Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 2488

Click on a sentence to show its analysis
Keep the mouse pointer over a lemma to show its meanings.

draupadyuvāca / (1.1) Par.?

atrāpy udāharantīmam itihāsaṃ purātanam / (1.2) Par.?

prahlādasya ca saṃvādaṃ baler vairocanasya ca // (1.3) Par.?

asurendraṃ mahāprājñaṃ dharmāṇām āgatāgamam / (2.1) Par.?

baliḥ papraccha daityendraṃ prahlādaṃ pitaraṃ pituḥ // (2.2) Par.?

kṣamā svicchreyasī tāta utāho teja ity uta / (3.1) Par.?

etan me saṃśayaṃ tāta yathāvad brūhi pṛcchate // (3.2) Par.?

śreyo yad atra dharmajña brūhi me tad asaṃśayam / (4.1) Par.?

kariṣyāmi hi tat sarvaṃ yathāvad anuśāsanam // (4.2) Par.?

tasmai provāca tat sarvam evaṃ pṛṣṭaḥ pitāmahaḥ / (5.1) Par.?

sarvaniścayavit prājñaḥ saṃśayaṃ paripṛcchate // (5.2) Par.?

prahlāda uvāca / (6.1) Par.?

na śreyaḥ satataṃ tejo na nityaṃ śreyasī kṣamā / (6.2) Par.?

iti tāta vijānīhi dvayam etad asaṃśayam // (6.3) Par.?

yo nityaṃ kṣamate tāta bahūn doṣān sa vindati / (7.1) Par.?

bhṛtyāḥ paribhavantyenam udāsīnās tathaiva ca // (7.2) Par.?

sarvabhūtāni cāpyasya na namante kadācana / (8.1) Par.?

tasmān nityaṃ kṣamā tāta paṇḍitair apavāditā // (8.2) Par.?

avajñāya hi taṃ bhṛtyā bhajante bahudoṣatām / (9.1) Par.?

ādātuṃ cāsya vittāni prārthayante 'lpacetasaḥ // (9.2) Par.?

yānaṃ vastrāṇy alaṃkārāñśayanāny āsanāni ca / (10.1) Par.?

bhojanāny atha pānāni sarvopakaraṇāni ca // (10.2) Par.?

ādadīrannadhikṛtā yathākāmam acetasaḥ / (11.1) Par.?

pradiṣṭāni ca deyāni na dadyur bhartṛśāsanāt // (11.2) Par.?

na cainaṃ bhartṛpūjābhiḥ pūjayanti kadācana / (12.1) Par.?

avajñānaṃ hi loke 'smin maraṇād api garhitam // (12.2) Par.?

kṣamiṇaṃ tādṛśaṃ tāta bruvanti kaṭukānyapi / (13.1) Par.?

preṣyāḥ putrāś ca bhṛtyāś ca tathodāsīnavṛttayaḥ // (13.2) Par.?

apyasya dārān icchanti paribhūya kṣamāvataḥ / (14.1) Par.?

dārāś cāsya pravartante yathākāmam acetasaḥ // (14.2) Par.?

tathā ca nityam uditā yadi svalpam apīśvarāt / (15.1) Par.?

daṇḍam arhanti duṣyanti duṣṭāś cāpyapakurvate // (15.2) Par.?

ete cānye ca bahavo nityaṃ doṣāḥ kṣamāvatām / (16.1) Par.?

atha vairocane doṣān imān viddhyakṣamāvatām // (16.2) Par.?

asthāne yadi vā sthāne satataṃ rajasāvṛtaḥ / (17.1) Par.?

kruddho daṇḍān praṇayati vividhān svena tejasā // (17.2) Par.?

mitraiḥ saha virodhaṃ ca prāpnute tejasāvṛtaḥ / (18.1) Par.?

prāpnoti dveṣyatāṃ caiva lokāt svajanatas tathā // (18.2) Par.?

