Texts

kathāṃ kathayatāṃ teṣāṃ jayaṃ cākāṅkṣatāṃ śubham / (1.1) Par.?

vyatītā rajanī śīghraṃ śatrughnasya mahātmanaḥ // (1.2) Par.?

tataḥ prabhāte vimale tasmin kāle sa rākṣasaḥ / (2.1) Par.?

nirgatastu purād vīro bhakṣāhārapracoditaḥ // (2.2) Par.?

etasminn antare śūraḥ śatrughno yamunāṃ nadīm / (3.1) Par.?

tīrtvā madhupuradvāri dhanuṣpāṇir atiṣṭhata // (3.2) Par.?

tato 'rdhadivase prāpte krūrakarmā sa rākṣasaḥ / (4.1) Par.?

āgacchad bahusahasraṃ prāṇinām udvahan bharam // (4.2) Par.?

tato dadarśa śatrughnaṃ sthitaṃ dvāri dhṛtāyudham / (5.1) Par.?

tam uvāca tato rakṣaḥ kim anena kariṣyasi // (5.2) Par.?

īdṛśānāṃ sahasrāṇi sāyudhānāṃ narādhama / (6.1) Par.?

bhakṣitāni mayā roṣāt kālam ākāṅkṣase nu kim // (6.2) Par.?

āhāraścāpyasaṃpūrṇo mamāyaṃ puruṣādhama / (7.1) Par.?

svayaṃ praviṣṭo nu mukhaṃ katham āsādya durmate // (7.2) Par.?

tasyaivaṃ bhāṣamāṇasya hasataśca muhur muhuḥ / (8.1) Par.?

śatrughno vīryasampanno roṣād aśrūṇyavartayat // (8.2) Par.?

tasya roṣābhibhūtasya śatrughnasya mahātmanaḥ / (9.1) Par.?

tejomayā marīcyastu sarvagātrair viniṣpatan // (9.2) Par.?

uvāca ca susaṃkruddhaḥ śatrughnastaṃ niśācaram / (10.1) Par.?

yoddhum icchāmi durbuddhe dvandvayuddhaṃ tvayā saha // (10.2) Par.?

putro daśarathasyāhaṃ bhrātā rāmasya dhīmataḥ / (11.1) Par.?

śatrughno nāma śatrughno vadhākāṅkṣī tavāgataḥ // (11.2) Par.?

tasya me yuddhakāmasya dvandvayuddhaṃ pradīyatām / (12.1) Par.?

śatrustvaṃ sarvajīvānāṃ na me jīvan gamiṣyasi // (12.2) Par.?

tasmiṃstathā bruvāṇe tu rākṣasaḥ prahasann iva / (13.1) Par.?

pratyuvāca naraśreṣṭhaṃ diṣṭyā prāpto 'si durmate // (13.2) Par.?

mama mātṛṣvasur bhrātā rāvaṇo nāma rākṣasaḥ / (14.1) Par.?

hato rāmeṇa durbuddhe strīhetoḥ puruṣādhama // (14.2) Par.?

tacca sarvaṃ mayā kṣāntaṃ rāvaṇasya kulakṣayam / (15.1) Par.?

avajñāṃ purataḥ kṛtvā mayā yūyaṃ viśeṣataḥ // (15.2) Par.?

na hatāśca hi me sarve paribhūtāstṛṇaṃ yathā / (16.1) Par.?

bhūtaścaiva bhaviṣyāśca yūyaṃ ca puruṣādhamāḥ // (16.2) Par.?

tasya te yuddhakāmasya yuddhaṃ dāsyāmi durmate / (17.1) Par.?

īpsitaṃ yādṛśaṃ tubhyaṃ sajjaye yāvad āyudham // (17.2) Par.?

tam uvācātha śatrughnaḥ kva me jīvan gamiṣyasi / (18.1) Par.?

durbalo 'pyāgataḥ śatrur na moktavyaḥ kṛtātmanā // (18.2) Par.?

yo hi viklavayā buddhyā prasaraṃ śatrave dadau / (19.1) Par.?

sa hato mandabuddhitvād yathā kāpuruṣastathā // (19.2) Par.?