Texts

tatra tāṃ rajanīm uṣya gomatyāṃ raghunandanaḥ / (1.1) Par.?

prabhāte punar utthāya lakṣmaṇaḥ prayayau tadā // (1.2) Par.?

tato 'rdhadivase prāpte praviveśa mahārathaḥ / (2.1) Par.?

ayodhyāṃ ratnasampūrṇāṃ hṛṣṭapuṣṭajanāvṛtām // (2.2) Par.?

saumitristu paraṃ dainyaṃ jagāma sumahāmatiḥ / (3.1) Par.?

rāmapādau samāsādya vakṣyāmi kim ahaṃ gataḥ // (3.2) Par.?

tasyaivaṃ cintayānasya bhavanaṃ śaśisaṃnibham / (4.1) Par.?

rājasya paramodāraṃ purastāt samadṛśyata // (4.2) Par.?

rājñastu bhavanadvāri so 'vatīrya narottamaḥ / (5.1) Par.?

avāṅmukho dīnamanāḥ praviveśānivāritaḥ // (5.2) Par.?

sa dṛṣṭvā rāghavaṃ dīnam āsīnaṃ paramāsane / (6.1) Par.?

netrābhyām aśrupūrṇābhyāṃ dadarśāgrajam agrataḥ // (6.2) Par.?

jagrāha caraṇau tasya lakṣmaṇo dīnacetanaḥ / (7.1) Par.?

uvāca dīnayā vācā prāñjaliḥ susamāhitaḥ // (7.2) Par.?

āryasyājñāṃ puraskṛtya visṛjya janakātmajām / (8.1) Par.?

gaṅgātīre yathoddiṣṭe vālmīker āśrame śubhe / (8.2) Par.?

punar asmyāgato vīra pādamūlam upāsitum // (8.3) Par.?

mā śucaḥ puruṣavyāghra kālasya gatir īdṛśī / (9.1) Par.?

tvadvidhā na hi śocanti sattvavanto manasvinaḥ // (9.2) Par.?

sarve kṣayāntā nicayāḥ patanāntāḥ samucchrayāḥ / (10.1) Par.?

saṃyogā viprayogāntā maraṇāntaṃ ca jīvitam // (10.2) Par.?

śaktastvam ātmanātmānaṃ vijetuṃ manasaiva hi / (11.1) Par.?

lokān sarvāṃśca kākutstha kiṃ punar duḥkham īdṛśam // (11.2) Par.?

nedṛśeṣu vimuhyanti tvadvidhāḥ puruṣarṣabhāḥ / (12.1) Par.?

yadarthaṃ maithilī tyaktā apavādabhayānnṛpa // (12.2) Par.?

sa tvaṃ puruṣaśārdūla dhairyeṇa susamāhitaḥ / (13.1) Par.?

tyajemāṃ durbalāṃ buddhiṃ saṃtāpaṃ mā kuruṣva ha // (13.2) Par.?

evam uktastu kākutstho lakṣmaṇena mahātmanā / (14.1) Par.?

uvāca parayā prītyā saumitriṃ mitravatsalam // (14.2) Par.?

evam etannaraśreṣṭha yathā vadasi lakṣmaṇa / (15.1) Par.?

paritoṣaśca me vīra mama kāryānuśāsane // (15.2) Par.?

nirvṛtiśca kṛtā saumya saṃtāpaśca nirākṛtaḥ / (16.1) Par.?

bhavadvākyaiḥ sumadhurair anunīto 'smi lakṣmaṇa // (16.2) Par.?