Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 2683

Click on a sentence to show its analysis
Keep the mouse pointer over a lemma to show its meanings.

vaiśampāyana uvāca / (1.1) Par.?

tataḥ saṃhṛtya vipulaṃ tad vapuḥ kāmavardhitam / (1.2) Par.?

bhīmasenaṃ punar dorbhyāṃ paryaṣvajata vānaraḥ // (1.3) Par.?

pariṣvaktasya tasyāśu bhrātrā bhīmasya bhārata / (2.1) Par.?

śramo nāśam upāgacchat sarvaṃ cāsīt pradakṣiṇam // (2.2) Par.?

tataḥ punar athovāca paryaśrunayano hariḥ / (3.1) Par.?

bhīmam ābhāṣya sauhārdād bāṣpagadgadayā girā // (3.2) Par.?

gaccha vīra svam āvāsaṃ smartavyo 'smi kathāntare / (4.1) Par.?

ihasthaśca kuruśreṣṭha na nivedyo 'smi kasyacit // (4.2) Par.?

dhanadasyālayāccāpi visṛṣṭānāṃ mahābala / (5.1) Par.?

deśakāla ihāyātuṃ devagandharvayoṣitām // (5.2) Par.?

mamāpi saphalaṃ cakṣuḥ smāritaś cāsmi rāghavam / (6.1) Par.?

mānuṣaṃ gātrasaṃsparśaṃ gatvā bhīma tvayā saha // (6.2) Par.?

tad asmaddarśanaṃ vīra kaunteyāmogham astu te / (7.1) Par.?

bhrātṛtvaṃ tvaṃ puraskṛtya varaṃ varaya bhārata // (7.2) Par.?

yadi tāvan mayā kṣudrā gatvā vāraṇasāhvayam / (8.1) Par.?

dhārtarāṣṭrā nihantavyā yāvad etat karomyaham // (8.2) Par.?

śilayā nagaraṃ vā tan marditavyaṃ mayā yadi / (9.1) Par.?

yāvad adya karomyetat kāmaṃ tava mahābala // (9.2) Par.?

bhīmasenas tu tad vākyaṃ śrutvā tasya mahātmanaḥ / (10.1) Par.?

pratyuvāca hanūmantaṃ prahṛṣṭenāntarātmanā // (10.2) Par.?

kṛtam eva tvayā sarvaṃ mama vānarapuṃgava / (11.1) Par.?

svasti te 'stu mahābāho kṣāmaye tvāṃ prasīda me // (11.2) Par.?

sanāthāḥ pāṇḍavāḥ sarve tvayā nāthena vīryavan / (12.1) Par.?

tavaiva tejasā sarvān vijeṣyāmo vayaṃ ripūn // (12.2) Par.?

evam uktas tu hanumān bhīmasenam abhāṣata / (13.1) Par.?

bhrātṛtvāt sauhṛdāccāpi kariṣyāmi tava priyam // (13.2) Par.?

camūṃ vigāhya śatrūṇāṃ śaraśaktisamākulām / (14.1) Par.?

yadā siṃharavaṃ vīra kariṣyasi mahābala / (14.2) Par.?

tadāhaṃ bṛṃhayiṣyāmi svaraveṇa ravaṃ tava // (14.3) Par.?

vijayasya dhvajasthaś ca nādān mokṣyāmi dāruṇān / (15.1) Par.?

śatrūṇāṃ te prāṇaharān ityuktvāntaradhīyata // (15.2) Par.?

gate tasmin harivare bhīmo 'pi balināṃ varaḥ / (16.1) Par.?

tena mārgeṇa vipulaṃ vyacarad gandhamādanam // (16.2) Par.?

anusmaran vapus tasya śriyaṃ cāpratimāṃ bhuvi / (17.1) Par.?

māhātmyam anubhāvaṃ ca smaran dāśarather yayau // (17.2) Par.?

sa tāni ramaṇīyāni vanānyupavanāni ca / (18.1) Par.?

viloḍayāmāsa tadā saugandhikavanepsayā // (18.2) Par.?

phullapadmavicitrāṇi puṣpitāni vanāni ca / (19.1) Par.?

mattavāraṇayūthāni paṅkaklinnāni bhārata / (19.2) Par.?

varṣatām iva meghānāṃ vṛndāni dadṛśe tadā // (19.3) Par.?

hariṇaiś cañcalāpāṅgair hariṇīsahitair vane / (20.1) Par.?

saśaṣpakavalaiḥ śrīmān pathi dṛṣṭo drutaṃ yayau // (20.2) Par.?

mahiṣaiś ca varāhaiś ca śārdūlaiśca niṣevitam / (21.1) Par.?

vyapetabhīr giriṃ śauryād bhīmaseno vyagāhata // (21.2) Par.?

kusumānataśākhaiś ca tāmrapallavakomalaiḥ / (22.1) Par.?

yācyamāna ivāraṇye drumair mārutakampitaiḥ // (22.2) Par.?

kṛtapadmāñjalipuṭā mattaṣaṭpadasevitāḥ / (23.1) Par.?

priyatīrthavanā mārge padminīḥ samatikraman // (23.2) Par.?

sajjamānamanodṛṣṭiḥ phulleṣu girisānuṣu / (24.1) Par.?

draupadīvākyapātheyo bhīmaḥ śīghrataraṃ yayau // (24.2) Par.?

parivṛtte 'hani tataḥ prakīrṇahariṇe vane / (25.1) Par.?

kāñcanair vimalaiḥ padmair dadarśa vipulāṃ nadīm // (25.2) Par.?

mattakāraṇḍavayutāṃ cakravākopaśobhitām / (26.1) Par.?

racitām iva tasyādrer mālāṃ vimalapaṅkajām // (26.2) Par.?

tasyāṃ nadyāṃ mahāsattvaḥ saugandhikavanaṃ mahat / (27.1) Par.?

apaśyat prītijananaṃ bālārkasadṛśadyuti // (27.2) Par.?

tad dṛṣṭvā labdhakāmaḥ sa manasā pāṇḍunandanaḥ / (28.1) Par.?

vanavāsaparikliṣṭāṃ jagāma manasā priyām // (28.2) Par.?

Duration=0.091698884963989 secs.