so 'vamānād arthahānim upālambham anādaram / (19.1) Par.?

saṃtāpadveṣalobhāṃśca śatrūṃśca labhate naraḥ // (19.2) Par.?

krodhād daṇḍān manuṣyeṣu vividhān puruṣo nayan / (20.1) Par.?

bhraśyate śīghram aiśvaryāt prāṇebhyaḥ svajanād api // (20.2) Par.?

yo 'pakartṝṃśca kartṝṃśca tejasaivopagacchati / (21.1) Par.?

tasmād udvijate lokaḥ sarpād veśmagatād iva // (21.2) Par.?

yasmād udvijate lokaḥ kathaṃ tasya bhavo bhavet / (22.1) Par.?

antaraṃ hyasya dṛṣṭvaiva loko vikurute dhruvam / (22.2) Par.?

tasmān nātyutsṛjet tejo na ca nityaṃ mṛdur bhavet // (22.3) Par.?

kāle mṛdur yo bhavati kāle bhavati dāruṇaḥ / (23.1) Par.?

sa vai sukham avāpnoti loke 'muṣminn ihaiva ca // (23.2) Par.?

kṣamākālāṃs tu vakṣyāmi śṛṇu me vistareṇa tān / (24.1) Par.?

ye te nityam asaṃtyājyā yathā prāhur manīṣiṇaḥ // (24.2) Par.?

pūrvopakārī yas tu syād aparādhe 'garīyasi / (25.1) Par.?

upakāreṇa tat tasya kṣantavyam aparādhinaḥ // (25.2) Par.?

abuddhim āśritānāṃ ca kṣantavyam aparādhinām / (26.1) Par.?

na hi sarvatra pāṇḍityaṃ sulabhaṃ puruṣeṇa vai // (26.2) Par.?

atha ced buddhijaṃ kṛtvā brūyus te tad abuddhijam / (27.1) Par.?

pāpān svalpe 'pi tān hanyād aparādhe tathānṛjūn // (27.2) Par.?

sarvasyaiko 'parādhas te kṣantavyaḥ prāṇino bhavet / (28.1) Par.?

dvitīye sati vadhyas tu svalpe 'pyapakṛte bhavet // (28.2) Par.?

ajānatā bhavet kaścid aparādhaḥ kṛto yadi / (29.1) Par.?

kṣantavyam eva tasyāhuḥ suparīkṣya parīkṣayā // (29.2) Par.?

mṛdunā mārdavaṃ hanti mṛdunā hanti dāruṇam / (30.1) Par.?

nāsādhyaṃ mṛdunā kiṃcit tasmāt tīkṣṇataro mṛduḥ // (30.2) Par.?

deśakālau tu samprekṣya balābalam athātmanaḥ / (31.1) Par.?

nādeśakāle kiṃcit syād deśaḥ kālaḥ pratīkṣyate / (31.2) Par.?

tathā lokabhayāccaiva kṣantavyam aparādhinaḥ // (31.3) Par.?

eta evaṃvidhāḥ kālāḥ kṣamāyāḥ parikīrtitāḥ / (32.1) Par.?

ato 'nyathānuvartatsu tejasaḥ kāla ucyate // (32.2) Par.?

draupadyuvāca / (33.1) Par.?

tad ahaṃ tejasaḥ kālaṃ tava manye narādhipa / (33.2) Par.?

dhārtarāṣṭreṣu lubdheṣu satataṃ cāpakāriṣu // (33.3) Par.?

na hi kaścit kṣamākālo vidyate 'dya kurūn prati / (34.1) Par.?

tejasaś cāgate kāle teja utsraṣṭum arhasi // (34.2) Par.?

mṛdur bhavaty avajñātas tīkṣṇād udvijate janaḥ / (35.1) Par.?

kāle prāpte dvayaṃ hyetad yo veda sa mahīpatiḥ // (35.2) Par.?

Duration=0.17642307281494 secs.