Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 2466

Click on a sentence to show its analysis
Keep the mouse pointer over a lemma to show its meanings.

vaiśampāyana uvāca / (1.1) Par.?

bhojāḥ pravrajitāñśrutvā vṛṣṇayaś cāndhakaiḥ saha / (1.2) Par.?

pāṇḍavān duḥkhasaṃtaptān samājagmur mahāvane // (1.3) Par.?

pāñcālasya ca dāyādā dhṛṣṭaketuś ca cedipaḥ / (2.1) Par.?

kekayāś ca mahāvīryā bhrātaro lokaviśrutāḥ // (2.2) Par.?

vane te 'bhiyayuḥ pārthān krodhāmarśasamanvitāḥ / (3.1) Par.?

garhayanto dhārtarāṣṭrān kiṃ kurma iti cābruvan // (3.2) Par.?

vāsudevaṃ puraskṛtya sarve te kṣatriyarṣabhāḥ / (4.1) Par.?

parivāryopaviviśur dharmarājaṃ yudhiṣṭhiram // (4.2) Par.?

vāsudeva uvāca / (5.1) Par.?

duryodhanasya karṇasya śakuneś ca durātmanaḥ / (5.2) Par.?

duḥśāsanacaturthānāṃ bhūmiḥ pāsyati śoṇitam // (5.3) Par.?

tataḥ sarve 'bhiṣiñcāmo dharmarājaṃ yudhiṣṭhiram / (6.1) Par.?

nikṛtyopacaran vadhya eṣa dharmaḥ sanātanaḥ // (6.2) Par.?

vaiśampāyana uvāca / (7.1) Par.?

pārthānām abhiṣaṅgeṇa tathā kruddhaṃ janārdanam / (7.2) Par.?

arjunaḥ śamayāmāsa didhakṣantam iva prajāḥ // (7.3) Par.?

saṃkruddhaṃ keśavaṃ dṛṣṭvā pūrvadeheṣu phalgunaḥ / (8.1) Par.?

kīrtayāmāsa karmāṇi satyakīrter mahātmanaḥ // (8.2) Par.?

puruṣasyāprameyasya satyasyāmitatejasaḥ / (9.1) Par.?

prajāpatipater viṣṇor lokanāthasya dhīmataḥ // (9.2) Par.?

arjuna uvāca / (10.1) Par.?

daśa varṣasahasrāṇi yatrasāyaṃgṛho muniḥ / (10.2) Par.?

vyacaras tvaṃ purā kṛṣṇa parvate gandhamādane // (10.3) Par.?

daśa varṣasahasrāṇi daśa varṣaśatāni ca / (11.1) Par.?

puṣkareṣvavasaḥ kṛṣṇa tvam apo bhakṣayan purā // (11.2) Par.?

ūrdhvabāhur viśālāyāṃ badaryāṃ madhusūdana / (12.1) Par.?

atiṣṭha ekapādena vāyubhakṣaḥ śataṃ samāḥ // (12.2) Par.?

apakṛṣṭottarāsaṅgaḥ kṛśo dhamanisaṃtataḥ / (13.1) Par.?

āsīḥ kṛṣṇa sarasvatyāṃ sattre dvādaśavārṣike // (13.2) Par.?

prabhāsaṃ cāpyathāsādya tīrthaṃ puṇyajanocitam / (14.1) Par.?

tathā kṛṣṇa mahātejā divyaṃ varṣasahasrakam / (14.2) Par.?

