Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 8586

Click on a sentence to show its analysis
Keep the mouse pointer over a lemma to show its meanings.

saṃjaya uvāca / (1.1) Par.?

śvetāśvo 'pi mahārāja vyadhamat tāvakaṃ balam / (1.2) Par.?

yathā vāyuḥ samāsādya tūlarāśiṃ samantataḥ // (1.3) Par.?

pratyudyayus trigartās taṃ śibayaḥ kauravaiḥ saha / (2.1) Par.?

śālvāḥ saṃśaptakāś caiva nārāyaṇabalaṃ ca yat // (2.2) Par.?

satyasenaḥ satyakīrtir mitradevaḥ śrutaṃjayaḥ / (3.1) Par.?

sauśrutiś citrasenaś ca mitravarmā ca bhārata // (3.2) Par.?

trigartarājaḥ samare bhrātṛbhiḥ parivāritaḥ / (4.1) Par.?

putraiś caiva maheṣvāsair nānāśastradharair yudhi // (4.2) Par.?

te sṛjantaḥ śaravrātān kiranto 'rjunam āhave / (5.1) Par.?

abhyadravanta samare vāryoghā iva sāgaram // (5.2) Par.?

te tv arjunaṃ samāsādya yodhāḥ śatasahasraśaḥ / (6.1) Par.?

agacchan vilayaṃ sarve tārkṣyaṃ dṛṣṭveva pannagāḥ // (6.2) Par.?

te vadhyamānāḥ samare nājahuḥ pāṇḍavaṃ tadā / (7.1) Par.?

dahyamānā yathā rājañ śalabhā iva pāvakam // (7.2) Par.?

satyasenas tribhir bāṇair vivyādha yudhi pāṇḍavam / (8.1) Par.?

mitradevas triṣaṣṭyā ca candradevaś ca saptabhiḥ // (8.2) Par.?

mitravarmā trisaptatyā sauśrutiś cāpi pañcabhiḥ / (9.1) Par.?

śatruṃjayaś ca viṃśatyā suśarmā navabhiḥ śaraiḥ // (9.2) Par.?

śatruṃjayaṃ ca rājānaṃ hatvā tatra śilāśitaiḥ / (10.1) Par.?

sauśruteḥ saśirastrāṇaṃ śiraḥ kāyād apāharat / (10.2) Par.?

tvaritaś candradevaṃ ca śarair ninye yamakṣayam // (10.3) Par.?

athetarān mahārāja yatamānān mahārathān / (11.1) Par.?

pañcabhiḥ pañcabhir bāṇair ekaikaṃ pratyavārayat // (11.2) Par.?

satyasenas tu saṃkruddhas tomaraṃ vyasṛjan mahat / (12.1) Par.?

samuddiśya raṇe kṛṣṇaṃ siṃhanādaṃ nanāda ca // (12.2) Par.?

sa nirbhidya bhujaṃ savyaṃ mādhavasya mahātmanaḥ / (13.1) Par.?

ayasmayo mahācaṇḍo jagāma dharaṇīṃ tadā // (13.2) Par.?

mādhavasya tu viddhasya tomareṇa mahāraṇe / (14.1) Par.?

pratodaḥ prāpataddhastād raśmayaś ca viśāṃ pate // (14.2) Par.?

sa pratodaṃ punar gṛhya raśmīṃś caiva mahāyaśāḥ / (15.1) Par.?

vāhayāmāsa tān aśvān satyasenarathaṃ prati // (15.2) Par.?

viṣvaksenaṃ tu nirbhinnaṃ prekṣya pārtho dhanaṃjayaḥ / (16.1) Par.?

satyasenaṃ śarais tīkṣṇair dārayitvā mahābalaḥ // (16.2) Par.?

tataḥ suniśitair bāṇai rājñas tasya mahacchiraḥ / (17.1) Par.?

kuṇḍalopacitaṃ kāyāc cakarta pṛtanāntare // (17.2) Par.?

taṃ nihatya śitair bāṇair mitravarmāṇam ākṣipat / (18.1) Par.?

vatsadantena tīkṣṇena sārathiṃ cāsya māriṣa // (18.2) Par.?

tataḥ śaraśatair bhūyaḥ saṃśaptakagaṇān vaśī / (19.1) Par.?

pātayāmāsa saṃkruddhaḥ śataśo 'tha sahasraśaḥ // (19.2) Par.?

tato rajatapuṅkhena rājñaḥ śīrṣaṃ mahātmanaḥ / (20.1) Par.?

mitradevasya cicheda kṣurapreṇa mahāyaśāḥ / (20.2) Par.?

suśarmāṇaṃ ca saṃkruddho jatrudeśe samārdayat // (20.3) Par.?

tataḥ saṃśaptakāḥ sarve parivārya dhanaṃjayam / (21.1) Par.?

