Texts

Help

Select a text:
Bibliography
Select a chapter:
 (no revisions)
Show parallels  Show headlines
Use dependency labeler
Chapter id: 3010
  • Click on a sentence to show its analysis
  • Keep the mouse pointer over a lemma to show its meanings.
9 parallel or similar passage(s) in this chapter
vaiśaṃpāyana uvāca / (1.1) Par.?
tataḥ satyavatī dīnā kṛpaṇā putragṛddhinī / (1.2) Par.?
putrasya kṛtvā kāryāṇi snuṣābhyāṃ saha bhārata / (1.3) Par.?
samāśvāsya snuṣe te ca bhīṣmaṃ dharmabhṛtāṃ varam / (1.4) Par.?
mātā satyavatī bhīṣmam uvāca vadatāṃ varam // (1.5) Par.?
dharmaṃ ca pitṛvaṃśaṃ ca mātṛvaṃśaṃ ca māninī / (2.1) Par.?
prasamīkṣya mahābhāgā gāṅgeyaṃ vākyam abravīt / (2.2) Par.?
duḥkhārditā tu śokena majjantīva ca sāgare // (2.3) Par.?
śaṃtanor dharmanityasya kauravyasya yaśasvinaḥ / (3.1) Par.?
tvayi piṇḍaśca kīrtiśca saṃtānaṃ ca pratiṣṭhitam / (3.2) Par.?
bhrātā vicitravīryaste bhūtānām antam eyivān // (3.3) Par.?
yathā karma śubhaṃ kṛtvā svargopagamanaṃ dhruvam / (4.1) Par.?
yathā cāyur dhruvaṃ satye tvayi dharmastathā dhruvaḥ // (4.2) Par.?
vettha dharmāṃśca dharmajña samāsenetareṇa ca / (5.1) Par.?
vividhāstvaṃ śrutīr vettha vettha vedāṃśca sarvaśaḥ // (5.2) Par.?
vyavasthānaṃ ca te dharme kulācāraṃ ca lakṣaye / (6.1) Par.?
pratipattiṃ ca kṛcchreṣu śukrāṅgirasayor iva // (6.2) Par.?
tasmāt subhṛśam āśvasya tvayi dharmabhṛtāṃ vara / (7.1) Par.?
kārye tvāṃ viniyokṣyāmi tacchrutvā kartum arhasi // (7.2) Par.?
mama putrastava bhrātā vīryavān supriyaśca te / (8.1) Par.?
bāla eva gataḥ svargam aputraḥ puruṣarṣabha // (8.2) Par.?
ime mahiṣyau bhrātuste kāśirājasute śubhe / (9.1) Par.?
rūpayauvanasampanne putrakāme ca bhārata / (9.2) Par.?
dharmyam etat paraṃ jñātvā // (9.3) Par.?
tayor utpādayāpatyaṃ saṃtānāya kulasya naḥ / (10.1) Par.?
saṃtānakulavardhanam / (10.2) Par.?
manniyogān mahābhāga dharmaṃ kartum ihārhasi // (10.3) Par.?
rājye caivābhiṣicyasva bhāratān anuśādhi ca / (11.1) Par.?
dārāṃśca kuru dharmeṇa mā nimajjīḥ pitāmahān / (11.2) Par.?
agnihotraṃ trayo vedāḥ saṃtānam api cākṣayam / (11.3) Par.?
eṣā trayī tu samproktā svargamokṣaphalapradā // (11.4) Par.?
tathocyamāno mātrā ca suhṛdbhiśca paraṃtapaḥ / (12.1) Par.?
pratyuvāca sa dharmātmā dharmyam evottaraṃ vacaḥ // (12.2) Par.?
asaṃśayaṃ paro dharmastvayā mātar udāhṛtaḥ / (13.1) Par.?
tvam apatyaṃ prati ca me pratijñāṃ vettha vai parām / (13.2) Par.?
rājyārthe nābhiṣicyeyaṃ nopeyāṃ jātu maithunam / (13.3) Par.?
bhavatyā matam ājñāya kṛtam etad vrataṃ mayā // (13.4) Par.?
jānāsi ca yathāvṛttaṃ śulkahetostvadantare / (14.1) Par.?
sa satyavati satyaṃ te pratijānāmyahaṃ punaḥ // (14.2) Par.?
parityajeyaṃ trailokyaṃ rājyaṃ deveṣu vā punaḥ / (15.1) Par.?
yad vāpyadhikam etābhyāṃ na tu satyaṃ kathaṃcana // (15.2) Par.?
tyajecca pṛthivī gandham āpaśca rasam ātmanaḥ / (16.1) Par.?
jyotistathā tyajed rūpaṃ vāyuḥ sparśaguṇaṃ tyajet // (16.2) Par.?
prabhāṃ samutsṛjed arko dhūmaketustathoṣṇatām / (17.1) Par.?
tyajecchabdaṃ tathākāśaḥ somaḥ śītāṃśutāṃ tyajet // (17.2) Par.?
vikramaṃ vṛtrahā jahyād dharmaṃ jahyācca dharmarāṭ / (18.1) Par.?
na tvahaṃ satyam utsraṣṭuṃ vyavaseyaṃ kathaṃcana / (18.2) Par.?
tan na jātvanyathā kāryaṃ lokānām api saṃkṣaye / (18.3) Par.?
amaratvasya vā hetostrailokyasadanasya vā // (18.4) Par.?
evam uktā tu putreṇa bhūridraviṇatejasā / (19.1) Par.?
mātā satyavatī bhīṣmam uvāca tadanantaram // (19.2) Par.?
jānāmi te sthitiṃ satye parāṃ satyaparākrama / (20.1) Par.?
icchan sṛjethāstrīṃllokān anyāṃstvaṃ svena tejasā // (20.2) Par.?
jānāmi caiva satyaṃ tan madarthaṃ yad abhāṣathāḥ / (21.1) Par.?
āpaddharmam avekṣasva vaha paitāmahīṃ dhuram // (21.2) Par.?
yathā te kulatantuśca dharmaśca na parābhavet / (22.1) Par.?
suhṛdaśca prahṛṣyeraṃstathā kuru paraṃtapa / (22.2) Par.?
ātmanaśca hitaṃ tāta priyaṃ ca mama bhārata // (22.3) Par.?
lālapyamānāṃ tām evaṃ kṛpaṇāṃ putragṛddhinīm / (23.1) Par.?
dharmād apetaṃ bruvatīṃ bhīṣmo bhūyo 'bravīd idam // (23.2) Par.?
rājñi dharmān avekṣasva mā naḥ sarvān vyanīnaśaḥ / (24.1) Par.?
satyāccyutiḥ kṣatriyasya na dharmeṣu praśasyate // (24.2) Par.?
śaṃtanor api saṃtānaṃ yathā syād akṣayaṃ bhuvi / (25.1) Par.?
tat te dharmaṃ pravakṣyāmi kṣātraṃ rājñi sanātanam // (25.2) Par.?
śrutvā taṃ pratipadyethāḥ prājñaiḥ saha purohitaiḥ / (26.1) Par.?
āpaddharmārthakuśalair lokatantram avekṣya ca // (26.2) Par.?
Duration=0.13036799430847 secs.