ātiṣṭhas tapa ekena pādena niyame sthitaḥ // (14.3) Par.?

kṣetrajñaḥ sarvabhūtānām ādir antaś ca keśava / (15.1) Par.?

nidhānaṃ tapasāṃ kṛṣṇa yajñas tvaṃ ca sanātanaḥ // (15.2) Par.?

nihatya narakaṃ bhaumam āhṛtya maṇikuṇḍale / (16.1) Par.?

prathamotpāditaṃ kṛṣṇa medhyam aśvam avāsṛjaḥ // (16.2) Par.?

kṛtvā tat karma lokānām ṛṣabhaḥ sarvalokajit / (17.1) Par.?

avadhīs tvaṃ raṇe sarvān sametān daityadānavān // (17.2) Par.?

tataḥ sarveśvaratvaṃ ca sampradāya śacīpateḥ / (18.1) Par.?

mānuṣeṣu mahābāho prādurbhūto 'si keśava // (18.2) Par.?

sa tvaṃ nārāyaṇo bhūtvā harir āsīḥ paraṃtapa / (19.1) Par.?

brahmā somaś ca sūryaś ca dharmo dhātā yamo 'nalaḥ // (19.2) Par.?

vāyur vaiśravaṇo rudraḥ kālaḥ khaṃ pṛthivī diśaḥ / (20.1) Par.?

ajaś carācaraguruḥ sraṣṭā tvaṃ puruṣottama // (20.2) Par.?

turāyaṇādibhir deva kratubhir bhūridakṣiṇaiḥ / (21.1) Par.?

ayajo bhūritejā vai kṛṣṇa caitrarathe vane // (21.2) Par.?

śataṃ śatasahasrāṇi suvarṇasya janārdana / (22.1) Par.?

ekaikasmiṃs tadā yajñe paripūrṇāni bhāgaśaḥ // (22.2) Par.?

aditer api putratvam etya yādavanandana / (23.1) Par.?

tvaṃ viṣṇur iti vikhyāta indrād avarajo bhuvi // (23.2) Par.?

śiśur bhūtvā divaṃ khaṃ ca pṛthivīṃ ca paraṃtapa / (24.1) Par.?

tribhir vikramaṇaiḥ kṛṣṇa krāntavān asi tejasā // (24.2) Par.?

samprāpya divam ākāśam ādityasadane sthitaḥ / (25.1) Par.?

atyarocaś ca bhūtātman bhāskaraṃ svena tejasā // (25.2) Par.?

sāditā mauravāḥ pāśā nisundanarakau hatau / (26.1) Par.?

kṛtaḥ kṣemaḥ punaḥ panthāḥ puraṃ prāgjyotiṣaṃ prati // (26.2) Par.?

jārūthyām āhutiḥ krāthaḥ śiśupālo janaiḥ saha / (27.1) Par.?

bhīmasenaś ca śaibyaś ca śatadhanvā ca nirjitaḥ // (27.2) Par.?

tathā parjanyaghoṣeṇa rathenādityavarcasā / (28.1) Par.?

avākṣīr mahiṣīṃ bhojyāṃ raṇe nirjitya rukmiṇam // (28.2) Par.?

indradyumno hataḥ kopād yavanaś ca kaśerumān / (29.1) Par.?

hataḥ saubhapatiḥ śālvas tvayā saubhaṃ ca pātitam // (29.2) Par.?

irāvatyāṃ tathā bhojaḥ kārtavīryasamo yudhi / (30.1) Par.?

gopatis tālaketuś ca tvayā vinihatāvubhau // (30.2) Par.?

tāṃ ca bhogavatīṃ puṇyām ṛṣikāntāṃ janārdana / (31.1) Par.?

dvārakām ātmasātkṛtvā samudraṃ gamayiṣyasi // (31.2) Par.?

na krodho na ca mātsaryaṃ nānṛtaṃ madhusūdana / (32.1) Par.?

tvayi tiṣṭhati dāśārha na nṛśaṃsyaṃ kuto 'nṛju // (32.2) Par.?

āsīnaṃ cittamadhye tvāṃ dīpyamānaṃ svatejasā / (33.1) Par.?

āgamya ṛṣayaḥ sarve 'yācantābhayam acyuta // (33.2) Par.?

yugānte sarvabhūtāni saṃkṣipya madhusūdana / (34.1) Par.?

