Texts

Help

Select a text:
Bibliography
Select a chapter:
 (no revisions)
Associated topic(s): war

Show parallels  Show headlines
Use dependency labeler
Chapter id: 8117
  • Click on a sentence to show its analysis
  • Keep the mouse pointer over a lemma to show its meanings.
dhṛtarāṣṭra uvāca / (1.1) Par.?
pratijñāte phalgunena vadhe bhīṣmasya saṃjaya / (1.2) Par.?
kim akurvanta me mandāḥ putrā duryodhanādayaḥ // (1.3) Par.?
hatam eva hi paśyāmi gāṅgeyaṃ pitaraṃ raṇe / (2.1) Par.?
vāsudevasahāyena pārthena dṛḍhadhanvanā // (2.2) Par.?
sa cāparimitaprajñastacchrutvā pārthabhāṣitam / (3.1) Par.?
kim uktavānmaheṣvāso bhīṣmaḥ praharatāṃ varaḥ // (3.2) Par.?
senāpatyaṃ ca samprāpya kauravāṇāṃ dhuraṃdharaḥ / (4.1) Par.?
kim aceṣṭata gāṅgeyo mahābuddhiparākramaḥ // (4.2) Par.?
vaiśaṃpāyana uvāca / (5.1) Par.?
tatastat saṃjayastasmai sarvam eva nyavedayat / (5.2) Par.?
yathoktaṃ kuruvṛddhena bhīṣmeṇāmitatejasā // (5.3) Par.?
saṃjaya uvāca / (6.1) Par.?
senāpatyam anuprāpya bhīṣmaḥ śāṃtanavo nṛpa / (6.2) Par.?
duryodhanam uvācedaṃ vacanaṃ harṣayann iva // (6.3) Par.?
namaskṛtvā kumārāya senānye śaktipāṇaye / (7.1) Par.?
ahaṃ senāpatiste 'dya bhaviṣyāmi na saṃśayaḥ // (7.2) Par.?
senākarmaṇyabhijño 'smi vyūheṣu vividheṣu ca / (8.1) Par.?
karma kārayituṃ caiva bhṛtān apyabhṛtāṃstathā // (8.2) Par.?
yātrāyāneṣu yuddheṣu labdhapraśamaneṣu ca / (9.1) Par.?
bhṛśaṃ veda mahārāja yathā veda bṛhaspatiḥ // (9.2) Par.?
vyūhān api mahārambhān daivagāndharvamānuṣān / (10.1) Par.?
tair ahaṃ mohayiṣyāmi pāṇḍavān vyetu te jvaraḥ // (10.2) Par.?
so 'haṃ yotsyāmi tattvena pālayaṃstava vāhinīm / (11.1) Par.?
yathāvacchāstrato rājan vyetu te mānaso jvaraḥ // (11.2) Par.?
duryodhana uvāca / (12.1) Par.?
na vidyate me gāṅgeya bhayaṃ devāsureṣvapi / (12.2) Par.?
samasteṣu mahābāho satyam etad bravīmi te // (12.3) Par.?
kiṃ punastvayi durdharṣe senāpatye vyavasthite / (13.1) Par.?
droṇe ca puruṣavyāghre sthite yuddhābhinandini // (13.2) Par.?
bhavadbhyāṃ puruṣāgryābhyāṃ sthitābhyāṃ vijayo mama / (14.1) Par.?
na durlabhaṃ kuruśreṣṭha devarājyam api dhruvam // (14.2) Par.?
rathasaṃkhyāṃ tu kārtsnyena pareṣām ātmanastathā / (15.1) Par.?
tathaivātirathānāṃ ca vettum icchāmi kaurava // (15.2) Par.?
pitāmaho hi kuśalaḥ pareṣām ātmanastathā / (16.1) Par.?
