Texts

vaiśampāyana uvāca / (1.1) Par.?

tasmin nagendre vasatāṃ tu teṣāṃ mahātmanāṃ sadvratam āsthitānām / (1.2) Par.?

ratiḥ pramodaś ca babhūva teṣām ākāṅkṣatāṃ darśanam arjunasya // (1.3) Par.?

tān vīryayuktān suviśuddhasattvāṃs tejasvinaḥ satyadhṛtipradhānān / (2.1) Par.?

saṃprīyamāṇā bahavo 'bhijagmur gandharvasaṃghāśca maharṣayaśca // (2.2) Par.?

taṃ pādapaiḥ puṣpadharair upetaṃ nagottamaṃ prāpya mahārathānām / (3.1) Par.?

manaḥprasādaḥ paramo babhūva yathā divaṃ prāpya marudgaṇānām // (3.2) Par.?

mayūrahaṃsasvananāditāni puṣpopakīrṇāni mahācalasya / (4.1) Par.?

śṛṅgāṇi sānūni ca paśyamānā gireḥ paraṃ harṣam avāpya tasthuḥ // (4.2) Par.?

sākṣāt kubereṇa kṛtāś ca tasmin nagottame saṃvṛtakūlarodhasaḥ / (5.1) Par.?

kādambakāraṇḍavahaṃsajuṣṭāḥ padmākulāḥ puṣkariṇīr apaśyan // (5.2) Par.?

krīḍāpradeśāṃś ca samṛddharūpān sucitramālyāvṛtajātaśobhān / (6.1) Par.?

maṇipravekān sumanoharāṃś ca yathā bhaveyur dhanadasya rājñaḥ // (6.2) Par.?

anekavarṇaiśca sugandhibhiś ca mahādrumaiḥ saṃtatam abhramālibhiḥ / (7.1) Par.?

tapaḥpradhānāḥ satataṃ carantaḥ śṛṅgaṃ gireś cintayituṃ na śekuḥ // (7.2) Par.?

svatejasā tasya nagottamasya mahauṣadhīnāṃ ca tathā prabhāvāt / (8.1) Par.?

vibhaktabhāvo na babhūva kaścid aharniśānāṃ puruṣapravīra // (8.2) Par.?

yam āsthitaḥ sthāvarajaṅgamāni vibhāvasur bhāvayate 'mitaujāḥ / (9.1) Par.?

tasyodayaṃ cāstamayaṃ ca vīrās tatra sthitās te dadṛśur nṛsiṃhāḥ // (9.2) Par.?

raves tamisrāgamanirgamāṃs te tathodayaṃ cāstamayaṃ ca vīrāḥ / (10.1) Par.?

samāvṛtāḥ prekṣya tamonudasya gabhastijālaiḥ pradiśo diśaś ca // (10.2) Par.?

svādhyāyavantaḥ satatakriyāś ca dharmapradhānāśca śucivratāśca / (11.1) Par.?

satye sthitās tasya mahārathasya satyavratasyāgamanapratīkṣāḥ // (11.2) Par.?

ihaiva harṣo 'stu samāgatānāṃ kṣipraṃ kṛtāstreṇa dhanaṃjayena / (12.1) Par.?

iti bruvantaḥ paramāśiṣas te pārthās tapoyogaparā babhūvuḥ // (12.2) Par.?

dṛṣṭvā vicitrāṇi girau vanāni kirīṭinaṃ cintayatām abhīkṣṇam / (13.1) Par.?

babhūva rātrir divasaś ca teṣāṃ saṃvatsareṇaiva samānarūpaḥ // (13.2) Par.?

yadaiva dhaumyānumate mahātmā kṛtvā jaṭāḥ pravrajitaḥ sa jiṣṇuḥ / (14.1) Par.?

tadaiva teṣāṃ na babhūva harṣaḥ kuto ratis tadgatamānasānām // (14.2) Par.?

bhrātur niyogāt tu yudhiṣṭhirasya vanād asau vāraṇamattagāmī / (15.1) Par.?

