaścayaḥ / (27.1) Par.?
agnibhyām iva dīptābhyāṃ satre kuśamayaścayaḥ // (27.2) Par.?
tayoḥ kṛtavraṇau dehau śuśubhāte mahātmanoḥ / (28.1) Par.?
sapuṣpāviva niṣpattrau vane śālmalikiṃśukau // (28.2) Par.?
cakratustumulaṃ ghoraṃ saṃnipātaṃ muhur muhuḥ / (29.1) Par.?
indrajil lakṣmaṇaścaiva parasparajayaiṣiṇau // (29.2) Par.?
lakṣmaṇo rāvaṇiṃ yuddhe rāvaṇiścāpi lakṣmaṇam / (30.1) Par.?
anyonyaṃ tāvabhighnantau na śramaṃ pratyapadyatām // (30.2) Par.?
bāṇajālaiḥ śarīrasthair avagāḍhaistarasvinau / (31.1) Par.?
śuśubhāte mahāvīrau virūḍhāviva parvatau // (31.2) Par.?
tayo rudhirasiktāni saṃvṛtāni śarair bhṛśam / (32.1) Par.?
babhrājuḥ sarvagātrāṇi jvalanta iva pāvakāḥ // (32.2) Par.?
tayor atha mahān kālo vyatīyād yudhyamānayoḥ / (33.1) Par.?
na ca tau yuddhavaimukhyaṃ śramaṃ vāpyupajagmatuḥ // (33.2) Par.?
atha samarapariśramaṃ nihantuṃ samaramukheṣvajitasya lakṣmaṇasya / (34.1) Par.?
priyahitam upapādayanmahaujāḥ samaram upetya vibhīṣaṇo 'vatasthe // (34.2) Par.?
Duration=0.19485998153687 secs.