ātmanyevātmasātkṛtvā jagad āsse paraṃtapa // (34.2) Par.?

naivaṃ pūrve nāpare vā kariṣyanti kṛtāni te / (35.1) Par.?

karmāṇi yāni deva tvaṃ bāla eva mahādyute // (35.2) Par.?

kṛtavān puṇḍarīkākṣa baladevasahāyavān / (36.1) Par.?

vairājabhavane cāpi brahmaṇā nyavasaḥ saha // (36.2) Par.?

vaiśampāyana uvāca / (37.1) Par.?

evam uktvā tadātmānam ātmā kṛṣṇasya pāṇḍavaḥ / (37.2) Par.?

tūṣṇīm āsīt tataḥ pārtham ity uvāca janārdanaḥ // (37.3) Par.?

mamaiva tvaṃ tavaivāhaṃ ye madīyās tavaiva te / (38.1) Par.?

yas tvāṃ dveṣṭi sa māṃ dveṣṭi yas tvām anu sa mām anu // (38.2) Par.?

naras tvam asi durdharṣa harir nārāyaṇo hy aham / (39.1) Par.?

lokāllokam imaṃ prāptau naranārāyaṇāvṛṣī // (39.2) Par.?

ananyaḥ pārtha mattas tvam ahaṃ tvattaś ca bhārata / (40.1) Par.?

nāvayor antaraṃ śakyaṃ vedituṃ bharatarṣabha // (40.2) Par.?

tasmin vīrasamāvāye saṃrabdheṣvatha rājasu / (41.1) Par.?

dhṛṣṭadyumnamukhair vīrair bhrātṛbhiḥ parivāritā // (41.2) Par.?

pāñcālī puṇḍarīkākṣam āsīnaṃ yādavaiḥ saha / (42.1) Par.?

abhigamyābravīt kṛṣṇā śaraṇyaṃ śaraṇaiṣiṇī // (42.2) Par.?

pūrve prajānisarge tvām āhur ekaṃ prajāpatim / (43.1) Par.?

sraṣṭāraṃ sarvabhūtānām asito devalo 'bravīt // (43.2) Par.?

viṣṇus tvam asi durdharṣa tvaṃ yajño madhusūdana / (44.1) Par.?

yaṣṭā tvam asi yaṣṭavyo jāmadagnyo yathābravīt // (44.2) Par.?

ṛṣayas tvāṃ kṣamām āhuḥ satyaṃ ca puruṣottama / (45.1) Par.?

satyād yajño 'si sambhūtaḥ kaśyapas tvāṃ yathābravīt // (45.2) Par.?

sādhyānām api devānāṃ vasūnām īśvareśvaraḥ / (46.1) Par.?

lokabhāvana lokeśa yathā tvāṃ nārado 'bravīt // (46.2) Par.?

divaṃ te śirasā vyāptaṃ padbhyāṃ ca pṛthivī vibho / (47.1) Par.?

jaṭharaṃ te ime lokāḥ puruṣo 'si sanātanaḥ // (47.2) Par.?

vidyātapo 'bhitaptānāṃ tapasā bhāvitātmanām / (48.1) Par.?

ātmadarśanasiddhānām ṛṣīṇām ṛṣisattama // (48.2) Par.?

rājarṣīṇāṃ puṇyakṛtām āhaveṣvanivartinām / (49.1) Par.?

sarvadharmopapannānāṃ tvaṃ gatiḥ puruṣottama // (49.2) Par.?

tvaṃ prabhus tvaṃ vibhus tvaṃ bhūr ātmabhūs tvaṃ sanātanaḥ / (50.1) Par.?

lokapālāś ca lokāś ca nakṣatrāṇi diśo daśa / (50.2) Par.?

nabhaś candraś ca sūryaś ca tvayi sarvaṃ pratiṣṭhitam // (50.3) Par.?

martyatā caiva bhūtānām amaratvaṃ divaukasām / (51.1) Par.?

tvayi sarvaṃ mahābāho lokakāryaṃ pratiṣṭhitam // (51.2) Par.?

sā te 'haṃ duḥkham ākhyāsye praṇayānmadhusūdana / (52.1) Par.?