śrotum icchāmyahaṃ sarvaiḥ sahaibhir vasudhādhipaiḥ // (16.2) Par.?
bhīṣma uvāca / (17.1) Par.?
gāndhāre śṛṇu rājendra rathasaṃkhyāṃ svake bale / (17.2) Par.?
ye rathāḥ pṛthivīpāla tathaivātirathāśca ye // (17.3) Par.?
bahūnīha sahasrāṇi prayutānyarbudāni ca / (18.1) Par.?
rathānāṃ tava senāyāṃ yathāmukhyaṃ tu me śṛṇu // (18.2) Par.?
bhavān agre rathodāraḥ saha sarvaiḥ sahodaraiḥ / (19.1) Par.?
duḥśāsanaprabhṛtibhir bhrātṛbhiḥ śatasaṃmitaiḥ // (19.2) Par.?
sarve kṛtapraharaṇāśchedyabhedyaviśāradāḥ / (20.1) Par.?
rathopasthe gajaskandhe gadāyuddhe 'sicarmaṇi // (20.2) Par.?
saṃyantāraḥ prahartāraḥ kṛtāstrā bhārasādhanāḥ / (21.1) Par.?
iṣvastre droṇaśiṣyāśca kṛpasya ca śaradvataḥ // (21.2) Par.?
ete haniṣyanti raṇe pāñcālān yuddhadurmadān / (22.1) Par.?
kṛtakilbiṣāḥ pāṇḍaveyair dhārtarāṣṭrā manasvinaḥ // (22.2) Par.?
tato 'haṃ bharataśreṣṭha sarvasenāpatistava / (23.1) Par.?
śatrūn vidhvaṃsayiṣyāmi kadarthīkṛtya pāṇḍavān / (23.2) Par.?
na tvātmano guṇān vaktum arhāmi vidito 'smi te // (23.3) Par.?
kṛtavarmā tvatiratho bhojaḥ praharatāṃ varaḥ / (24.1) Par.?
arthasiddhiṃ tava raṇe kariṣyati na saṃśayaḥ // (24.2) Par.?
astravidbhir anādhṛṣyo dūrapātī dṛḍhāyudhaḥ / (25.1) Par.?
haniṣyati ripūṃstubhyaṃ mahendro dānavān iva // (25.2) Par.?
madrarājo maheṣvāsaḥ śalyo me 'tiratho mataḥ / (26.1) Par.?
spardhate vāsudevena yo vai nityaṃ raṇe raṇe // (26.2) Par.?
bhāgineyānnijāṃstyaktvā śalyaste rathasattamaḥ / (27.1) Par.?
eṣa yotsyati saṃgrāme kṛṣṇaṃ cakragadādharam // (27.2) Par.?
sāgarormisamair vegaiḥ plāvayann iva śātravān / (28.1) Par.?
bhūriśravāḥ kṛtāstraśca tava cāpi hitaḥ suhṛt // (28.2) Par.?
saumadattir maheṣvāso rathayūthapayūthapaḥ / (29.1) Par.?
balakṣayam amitrāṇāṃ sumahāntaṃ kariṣyati // (29.2) Par.?
sindhurājo mahārāja mato me dviguṇo rathaḥ / (30.1) Par.?
yotsyate samare rājan vikrānto rathasattamaḥ // (30.2) Par.?
draupadīharaṇe pūrvaṃ parikliṣṭaḥ sa pāṇḍavaiḥ / (31.1) Par.?
saṃsmaraṃstaṃ parikleśaṃ yotsyate paravīrahā // (31.2) Par.?
etena hi tadā rājaṃstapa āsthāya dāruṇam / (32.1) Par.?
sudurlabho varo labdhaḥ pāṇḍavān yoddhum āhave // (32.2) Par.?
sa eṣa rathaśārdūlastad vairaṃ saṃsmaran raṇe / (33.1) Par.?
yotsyate pāṇḍavāṃstāta prāṇāṃstyaktvā sudustyajān // (33.2) Par.?
Duration=0.18066692352295 secs.