Texts

Help

Select a text:
Bibliography
Select a chapter:
 (no revisions)
Show parallels  Show headlines
Use dependency labeler
Chapter id: 4241
  • Click on a sentence to show its analysis
  • Keep the mouse pointer over a lemma to show its meanings.
tau tathā yudhyamānau tu samare rāmarāvaṇau / (1.1) Par.?
dadṛśuḥ sarvabhūtāni vismitenāntarātmanā // (1.2) Par.?
ardayantau tu samare tayostau syandanottamau / (2.1) Par.?
parasparavadhe yuktau ghorarūpau babhūvatuḥ // (2.2) Par.?
maṇḍalāni ca vīthīśca gatapratyāgatāni ca / (3.1) Par.?
darśayantau bahuvidhāṃ sūtau sārathyajāṃ gatim // (3.2) Par.?
ardayan rāvaṇaṃ rāmo rāghavaṃ cāpi rāvaṇaḥ / (4.1) Par.?
gativegaṃ samāpannau pravartananivartane // (4.2) Par.?
kṣipatoḥ śarajālāni tayostau syandanottamau / (5.1) Par.?
ceratuḥ saṃyugamahīṃ sāsārau jaladāviva // (5.2) Par.?
darśayitvā tadā tau tu gatiṃ bahuvidhāṃ raṇe / (6.1) Par.?
parasparasyābhimukhau punar eva ca tasthatuḥ // (6.2) Par.?
dhuraṃ dhureṇa rathayor vaktraṃ vaktreṇa vājinām / (7.1) Par.?
patākāśca patākābhiḥ sameyuḥ sthitayostadā // (7.2) Par.?
rāvaṇasya tato rāmo dhanurmuktaiḥ śitaiḥ śaraiḥ / (8.1) Par.?
caturbhiścaturo dīptān hayān pratyapasarpayat // (8.2) Par.?
sa krodhavaśam āpanno hayānām apasarpaṇe / (9.1) Par.?
mumoca niśitān bāṇān rāghavāya niśācaraḥ // (9.2) Par.?
so 'tividdho balavatā daśagrīveṇa rāghavaḥ / (10.1) Par.?
jagāma na vikāraṃ ca na cāpi vyathito 'bhavat // (10.2) Par.?
cikṣepa ca punar bāṇān vajrapātasamasvanān / (11.1) Par.?
sārathiṃ vajrahastasya samuddiśya niśācaraḥ // (11.2) Par.?
mātalestu mahāvegāḥ śarīre patitāḥ śarāḥ / (12.1) Par.?
na sūkṣmam api saṃmohaṃ vyathāṃ vā pradadur yudhi // (12.2) Par.?
tayā dharṣaṇayā kruddho mātaler na tathātmanaḥ / (13.1) Par.?
cakāra śarajālena rāghavo vimukhaṃ ripum // (13.2) Par.?
viṃśatiṃ triṃśataṃ ṣaṣṭiṃ śataśo 'tha sahasraśaḥ / (14.1) Par.?
mumoca rāghavo vīraḥ sāyakān syandane ripoḥ // (14.2) Par.?
gadānāṃ musalānāṃ ca parighāṇāṃ ca nisvanaiḥ / (15.1) Par.?
śarāṇāṃ puṅkhavātaiśca kṣubhitāḥ saptasāgarāḥ // (15.2) Par.?
kṣubdhānāṃ sāgarāṇāṃ ca pātālatalavāsinaḥ / (16.1) Par.?
vyathitāḥ pannagāḥ sarve dānavāśca sahasraśaḥ // (16.2) Par.?
cakampe medinī kṛtsnā saśailavanakānanā / (17.1) Par.?
bhāskaro niṣprabhaścābhūnna vavau cāpi mārutaḥ // (17.2) Par.?
tato devāḥ sagandharvāḥ siddhāśca paramarṣayaḥ / (18.1) Par.?
cintām āpedire sarve sakiṃnaramahoragāḥ // (18.2) Par.?
svasti gobrāhmaṇebhyo 'stu lokāstiṣṭhantu śāśvatāḥ / (19.1) Par.?
jayatāṃ rāghavaḥ saṃkhye rāvaṇaṃ rākṣaseśvaram // (19.2) Par.?
tataḥ kruddho mahābāhū raghūṇāṃ kīrtivardhanaḥ / (20.1) Par.?
saṃdhāya dhanuṣā rāmaḥ kṣuram āśīviṣopamam / (20.2) Par.?
rāvaṇasya śiro 'chindacchrīmajjvalitakuṇḍalam // (20.3) Par.?
tacchiraḥ patitaṃ bhūmau dṛṣṭaṃ lokaistribhistadā / (21.1) Par.?
tasyaiva sadṛśaṃ cānyad rāvaṇasyotthitaṃ śiraḥ // (21.2) Par.?
tat kṣipraṃ kṣiprahastena rāmeṇa kṣiprakāriṇā / (22.1) Par.?
dvitīyaṃ rāvaṇaśiraśchinnaṃ saṃyati sāyakaiḥ // (22.2) Par.?
chinnamātraṃ ca tacchīrṣaṃ punar anyat sma dṛśyate / (23.1) Par.?
tad apyaśanisaṃkāśaiśchinnaṃ rāmeṇa sāyakaiḥ // (23.2) Par.?
evam eva śataṃ chinnaṃ śirasāṃ tulyavarcasām / (24.1) Par.?
na caiva rāvaṇasyānto dṛśyate jīvitakṣaye // (24.2) Par.?
tataḥ sarvāstravid vīraḥ kausalyānandivardhanaḥ / (25.1) Par.?
mārgaṇair bahubhir yuktaścintayāmāsa rāghavaḥ // (25.2) Par.?
mārīco nihato yaistu kharo yaistu sudūṣaṇaḥ / (26.1) Par.?
krauñcāraṇye virādhastu kabandho daṇḍakāvane // (26.2) Par.?
ta ime sāyakāḥ sarve yuddhe pratyayikā mama / (27.1) Par.?
kiṃ nu tat kāraṇaṃ yena rāvaṇe mandatejasaḥ // (27.2) Par.?
iti cintāparaścāsīd apramattaśca saṃyuge / (28.1) Par.?
vavarṣa śaravarṣāṇi rāghavo rāvaṇorasi // (28.2) Par.?
rāvaṇo 'pi tataḥ kruddho rathastho rākṣaseśvaraḥ / (29.1) Par.?
gadāmusalavarṣeṇa rāmaṃ pratyardayad raṇe // (29.2) Par.?
devadānavayakṣāṇāṃ piśācoragarakṣasām / (30.1) Par.?
paśyatāṃ tanmahad yuddhaṃ sarvarātram avartata // (30.2) Par.?
naiva rātriṃ na divasaṃ na muhūrtaṃ na ca kṣaṇam / (31.1) Par.?
rāmarāvaṇayor yuddhaṃ virāmam upagacchati // (31.2) Par.?
Duration=0.12653398513794 secs.