īśas tvaṃ sarvabhūtānāṃ ye divyā ye ca mānuṣāḥ // (52.2) Par.?

kathaṃ nu bhāryā pārthānāṃ tava kṛṣṇa sakhī vibho / (53.1) Par.?

dhṛṣṭadyumnasya bhaginī sabhāṃ kṛṣyeta mādṛśī // (53.2) Par.?

strīdharmiṇī vepamānā rudhireṇa samukṣitā / (54.1) Par.?

ekavastrā vikṛṣṭāsmi duḥkhitā kurusaṃsadi // (54.2) Par.?

rājamadhye sabhāyāṃ tu rajasābhisamīritām / (55.1) Par.?

dṛṣṭvā ca māṃ dhārtarāṣṭrāḥ prāhasan pāpacetasaḥ // (55.2) Par.?

dāsībhāvena bhoktuṃ mām īṣus te madhusūdana / (56.1) Par.?

jīvatsu pāṇḍuputreṣu pāñcāleṣvatha vṛṣṇiṣu // (56.2) Par.?

nanvahaṃ kṛṣṇa bhīṣmasya dhṛtarāṣṭrasya cobhayoḥ / (57.1) Par.?

snuṣā bhavāmi dharmeṇa sāhaṃ dāsīkṛtā balāt // (57.2) Par.?

garhaye pāṇḍavāṃstveva yudhi śreṣṭhān mahābalān / (58.1) Par.?

ye kliśyamānāṃ prekṣante dharmapatnīṃ yaśasvinīm // (58.2) Par.?

dhig balaṃ bhīmasenasya dhik pārthasya dhanuṣmatām / (59.1) Par.?

yau māṃ viprakṛtāṃ kṣudrair marṣayetāṃ janārdana // (59.2) Par.?

śāśvato 'yaṃ dharmapathaḥ sadbhir ācaritaḥ sadā / (60.1) Par.?

yad bhāryāṃ parirakṣanti bhartāro 'lpabalā api // (60.2) Par.?

bhāryāyāṃ rakṣyamāṇāyāṃ prajā bhavati rakṣitā / (61.1) Par.?

prajāyāṃ rakṣyamāṇāyām ātmā bhavati rakṣitaḥ // (61.2) Par.?

ātmā hi jāyate tasyāṃ tasmājjāyā bhavatyuta / (62.1) Par.?

bhartā ca bhāryayā rakṣyaḥ kathaṃ jāyānmamodare // (62.2) Par.?

nanvime śaraṇaṃ prāptān na tyajanti kadācana / (63.1) Par.?

te māṃ śaraṇam āpannāṃ nānvapadyanta pāṇḍavāḥ // (63.2) Par.?

pañceme pañcabhir jātāḥ kumārāś cāmitaujasaḥ / (64.1) Par.?

eteṣām apy avekṣārthaṃ trātavyāsmi janārdana // (64.2) Par.?

prativindhyo yudhiṣṭhirāt sutasomo vṛkodarāt / (65.1) Par.?

arjunācchrutakīrtis tu śatānīkas tu nākuliḥ // (65.2) Par.?

kaniṣṭhācchrutakarmā tu sarve satyaparākramāḥ / (66.1) Par.?

pradyumno yādṛśaḥ kṛṣṇa tādṛśās te mahārathāḥ // (66.2) Par.?

nanv ime dhanuṣi śreṣṭhā ajeyā yudhi śātravaiḥ / (67.1) Par.?

kimarthaṃ dhārtarāṣṭrāṇāṃ sahante durbalīyasām // (67.2) Par.?

