Texts

Help

Select a text:
Bibliography
Select a chapter:
 (no revisions)
Associated topic(s): war

Show parallels  Show headlines
Use dependency labeler
Chapter id: 8110
  • Click on a sentence to show its analysis
  • Keep the mouse pointer over a lemma to show its meanings.
vaiśaṃpāyana uvāca / (1.1) Par.?
etasmin eva kāle tu bhīṣmakasya mahātmanaḥ / (1.2) Par.?
hiraṇyalomno nṛpateḥ sākṣād indrasakhasya vai // (1.3) Par.?
āhṛtīnām adhipater bhojasyātiyaśasvinaḥ / (2.1) Par.?
dākṣiṇātyapateḥ putro dikṣu rukmīti viśrutaḥ // (2.2) Par.?
yaḥ kiṃpuruṣasiṃhasya gandhamādanavāsinaḥ / (3.1) Par.?
śiṣyaḥ kṛtsnaṃ dhanurvedaṃ catuṣpādam avāptavān // (3.2) Par.?
yo māhendraṃ dhanur lebhe tulyaṃ gāṇḍīvatejasā / (4.1) Par.?
śārṅgeṇa ca mahābāhuḥ saṃmitaṃ divyam akṣayam // (4.2) Par.?
trīṇyevaitāni divyāni dhanūṃṣi divicāriṇām / (5.1) Par.?
vāruṇaṃ gāṇḍivaṃ tatra māhendraṃ vijayaṃ dhanuḥ // (5.2) Par.?
śārṅgaṃ tu vaiṣṇavaṃ prāhur divyaṃ tejomayaṃ dhanuḥ / (6.1) Par.?
dhārayāmāsa yat kṛṣṇaḥ parasenābhayāvaham // (6.2) Par.?
gāṇḍīvaṃ pāvakāl lebhe khāṇḍave pākaśāsaniḥ / (7.1) Par.?
drumād rukmī mahātejā vijayaṃ pratyapadyata // (7.2) Par.?
saṃchidya mauravān pāśānnihatya muram ojasā / (8.1) Par.?
nirjitya narakaṃ bhaumam āhṛtya maṇikuṇḍale // (8.2) Par.?
ṣoḍaśa strīsahasrāṇi ratnāni vividhāni ca / (9.1) Par.?
pratipede hṛṣīkeśaḥ śārṅgaṃ ca dhanur uttamam // (9.2) Par.?
rukmī tu vijayaṃ labdhvā dhanur meghasamasvanam / (10.1) Par.?
vibhīṣayann iva jagat pāṇḍavān abhyavartata // (10.2) Par.?
nāmṛṣyata purā yo 'sau svabāhubaladarpitaḥ / (11.1) Par.?
rukmiṇyā haraṇaṃ vīro vāsudevena dhīmatā // (11.2) Par.?
kṛtvā pratijñāṃ nāhatvā nivartiṣyāmi keśavam / (12.1) Par.?
tato 'nvadhāvad vārṣṇeyaṃ sarvaśastrabhṛtāṃ varam // (12.2) Par.?
senayā caturaṅgiṇyā mahatyā dūrapātayā / (13.1) Par.?
vicitrāyudhavarmiṇyā gaṅgayeva pravṛddhayā // (13.2) Par.?
sa samāsādya vārṣṇeyaṃ yogānām īśvaraṃ prabhum / (14.1) Par.?
vyaṃsito vrīḍito rājann ājagāma sa kuṇḍinam // (14.2) Par.?
yatraiva kṛṣṇena raṇe nirjitaḥ paravīrahā / (15.1) Par.?
tatra bhojakaṭaṃ nāma cakre nagaram uttamam // (15.2) Par.?
sainyena mahatā tena prabhūtagajavājinā / (16.1) Par.?
puraṃ tad bhuvi vikhyātaṃ nāmnā bhojakaṭaṃ nṛpa // (16.2) Par.?
sa bhojarājaḥ sainyena mahatā parivāritaḥ / (17.1) Par.?
akṣauhiṇyā mahāvīryaḥ pāṇḍavān samupāgamat // (17.2) Par.?
tataḥ sa kavacī khaḍgī śarī dhanvī talī rathī / (18.1) Par.?
dhvajenādityavarṇena praviveśa mahācamūm // (18.2) Par.?
viditaḥ pāṇḍaveyānāṃ vāsudevapriyepsayā / (19.1) Par.?