śastraughair mamṛduḥ kruddhā nādayanto diśo daśa // (21.2) Par.?

abhyarditas tu tair jiṣṇuḥ śakratulyaparākramaḥ / (22.1) Par.?

aindram astram ameyātmā prāduścakre mahārathaḥ / (22.2) Par.?

tataḥ śarasahasrāṇi prādurāsan viśāṃ pate // (22.3) Par.?

dhvajānāṃ chidyamānānāṃ kārmukāṇāṃ ca saṃyuge / (23.1) Par.?

rathānāṃ sapatākānāṃ tūṇīrāṇāṃ śaraiḥ saha // (23.2) Par.?

akṣāṇām atha yoktrāṇāṃ cakrāṇāṃ raśmibhiḥ saha / (24.1) Par.?

kūbarāṇāṃ varūthānāṃ pṛṣatkānāṃ ca saṃyuge // (24.2) Par.?

aśmanāṃ patatāṃ caiva prāsānām ṛṣṭibhiḥ saha / (25.1) Par.?

gadānāṃ parighāṇāṃ ca śaktīnāṃ tomaraiḥ saha // (25.2) Par.?

śataghnīnāṃ sacakrāṇāṃ bhujānām ūrubhiḥ saha / (26.1) Par.?

kaṇṭhasūtrāṅgadānāṃ ca keyūrāṇāṃ ca māriṣa // (26.2) Par.?

hārāṇām atha niṣkāṇāṃ tanutrāṇāṃ ca bhārata / (27.1) Par.?

chatrāṇāṃ vyajanānāṃ ca śirasāṃ mukuṭaiḥ saha / (27.2) Par.?

aśrūyata mahāñ śabdas tatra tatra viśāṃ pate // (27.3) Par.?

sakuṇḍalāni svakṣīṇi pūrṇacandranibhāni ca / (28.1) Par.?

śirāṃsy urvyām adṛśyanta tārāgaṇa ivāmbare // (28.2) Par.?

susragvīṇi suvāsāṃsi candanenokṣitāni ca / (29.1) Par.?

śarīrāṇi vyadṛśyanta hatānāṃ ca mahītale / (29.2) Par.?

gandharvanagarākāraṃ ghoram āyodhanaṃ tadā // (29.3) Par.?

nihatai rājaputraiś ca kṣatriyaiś ca mahābalaiḥ / (30.1) Par.?

hastibhiḥ patitaiś caiva turagaiś cābhavan mahī / (30.2) Par.?

agamyamārgā samare viśīrṇair iva parvataiḥ // (30.3) Par.?

nāsīc cakrapathaś caiva pāṇḍavasya mahātmanaḥ / (31.1) Par.?

nighnataḥ śātravān bhallair hastyaśvaṃ cāmitaṃ mahat // (31.2) Par.?

ā tumbād avasīdanti rathacakrāṇi māriṣa / (32.1) Par.?

raṇe vicaratas tasya tasmiṃl lohitakardame // (32.2) Par.?

sīdamānāni cakrāṇi samūhus turagā bhṛśam / (33.1) Par.?

śrameṇa mahatā yuktā manomārutaraṃhasaḥ // (33.2) Par.?

vadhyamānaṃ tu tat sainyaṃ pāṇḍuputreṇa dhanvinā / (34.1) Par.?

prāyaśo vimukhaṃ sarvaṃ nāvatiṣṭhata saṃyuge // (34.2) Par.?

tāñ jitvā samare jiṣṇuḥ saṃśaptakagaṇān bahūn / (35.1) Par.?

rarāja sa mahārāja vidhūmo 'gnir iva jvalan // (35.2) Par.?

yudhiṣṭhiraṃ mahārāja visṛjantaṃ śarān bahūn / (36.1) Par.?