adharmeṇa hṛtaṃ rājyaṃ sarve dāsāḥ kṛtās tathā / (68.1) Par.?

sabhāyāṃ parikṛṣṭāham ekavastrā rajasvalā // (68.2) Par.?

nādhijyam api yacchakyaṃ kartum anyena gāṇḍivam / (69.1) Par.?

anyatrārjunabhīmābhyāṃ tvayā vā madhusūdana // (69.2) Par.?

dhig bhīmasenasya balaṃ dhik pārthasya ca gāṇḍivam / (70.1) Par.?

yatra duryodhanaḥ kṛṣṇa muhūrtam api jīvati // (70.2) Par.?

ya etān ākṣipad rāṣṭrāt saha mātrāvihiṃsakān / (71.1) Par.?

adhīyānān purā bālān vratasthān madhusūdana // (71.2) Par.?

bhojane bhīmasenasya pāpaḥ prākṣepayad viṣam / (72.1) Par.?

kālakūṭaṃ navaṃ tīkṣṇaṃ saṃbhṛtaṃ lomaharṣaṇam // (72.2) Par.?

taj jīrṇam avikāreṇa sahānnena janārdana / (73.1) Par.?

saśeṣatvān mahābāho bhīmasya puruṣottama // (73.2) Par.?

pramāṇakoṭyāṃ viśvastaṃ tathā suptaṃ vṛkodaram / (74.1) Par.?

baddhvainaṃ kṛṣṇa gaṅgāyāṃ prakṣipya punar āvrajat // (74.2) Par.?

yadā vibuddhaḥ kaunteyas tadā saṃchidya bandhanam / (75.1) Par.?

udatiṣṭhan mahābāhur bhīmaseno mahābalaḥ // (75.2) Par.?

āśīviṣaiḥ kṛṣṇasarpaiḥ suptaṃ cainam adaṃśayat / (76.1) Par.?

sarveṣvevāṅgadeśeṣu na mamāra ca śatruhā // (76.2) Par.?

pratibuddhas tu kaunteyaḥ sarvān sarpān apothayat / (77.1) Par.?

sārathiṃ cāsya dayitam apahastena jaghnivān // (77.2) Par.?

punaḥ suptān upādhākṣīd bālakān vāraṇāvate / (78.1) Par.?

śayānān āryayā sārdhaṃ ko nu tat kartum arhati // (78.2) Par.?

yatrāryā rudatī bhītā pāṇḍavān idam abravīt / (79.1) Par.?

mahad vyasanam āpannā śikhinā parivāritā // (79.2) Par.?

hā hatāsmi kuto nv adya bhavecchāntir ihānalāt / (80.1) Par.?

anāthā vinaśiṣyāmi bālakaiḥ putrakaiḥ saha // (80.2) Par.?

tatra bhīmo mahābāhur vāyuvegaparākramaḥ / (81.1) Par.?

āryām āśvāsayāmāsa bhrātṝṃś cāpi vṛkodaraḥ // (81.2) Par.?

vainateyo yathā pakṣī garuḍaḥ patatāṃ varaḥ / (82.1) Par.?

tathaivābhipatiṣyāmi bhayaṃ vo neha vidyate // (82.2) Par.?

āryām aṅkena vāmena rājānaṃ dakṣiṇena ca / (83.1) Par.?

aṃsayoś ca yamau kṛtvā pṛṣṭhe bībhatsum eva ca // (83.2) Par.?

sahasotpatya vegena sarvān ādāya vīryavān / (84.1) Par.?

bhrātṝn āryāṃ ca balavān mokṣayāmāsa pāvakāt // (84.2) Par.?

te rātrau prasthitāḥ sarve mātrā saha yaśasvinaḥ / (85.1) Par.?

abhyagacchan mahāraṇyaṃ hiḍimbavanam antikāt // (85.2) Par.?

