Texts

tasyāṃ rajanyāṃ vyuṣṭāyāṃ yajñavāṭagato nṛpaḥ / (1.1) Par.?

ṛṣīn sarvānmahātejāḥ śabdāpayati rāghavaḥ // (1.2) Par.?

vasiṣṭho vāmadevaśca jābālir atha kāśyapaḥ / (2.1) Par.?

viśvāmitro dīrghatapā durvāsāśca mahātapāḥ // (2.2) Par.?

agastyo 'tha tathā śaktir bhārgavaścaiva vāmanaḥ / (3.1) Par.?

mārkaṇḍeyaśca dīrghāyur maudgalyaśca mahātapāḥ // (3.2) Par.?

bhārgavaścyavanaścaiva śatānandaśca dharmavit / (4.1) Par.?

bharadvājaśca tejasvī agniputraśca suprabhaḥ // (4.2) Par.?

ete cānye ca munayo bahavaḥ saṃśitavratāḥ / (5.1) Par.?

rājānaśca naravyāghrāḥ sarva eva samāgatāḥ // (5.2) Par.?

rākṣasāśca mahāvīryā vānarāśca mahābalāḥ / (6.1) Par.?

samājagmur mahātmānaḥ sarva eva kutūhalāt // (6.2) Par.?

kṣatriyāścaiva vaiśyāśca śūdrāścaiva sahasraśaḥ / (7.1) Par.?

sītāśapathavīkṣārthaṃ sarva eva samāgatāḥ // (7.2) Par.?

tathā samāgataṃ sarvam aśmabhūtam ivācalam / (8.1) Par.?

śrutvā munivarastūrṇaṃ sasītaḥ samupāgamat // (8.2) Par.?

tam ṛṣiṃ pṛṣṭhataḥ sītā sānvagacchad avāṅmukhī / (9.1) Par.?

kṛtāñjalir bāṣpagalā kṛtvā rāmaṃ manogatam // (9.2) Par.?

tāṃ dṛṣṭvā śrīm ivāyāntīṃ brahmāṇam anugāminīm / (10.1) Par.?

vālmīkeḥ pṛṣṭhataḥ sītāṃ sādhukāro mahān abhūt // (10.2) Par.?

tato halahalā śabdaḥ sarveṣām evam ābabhau / (11.1) Par.?

duḥkhajena viśālena śokenākulitātmanām // (11.2) Par.?

sādhu sīteti kecit tu sādhu rāmeti cāpare / (12.1) Par.?

ubhāveva tu tatrānye sādhu sādhviti cābruvan // (12.2) Par.?

tato madhyaṃ janaughānāṃ praviśya munipuṃgavaḥ / (13.1) Par.?

sītāsahāyo vālmīkir iti hovāca rāghavam // (13.2) Par.?

iyaṃ dāśarathe sītā suvratā dharmacāriṇī / (14.1) Par.?

apāpā te parityaktā mamāśramasamīpataḥ // (14.2) Par.?

lokāpavādabhītasya tava rāma mahāvrata / (15.1) Par.?

pratyayaṃ dāsyate sītā tām anujñātum arhasi // (15.2) Par.?

imau ca jānakī putrāvubhau ca yamajātakau / (16.1) Par.?

sutau tavaiva durdharṣau satyam etad bravīmi te // (16.2) Par.?

pracetaso 'haṃ daśamaḥ putro rāghavanandana / (17.1) Par.?

na smarāmyanṛtaṃ vākyaṃ tathemau tava putrakau // (17.2) Par.?

bahuvarṣasahasrāṇi tapaścaryā mayā kṛtā / (18.1) Par.?

tasyāḥ phalam upāśnīyām apāpā maithilī yathā // (18.2) Par.?

ahaṃ pañcasu bhūteṣu manaḥṣaṣṭheṣu rāghava / (19.1) Par.?

vicintya sītāṃ śuddheti nyagṛhṇāṃ vananirjhare // (19.2) Par.?

iyaṃ śuddhasamācārā apāpā patidevatā / (20.1) Par.?

lokāpavādabhītasya dāsyati pratyayaṃ tava // (20.2) Par.?