yat kāmyakāt pravrajitaḥ sa jiṣṇus tadaiva te śokahatā babhūvuḥ // (15.2) Par.?

tathā tu taṃ cintayatāṃ sitāśvam astrārthinaṃ vāsavam abhyupetam / (16.1) Par.?

māso 'tha kṛcchreṇa tadā vyatītas tasmin nage bhārata bhāratānām // (16.2) Par.?

tataḥ kadāciddharisamprayuktaṃ mahendravāhaṃ sahasopayātam / (17.1) Par.?

vidyutprabhaṃ prekṣya mahārathānāṃ harṣo 'rjunaṃ cintayatāṃ babhūva // (17.2) Par.?

sa dīpyamānaḥ sahasāntarikṣaṃ prakāśayan mātalisaṃgṛhītaḥ / (18.1) Par.?

babhau maholkeva ghanāntarasthā śikheva cāgner jvalitā vidhūmā // (18.2) Par.?

tam āsthitaḥ saṃdadṛśe kirīṭī sragvī varāṇyābharaṇāni bibhrat / (19.1) Par.?

dhanaṃjayo vajradharaprabhāvaḥ śriyā jvalan parvatam ājagāma // (19.2) Par.?

sa śailam āsādya kirīṭamālī mahendravāhād avaruhya tasmāt / (20.1) Par.?

dhaumyasya pādāvabhivādya pūrvam ajātaśatros tadanantaraṃ ca // (20.2) Par.?

vṛkodarasyāpi vavanda pādau mādrīsutābhyām abhivāditaś ca / (21.1) Par.?

sametya kṛṣṇāṃ parisāntvya caināṃ prahvo 'bhavad bhrātur upahvare saḥ // (21.2) Par.?

babhūva teṣāṃ paramaḥ praharṣas tenāprameyeṇa samāgatānām / (22.1) Par.?

sa cāpi tān prekṣya kirīṭamālī nananda rājānam abhipraśaṃsan // (22.2) Par.?

yam āsthitaḥ sapta jaghāna pūgān diteḥ sutānāṃ namucer nihantā / (23.1) Par.?

tam indravāhaṃ samupetya pārthāḥ pradakṣiṇaṃ cakrur adīnasattvāḥ // (23.2) Par.?

te mātaleś cakrur atīva hṛṣṭāḥ satkāram agryaṃ surarājatulyam / (24.1) Par.?

sarvaṃ yathāvacca divaukasas tān papracchur enaṃ kururājaputrāḥ // (24.2) Par.?

tān apyasau mātalir abhyanandat piteva putrān anuśiṣya cainān / (25.1) Par.?

yayau rathenāpratimaprabheṇa punaḥ sakāśaṃ tridiveśvarasya // (25.2) Par.?

gate tu tasmin varadevavāhe śakrātmajaḥ sarvaripupramāthī / (26.1) Par.?

śakreṇa dattāni dadau mahātmā mahādhanānyuttamarūpavanti / (26.2) Par.?

divākarābhāṇi vibhūṣaṇāni prītaḥ priyāyai sutasomamātre // (26.3) Par.?

tataḥ sa teṣāṃ kurupuṃgavānāṃ teṣāṃ ca sūryāgnisamaprabhāṇām / (27.1) Par.?

viprarṣabhāṇām upaviśya madhye sarvaṃ yathāvat kathayāṃbabhūva // (27.2) Par.?

evaṃ mayāstrāṇyupaśikṣitāni śakrācca vātācca śivācca sākṣāt / (28.1) Par.?

tathaiva śīlena samādhinā ca prītāḥ surā me sahitāḥ sahendrāḥ // (28.2) Par.?

saṃkṣepato vai sa viśuddhakarmā tebhyaḥ samākhyāya divi praveśam / (29.1) Par.?

mādrīsutābhyāṃ sahitaḥ kirīṭī suṣvāpa tām āvasatiṃ pratītaḥ // (29.2) Par.?