svayaṃ duryodhano rājā pratyagṛhṇād abhītavat // (36.2) Par.?

tam āpatantaṃ sahasā tava putraṃ mahābalam / (37.1) Par.?

dharmarājo drutaṃ viddhvā tiṣṭha tiṣṭheti cābravīt // (37.2) Par.?

sā ca taṃ prativivyādha navabhir niśitaiḥ śaraiḥ / (38.1) Par.?

sārathiṃ cāsya bhallena bhṛśaṃ kruddho 'bhyatāḍayat // (38.2) Par.?

tato yudhiṣṭhiro rājā hemapuṅkhāñ śilīmukhān / (39.1) Par.?

duryodhanāya cikṣepa trayodaśa śilāśitān // (39.2) Par.?

caturbhiś caturo vāhāṃs tasya hatvā mahārathaḥ / (40.1) Par.?

pañcamena śiraḥ kāyāt sārathes tu samākṣipat // (40.2) Par.?

ṣaṣṭhena ca dhvajaṃ rājñaḥ saptamena ca kārmukam / (41.1) Par.?

aṣṭamena tathā khaḍgaṃ pātayāmāsa bhūtale / (41.2) Par.?

pañcabhir nṛpatiṃ cāpi dharmarājo 'rdayad bhṛśam // (41.3) Par.?

hatāśvāt tu rathāt tasmād avaplutya sutas tava / (42.1) Par.?

uttamaṃ vyasanaṃ prāpto bhūmāv eva vyatiṣṭhata // (42.2) Par.?

taṃ tu kṛcchragataṃ dṛṣṭvā karṇadrauṇikṛpādayaḥ / (43.1) Par.?

abhyavartanta sahitāḥ parīpsanto narādhipam // (43.2) Par.?

atha pāṇḍusutāḥ sarve parivārya yudhiṣṭhiram / (44.1) Par.?

abhyayuḥ samare rājaṃs tato yuddham avartata // (44.2) Par.?

atha tūryasahasrāṇi prāvādyanta mahāmṛdhe / (45.1) Par.?

kṣveḍāḥ kilakilāśabdāḥ prādurāsan mahīpate / (45.2) Par.?

yad abhyagacchan samare pāñcālāḥ kauravaiḥ saha // (45.3) Par.?

narā naraiḥ samājagmur vāraṇā varavāraṇaiḥ / (46.1) Par.?

rathāś ca rathibhiḥ sārdhaṃ hayāś ca hayasādibhiḥ // (46.2) Par.?

dvaṃdvāny āsan mahārāja prekṣaṇīyāni saṃyuge / (47.1) Par.?

vismāpanāny acintyāni śastravanty uttamāni ca // (47.2) Par.?

ayudhyanta mahāvegāḥ parasparavadhaiṣiṇaḥ / (48.1) Par.?

anyonyaṃ samare jaghnur yodhavratam anuṣṭhitāḥ / (48.2) Par.?

na hi te samaraṃ cakruḥ pṛṣṭhato vai kathaṃcana // (48.3) Par.?

muhūrtam eva tad yuddham āsīn madhuradarśanam / (49.1) Par.?

tata unmattavad rājan nirmaryādam avartata // (49.2) Par.?

rathī nāgaṃ samāsādya vicaran raṇamūrdhani / (50.1) Par.?

preṣayāmāsa kālāya śaraiḥ saṃnataparvabhiḥ // (50.2) Par.?

nāgā hayān samāsādya vikṣipanto bahūn atha / (51.1) Par.?

drāvayāmāsur atyugrās tatra tatra tadā tadā // (51.2) Par.?

vidrāvya ca bahūn aśvān nāgā rājan balotkaṭāḥ / (52.1) Par.?

viṣāṇaiś cāpare jaghnur mamṛduś cāpare bhṛśam // (52.2) Par.?

sāśvārohāṃś ca turagān viṣāṇair bibhidū raṇe / (53.1) Par.?

aparāṃś cikṣipur vegāt pragṛhyātibalās tathā // (53.2) Par.?

pādātair āhatā nāgā vivareṣu samantataḥ / (54.1) Par.?

cakrur ārtasvaraṃ ghoraṃ vyadravanta diśo daśa // (54.2) Par.?

padātīnāṃ tu sahasā pradrutānāṃ mahāmṛdhe / (55.1) Par.?

