Texts

vimṛśya ca tato rāmo vayasyam akutobhayam / (1.1) Par.?

pratardanaṃ kāśipatiṃ pariṣvajyedam abravīt // (1.2) Par.?

darśitā bhavatā prītir darśitaṃ sauhṛdaṃ param / (2.1) Par.?

udyogaśca kṛto rājan bharatena tvayā saha // (2.2) Par.?

tad bhavān adya kāśeyīṃ purīṃ vārāṇasīṃ vraja / (3.1) Par.?

ramaṇīyāṃ tvayā guptāṃ suprākārāṃ sutoraṇām // (3.2) Par.?

etāvad uktvā utthāya kākutsthaḥ paramāsanāt / (4.1) Par.?

paryaṣvajata dharmātmā nirantaram urogatam // (4.2) Par.?

visṛjya taṃ vayasyaṃ sa svāgatān pṛthivīpatīn / (5.1) Par.?

prahasan rāghavo vākyam uvāca madhurākṣaram // (5.2) Par.?

bhavatāṃ prītir avyagrā tejasā parirakṣitā / (6.1) Par.?

dharmaśca niyato nityaṃ satyaṃ ca bhavatāṃ sadā // (6.2) Par.?

yuṣmākaṃ ca prabhāvena tejasā ca mahātmanām / (7.1) Par.?

hato durātmā durbuddhī rāvaṇo rākṣasādhipaḥ // (7.2) Par.?

hetumātram ahaṃ tatra bhavatāṃ tejasāṃ hataḥ / (8.1) Par.?

rāvaṇaḥ sagaṇo yuddhe saputraḥ sahabāndhavaḥ // (8.2) Par.?

bhavantaśca samānītā bharatena mahātmanā / (9.1) Par.?

śrutvā janakarājasya kānane tanayāṃ hṛtām // (9.2) Par.?

udyuktānāṃ ca sarveṣāṃ pārthivānāṃ mahātmanām / (10.1) Par.?

kālo hyatītaḥ sumahān gamane rocatāṃ matiḥ // (10.2) Par.?

pratyūcustaṃ ca rājāno harṣeṇa mahatānvitāḥ / (11.1) Par.?

diṣṭyā tvaṃ vijayī rāma rājyaṃ cāpi pratiṣṭhitam // (11.2) Par.?

diṣṭyā pratyāhṛtā sītā diṣṭyā śatruḥ parājitaḥ / (12.1) Par.?

eṣa naḥ paramaḥ kāma eṣā naḥ kīrtir uttamā // (12.2) Par.?

yat tvāṃ vijayinaṃ rāma paśyāmo hataśātravam / (13.1) Par.?

upapannaṃ ca kākutstha yat tvam asmān praśaṃsasi // (13.2) Par.?

praśaṃsārhā hi jānanti praśaṃsāṃ vaktum īdṛśīm / (14.1) Par.?

āpṛcchāmo gamiṣyāmo hṛdistho naḥ sadā bhavān / (14.2) Par.?

bhavecca te mahārāja prītir asmāsu nityadā // (14.3) Par.?