śrāntāḥ prasuptās tatreme mātrā saha suduḥkhitāḥ / (86.1) Par.?

suptāṃś cainān abhyagacchaddhiḍimbā nāma rākṣasī // (86.2) Par.?

bhīmasya pādau kṛtvā tu sva utsaṅge tato balāt / (87.1) Par.?

paryamardata saṃhṛṣṭā kalyāṇī mṛdupāṇinā // (87.2) Par.?

tām abudhyad ameyātmā balavān satyavikramaḥ / (88.1) Par.?

paryapṛcchacca tāṃ bhīmaḥ kim ihecchasyanindite // (88.2) Par.?

tayoḥ śrutvā tu kathitam āgacchad rākṣasādhamaḥ / (89.1) Par.?

bhīmarūpo mahānādān visṛjan bhīmadarśanaḥ // (89.2) Par.?

kena sārdhaṃ kathayasi ānayainaṃ mamāntikam / (90.1) Par.?

hiḍimbe bhakṣayiṣyāvo na ciraṃ kartum arhasi // (90.2) Par.?

sā kṛpāsaṃgṛhītena hṛdayena manasvinī / (91.1) Par.?

nainam aicchat tadākhyātum anukrośād aninditā // (91.2) Par.?

sa nādān vinadan ghorān rākṣasaḥ puruṣādakaḥ / (92.1) Par.?

abhyadravata vegena bhīmasenaṃ tadā kila // (92.2) Par.?

tam abhidrutya saṃkruddho vegena mahatā balī / (93.1) Par.?

agṛhṇāt pāṇinā pāṇiṃ bhīmasenasya rākṣasaḥ // (93.2) Par.?

indrāśanisamasparśaṃ vajrasaṃhananaṃ dṛḍham / (94.1) Par.?

saṃhatya bhīmasenāya vyākṣipat sahasā karam // (94.2) Par.?

gṛhītaṃ pāṇinā pāṇiṃ bhīmaseno 'tha rakṣasā / (95.1) Par.?

nāmṛṣyata mahābāhus tatrākrudhyad vṛkodaraḥ // (95.2) Par.?

tatrāsīt tumulaṃ yuddhaṃ bhīmasenahiḍimbayoḥ / (96.1) Par.?

sarvāstraviduṣor ghoraṃ vṛtravāsavayor iva // (96.2) Par.?

hatvā hiḍimbaṃ bhīmo 'tha prasthito bhrātṛbhiḥ saha / (97.1) Par.?

hiḍimbām agrataḥ kṛtvā yasyāṃ jāto ghaṭotkacaḥ // (97.2) Par.?

tataś ca prādravan sarve saha mātrā yaśasvinaḥ / (98.1) Par.?

ekacakrām abhimukhāḥ saṃvṛtā brāhmaṇavrajaiḥ // (98.2) Par.?

prasthāne vyāsa eṣāṃ ca mantrī priyahito 'bhavat / (99.1) Par.?

tato 'gacchann ekacakrāṃ pāṇḍavāḥ saṃśitavratāḥ // (99.2) Par.?

tatrāpyāsādayāmāsur bakaṃ nāma mahābalam / (100.1) Par.?

puruṣādaṃ pratibhayaṃ hiḍimbenaiva saṃmitam // (100.2) Par.?

taṃ cāpi vinihatyograṃ bhīmaḥ praharatāṃ varaḥ / (101.1) Par.?

sahito bhrātṛbhiḥ sarvair drupadasya puraṃ yayau // (101.2) Par.?

labdhāham api tatraiva vasatā savyasācinā / (102.1) Par.?

yathā tvayā jitā kṛṣṇa rukmiṇī bhīṣmakātmajā // (102.2) Par.?

evaṃ suyuddhe pārthena jitāhaṃ madhusūdana / (103.1) Par.?

svayaṃvare mahat karma kṛtvā nasukaraṃ paraiḥ // (103.2) Par.?