yudhiṣṭhirastu taṃ rājā pratyudgamyābhyapūjayat // (19.2) Par.?
sa pūjitaḥ pāṇḍusutair yathānyāyaṃ susatkṛtaḥ / (20.1) Par.?
pratipūjya ca tān sarvān viśrāntaḥ sahasainikaḥ / (20.2) Par.?
uvāca madhye vīrāṇāṃ kuntīputraṃ dhanaṃjayam // (20.3) Par.?
sahāyo 'smi sthito yuddhe yadi bhīto 'si pāṇḍava / (21.1) Par.?
kariṣyāmi raṇe sāhyam asahyaṃ tava śatrubhiḥ // (21.2) Par.?
na hi me vikrame tulyaḥ pumān astīha kaścana / (22.1) Par.?
nihatya samare śatrūṃstava dāsyāmi phalguna // (22.2) Par.?
ityukto dharmarājasya keśavasya ca saṃnidhau / (23.1) Par.?
śṛṇvatāṃ pārthivendrāṇām anyeṣāṃ caiva sarvaśaḥ // (23.2) Par.?
vāsudevam abhiprekṣya dharmarājaṃ ca pāṇḍavam / (24.1) Par.?
uvāca dhīmān kaunteyaḥ prahasya sakhipūrvakam // (24.2) Par.?
yudhyamānasya me vīra gandharvaiḥ sumahābalaiḥ / (25.1) Par.?
sahāyo ghoṣayātrāyāṃ kastadāsīt sakhā mama // (25.2) Par.?
tathā pratibhaye tasmin devadānavasaṃkule / (26.1) Par.?
khāṇḍave yudhyamānasya kaḥ sahāyastadābhavat // (26.2) Par.?
nivātakavacair yuddhe kālakeyaiśca dānavaiḥ / (27.1) Par.?
tatra me yudhyamānasya kaḥ sahāyastadābhavat // (27.2) Par.?
tathā virāṭanagare kurubhiḥ saha saṃgare / (28.1) Par.?
yudhyato bahubhistāta kaḥ sahāyo 'bhavanmama // (28.2) Par.?
upajīvya raṇe rudraṃ śakraṃ vaiśravaṇaṃ yamam / (29.1) Par.?
varuṇaṃ pāvakaṃ caiva kṛpaṃ droṇaṃ ca mādhavam // (29.2) Par.?
dhārayan gāṇḍivaṃ divyaṃ dhanustejomayaṃ dṛḍham / (30.1) Par.?
akṣayyaśarasaṃyukto divyāstraparibṛṃhitaḥ // (30.2) Par.?
kauravāṇāṃ kule jātaḥ pāṇḍoḥ putro viśeṣataḥ / (31.1) Par.?
droṇaṃ vyapadiśañ śiṣyo vāsudevasahāyavān // (31.2) Par.?
katham asmadvidho brūyād bhīto 'smītyayaśaskaram / (32.1) Par.?
vacanaṃ naraśārdūla vajrāyudham api svayam // (32.2) Par.?
nāsmi bhīto mahābāho sahāyārthaśca nāsti me / (33.1) Par.?
yathākāmaṃ yathāyogaṃ gaccha vānyatra tiṣṭha vā // (33.2) Par.?
vinivartya tato rukmī senāṃ sāgarasaṃnibhām / (34.1) Par.?
duryodhanam upāgacchat tathaiva bharatarṣabha // (34.2) Par.?
tathaiva cābhigamyainam uvāca sa narādhipaḥ / (35.1) Par.?
pratyākhyātaśca tenāpi sa tadā śūramāninā // (35.2) Par.?
dvāveva tu mahārāja tasmād yuddhād vyapeyatuḥ / (36.1) Par.?
rauhiṇeyaśca vārṣṇeyo rukmī ca vasudhādhipaḥ // (36.2) Par.?
gate rāme tīrthayātrāṃ bhīṣmakasya sute tathā / (37.1) Par.?
upāviśan pāṇḍaveyā mantrāya punar eva hi // (37.2) Par.?
samitir dharmarājasya sā pārthivasamākulā / (38.1) Par.?
śuśubhe tārakācitrā dyauścandreṇeva bhārata // (38.2) Par.?
Duration=0.15457701683044 secs.