utsṛjyābharaṇaṃ tūrṇam avaplutya raṇājire // (55.2) Par.?

nimittaṃ manyamānās tu pariṇamya mahāgajāḥ / (56.1) Par.?

jagṛhur bibhiduś caiva citrāṇy ābharaṇāni ca // (56.2) Par.?

pratimāneṣu kumbheṣu dantaveṣṭeṣu cāpare / (57.1) Par.?

nigṛhītā bhṛśaṃ nāgāḥ prāsatomaraśaktibhiḥ // (57.2) Par.?

nigṛhya ca gadāḥ kecit pārśvasthair bhṛśadāruṇaiḥ / (58.1) Par.?

rathāśvasādibhis tatra saṃbhinnā nyapatan bhuvi // (58.2) Par.?

sarathaṃ sādinaṃ tatra apare tu mahāgajāḥ / (59.1) Par.?

bhūmāv amṛdnan vegena savarmāṇaṃ patākinam // (59.2) Par.?

rathaṃ nāgāḥ samāsādya dhuri gṛhya ca māriṣa / (60.1) Par.?

vyākṣipan sahasā tatra ghorarūpe mahāmṛdhe // (60.2) Par.?

nārācair nihataś cāpi nipapāta mahāgajaḥ / (61.1) Par.?

parvatasyeva śikharaṃ vajrabhagnaṃ mahītale // (61.2) Par.?

yodhā yodhān samāsādya muṣṭibhir vyahanan yudhi / (62.1) Par.?

keśeṣv anyonyam ākṣipya cichidur bibhiduḥ saha // (62.2) Par.?

udyamya ca bhujāv anyo nikṣipya ca mahītale / (63.1) Par.?

padā coraḥ samākramya sphurato vyahanacchiraḥ // (63.2) Par.?

mṛtam anyo mahārāja padbhyāṃ tāḍitavāṃs tadā / (64.1) Par.?

jīvataś ca tathaivānyaḥ śastraṃ kāye nyamajjayat // (64.2) Par.?

muṣṭiyuddhaṃ mahac cāsīd yodhānāṃ tatra bhārata / (65.1) Par.?

tathā keśagrahaś cogro bāhuyuddhaṃ ca kevalam // (65.2) Par.?

samāsaktasya cānyena avijñātas tathāparaḥ / (66.1) Par.?

jahāra samare prāṇān nānāśastrair anekadhā // (66.2) Par.?

saṃsakteṣu ca yodheṣu vartamāne ca saṃkule / (67.1) Par.?

kabandhāny utthitāni sma śataśo 'tha sahasraśaḥ // (67.2) Par.?

lohitaiḥ sicyamānāni śastrāṇi kavacāni ca / (68.1) Par.?

mahāraṅgānuraktāni vastrāṇīva cakāśire // (68.2) Par.?

evam etan mahāyuddhaṃ dāruṇaṃ bhṛśasaṃkulam / (69.1) Par.?

unmattaraṅgapratimaṃ śabdenāpūrayaj jagat // (69.2) Par.?

naiva sve na pare rājan vijñāyante śarāturāḥ / (70.1) Par.?

yoddhavyam iti yudhyante rājāno jayagṛddhinaḥ // (70.2) Par.?

svān sve jaghnur mahārāja parāṃś caiva samāgatān / (71.1) Par.?

ubhayoḥ senayor vīrair vyākulaṃ samapadyata // (71.2) Par.?

rathair bhagnair mahārāja vāraṇaiś ca nipātitaiḥ / (72.1) Par.?

hayaiś ca patitais tatra naraiś ca vinipātitaiḥ // (72.2) Par.?

agamyarūpā pṛthivī māṃsaśoṇitakardamā / (73.1) Par.?

kṣaṇenāsīn mahārāja kṣatajaughapravartinī // (73.2) Par.?

pāñcālān avadhīt karṇas trigartāṃś ca dhanaṃjayaḥ / (74.1) Par.?

bhīmasenaḥ kurūn rājan hastyanīkaṃ ca sarvaśaḥ // (74.2) Par.?

evam eṣa kṣayo vṛttaḥ kurupāṇḍavasenayoḥ / (75.1) Par.?

aparāhṇe mahārāja kāṅkṣantyor vipulaṃ jayam // (75.2) Par.?

Duration=0.23609399795532 secs.