evaṃ kleśaiḥ subahubhiḥ kliśyamānāḥ suduḥkhitāḥ / (104.1) Par.?

nivasāmāryayā hīnāḥ kṛṣṇa dhaumyapuraḥsarāḥ // (104.2) Par.?

ta ime siṃhavikrāntā vīryeṇābhyadhikāḥ paraiḥ / (105.1) Par.?

vihīnaiḥ parikliśyantīṃ samupekṣanta māṃ katham // (105.2) Par.?

etādṛśāni duḥkhāni sahante durbalīyasām / (106.1) Par.?

dīrghakālaṃ pradīptāni pāpānāṃ kṣudrakarmaṇām // (106.2) Par.?

kule mahati jātāsmi divyena vidhinā kila / (107.1) Par.?

pāṇḍavānāṃ priyā bhāryā snuṣā pāṇḍor mahātmanaḥ // (107.2) Par.?

kacagraham anuprāptā sāsmi kṛṣṇa varā satī / (108.1) Par.?

pañcānām indrakalpānāṃ prekṣatāṃ madhusūdana // (108.2) Par.?

ity uktvā prārudat kṛṣṇā mukhaṃ pracchādya pāṇinā / (109.1) Par.?

padmakośaprakāśena mṛdunā mṛdubhāṣiṇī // (109.2) Par.?

stanāv apatitau pīnau sujātau śubhalakṣaṇau / (110.1) Par.?

abhyavarṣata pāñcālī duḥkhajair aśrubindubhiḥ // (110.2) Par.?

cakṣuṣī parimārjantī niḥśvasantī punaḥ punaḥ / (111.1) Par.?

bāṣpapūrṇena kaṇṭhena kruddhā vacanam abravīt // (111.2) Par.?

naiva me patayaḥ santi na putrā madhusūdana / (112.1) Par.?

na bhrātaro na ca pitā naiva tvaṃ na ca bāndhavāḥ // (112.2) Par.?

ye māṃ viprakṛtāṃ kṣudrair upekṣadhvaṃ viśokavat / (113.1) Par.?

na hi me śāmyate duḥkhaṃ karṇo yat prāhasat tadā // (113.2) Par.?

athainām abravīt kṛṣṇas tasmin vīrasamāgame / (114.1) Par.?

rodiṣyanti striyo hyevaṃ yeṣāṃ kruddhāsi bhāmini // (114.2) Par.?

bībhatsuśarasaṃchannāñ śoṇitaughapariplutān / (115.1) Par.?

nihatāñjīvitaṃ tyaktvā śayānān vasudhātale // (115.2) Par.?

yat samarthaṃ pāṇḍavānāṃ tat kariṣyāmi mā śucaḥ / (116.1) Par.?

satyaṃ te pratijānāmi rājñāṃ rājñī bhaviṣyasi // (116.2) Par.?

pated dyaur himavāñśīryet pṛthivī śakalībhavet / (117.1) Par.?

śuṣyet toyanidhiḥ kṛṣṇe na me moghaṃ vaco bhavet // (117.2) Par.?

dhṛṣṭadyumna uvāca / (118.1) Par.?

ahaṃ droṇaṃ haniṣyāmi śikhaṇḍī tu pitāmaham / (118.2) Par.?

duryodhanaṃ bhīmasenaḥ karṇaṃ hantā dhanaṃjayaḥ // (118.3) Par.?

rāmakṛṣṇau vyapāśritya ajeyāḥ sma śucismite / (119.1) Par.?

api vṛtrahaṇā yuddhe kiṃ punar dhṛtarāṣṭrajaiḥ // (119.2) Par.?

vaiśampāyana uvāca / (120.1) Par.?

ity ukte 'bhimukhā vīrā vāsudevam upasthitāḥ / (120.2) Par.?

teṣāṃ madhye mahābāhuḥ keśavo vākyam abravīt // (120.3) Par.?

Duration=0.3952431678772 secs.