Texts

tathā vṛtravadhaṃ sarvam akhilena sa lakṣmaṇaḥ / (1.1) Par.?

kathayitvā naraśreṣṭhaḥ kathāśeṣam upākramat // (1.2) Par.?

tato hate mahāvīrye vṛtre devabhayaṃkare / (2.1) Par.?

brahmahatyāvṛtaḥ śakraḥ saṃjñāṃ lebhe na vṛtrahā // (2.2) Par.?

so 'ntam āśritya lokānāṃ naṣṭasaṃjño vicetanaḥ / (3.1) Par.?

kālaṃ tatrāvasat kaṃcid veṣṭamāno yathoragaḥ // (3.2) Par.?

atha naṣṭe sahasrākṣe udvignam abhavajjagat / (4.1) Par.?

bhūmiśca dhvastasaṃkāśā niḥsnehā śuṣkakānanā // (4.2) Par.?

niḥsrotasaścāmbuvāhā hradāśca saritastathā / (5.1) Par.?

saṃkṣobhaścaiva sattvānām anāvṛṣṭikṛto 'bhavat // (5.2) Par.?

kṣīyamāṇe tu loke 'smin saṃbhrāntamanasaḥ surāḥ / (6.1) Par.?

yad uktaṃ viṣṇunā pūrvaṃ taṃ yajñaṃ samupānayan // (6.2) Par.?

tataḥ sarve suragaṇāḥ sopādhyāyāḥ saharṣibhiḥ / (7.1) Par.?

taṃ deśaṃ sahitā jagmur yatrendro bhayamohitaḥ // (7.2) Par.?

te tu dṛṣṭvā sahasrākṣaṃ mohitaṃ brahmahatyayā / (8.1) Par.?

taṃ puraskṛtya deveśam aśvamedhaṃ pracakrire // (8.2) Par.?

tato 'śvamedhaḥ sumahān mahendrasya mahātmanaḥ / (9.1) Par.?

vavṛdhe brahmahatyāyāḥ pāvanārthaṃ nareśvara // (9.2) Par.?

tato yajñasamāptau tu brahmahatyā mahātmanaḥ / (10.1) Par.?

abhigamyābravīd vākyaṃ kva me sthānaṃ vidhāsyatha // (10.2) Par.?

te tām ūcustato devāstuṣṭāḥ prītisamanvitāḥ / (11.1) Par.?

caturdhā vibhajātmānam ātmanaiva durāsade // (11.2) Par.?

devānāṃ bhāṣitaṃ śrutvā brahmahatyā mahātmanām / (12.1) Par.?

saṃnidhau sthānam anyatra varayāmāsa durvasā // (12.2) Par.?

ekenāṃśena vatsyāmi pūrṇodāsu nadīṣu vai / (13.1) Par.?

dvitīyena tu vṛkṣeṣu satyam etad bravīmi vaḥ // (13.2) Par.?

yo 'yam aṃśastṛtīyo me strīṣu yauvanaśāliṣu / (14.1) Par.?

trirātraṃ darpapūrṇāsu vasiṣye darpaghātinī // (14.2) Par.?

hantāro brāhmaṇān ye tu prekṣāpūrvam adūṣakān / (15.1) Par.?

tāṃścaturthena bhāgena saṃśrayiṣye surarṣabhāḥ // (15.2) Par.?

pratyūcustāṃ tato devā yathā vadasi durvase / (16.1) Par.?

tathā bhavatu tat sarvaṃ sādhayasva yathepsitam // (16.2) Par.?

tataḥ prītyānvitā devāḥ sahasrākṣaṃ vavandire / (17.1) Par.?

vijvaraḥ pūtapāpmā ca vāsavaḥ samapadyata // (17.2) Par.?

praśāntaṃ ca jagat sarvaṃ sahasrākṣe pratiṣṭhite / (18.1) Par.?

yajñaṃ cādbhutasaṃkāśaṃ tadā śakro 'bhyapūjayat // (18.2) Par.?

īdṛśo hyaśvamedhasya prabhāvo raghunandana / (19.1) Par.?

yajasva sumahābhāga hayamedhena pārthiva // (19.2) Par.?