Texts

sītāṃ tu rudatīṃ dṛṣṭvā ye tatra munidārakāḥ / (1.1) Par.?

prādravan yatra bhagavān āste vālmīkir agryadhīḥ // (1.2) Par.?

abhivādya muneḥ pādau muniputrā maharṣaye / (2.1) Par.?

sarve nivedayāmāsustasyāstu ruditasvanam // (2.2) Par.?

adṛṣṭapūrvā bhagavan kasyāpyeṣā mahātmanaḥ / (3.1) Par.?

patnī śrīr iva saṃmohād virauti vikṛtasvarā // (3.2) Par.?

bhagavan sādhu paśyemāṃ devatām iva khāccyutām / (4.1) Par.?

na hyenāṃ mānuṣīṃ vidmaḥ satkriyāsyāḥ prayujyatām // (4.2) Par.?

teṣāṃ tad vacanaṃ śrutvā buddhyā niścitya dharmavit / (5.1) Par.?

tapasā labdhacakṣuṣmān prādravad yatra maithilī // (5.2) Par.?

taṃ tu deśam abhipretya kiṃcit padbhyāṃ mahāmuniḥ / (6.1) Par.?

arghyam ādāya ruciraṃ jāhnavītīram āśritaḥ / (6.2) Par.?

dadarśa rāghavasyeṣṭāṃ patnīṃ sītām anāthavat // (6.3) Par.?

tāṃ sitāṃ śokabhārārtāṃ vālmīkir munipuṃgavaḥ / (7.1) Par.?

uvāca madhurāṃ vāṇīṃ hlādayann iva tejasā // (7.2) Par.?

snuṣā daśarathasya tvaṃ rāmasya mahiṣī satī / (8.1) Par.?

janakasya sutā rājñaḥ svāgataṃ te pativrate // (8.2) Par.?

āyāntyevāsi vijñātā mayā dharmasamādhinā / (9.1) Par.?

kāraṇaṃ caiva sarvaṃ me hṛdayenopalakṣitam // (9.2) Par.?

apāpāṃ vedmi sīte tvāṃ tapolabdhena cakṣuṣā / (10.1) Par.?

viśuddhabhāvā vaidehi sāmprataṃ mayi vartase // (10.2) Par.?

āśramasyāvidūre me tāpasyastapasi sthitāḥ / (11.1) Par.?

tāstvāṃ vatse yathā vatsaṃ pālayiṣyanti nityaśaḥ // (11.2) Par.?

idam arghyaṃ pratīccha tvaṃ viśrabdhā vigatajvarā / (12.1) Par.?

yathā svagṛham abhyetya viṣādaṃ caiva mā kṛthāḥ // (12.2) Par.?

śrutvā tu bhāṣitaṃ sītā muneḥ paramam adbhutam / (13.1) Par.?

śirasā vandya caraṇau tathetyāha kṛtāñjaliḥ // (13.2) Par.?

taṃ prayāntaṃ muniṃ sītā prāñjaliḥ pṛṣṭhato 'nvagāt / (14.1) Par.?

anvayād yatra tāpasyo dharmanityāḥ samāhitāḥ // (14.2) Par.?

taṃ dṛṣṭvā munim āyāntaṃ vaidehyānugataṃ tadā / (15.1) Par.?

upājagmur mudā yuktā vacanaṃ cedam abruvan // (15.2) Par.?

svāgataṃ te muniśreṣṭha cirasyāgamanaṃ prabho / (16.1) Par.?

abhivādayāmaḥ sarvāstvām ucyatāṃ kiṃ ca kurmahe // (16.2) Par.?

tāsāṃ tad vacanaṃ śrutvā vālmīkir idam abravīt / (17.1) Par.?

sīteyaṃ samanuprāptā patnī rāmasya dhīmataḥ // (17.2) Par.?

snuṣā daśarathasyaiṣā janakasya sutā satī / (18.1) Par.?

apāpā patinā tyaktā paripālyā mayā sadā // (18.2) Par.?

imāṃ bhavatyaḥ paśyantu snehena parameṇa ha / (19.1) Par.?

gauravānmama vākyasya pūjyā vo 'stu viśeṣataḥ // (19.2) Par.?

muhur muhuśca vaidehīṃ parisāntvya mahāyaśāḥ / (20.1) Par.?

svam āśramaṃ śiṣyavṛtaḥ punar āyānmahātapāḥ // (20.2) Par.?