Texts

Help

Select a text:
Bibliography

Select a chapter:
(no revisions)

Associated topic(s): war

Show parallels Show headlines
Use dependency labeler

Chapter id: 8633

Click on a sentence to show its analysis
Keep the mouse pointer over a lemma to show its meanings.

saṃjaya uvāca / (1.1) Par.?

tato 'payātāḥ śarapātamātram avasthitāḥ kuravo bhinnasenāḥ / (1.2) Par.?

vidyutprakāśaṃ dadṛśuḥ samantād dhanaṃjayāstraṃ samudīryamāṇam // (1.3) Par.?

tad arjunāstraṃ grasate sma vīrān viyat tathākāśam anantaghoṣam / (2.1) Par.?

kruddhena pārthena tadāśu sṛṣṭaṃ vadhāya karṇasya mahāvimarde // (2.2) Par.?

rāmād upāttena mahāmahimnā ātharvaṇenārivināśanena / (3.1) Par.?

tad arjunāstraṃ vyadhamad dahantaṃ pārthaṃ ca bāṇair niśitair nijaghne // (3.2) Par.?

tato vimardaḥ sumahān babhūva tasyārjunasyādhiratheś ca rājan / (4.1) Par.?

anyonyam āsādayatoḥ pṛṣatkair viṣāṇaghātair dvipayor ivograiḥ // (4.2) Par.?

tato ripughnaṃ samadhatta karṇaḥ susaṃśitaṃ sarpamukhaṃ jvalantam / (5.1) Par.?

raudraṃ śaraṃ saṃyati supradhautaṃ pārthārtham atyarthacirāya guptam // (5.2) Par.?

sadārcitaṃ candanacūrṇaśāyinaṃ suvarṇanālīśayanaṃ mahāviṣam / (6.1) Par.?

pradīptam airāvatavaṃśasaṃbhavaṃ śiro jihīrṣur yudhi phalgunasya // (6.2) Par.?

tam abravīn madrarājo mahātmā vaikartanaṃ prekṣya hi saṃhiteṣum / (7.1) Par.?

na karṇa grīvām iṣur eṣa prāpsyate saṃlakṣya saṃdhatsva śaraṃ śiroghnam // (7.2) Par.?

athābravīt krodhasaṃraktanetraḥ karṇaḥ śalyaṃ saṃdhiteṣuḥ prasahya / (8.1) Par.?

na saṃdhatte dviḥ śaraṃ śalya karṇo na mādṛśāḥ śāṭhyayuktā bhavanti // (8.2) Par.?

tathaivam uktvā visasarja taṃ śaraṃ balāhakaṃ varṣaghanābhipūjitam / (9.1) Par.?

hato 'si vai phalguna ity avocat tatas tvarann ūrjitam utsasarja // (9.2) Par.?

saṃdhīyamānaṃ bhujagaṃ dṛṣṭvā karṇena mādhavaḥ / (10.1) Par.?

ākramya syandanaṃ padbhyāṃ balena balināṃ varaḥ // (10.2) Par.?

avagāḍhe rathe bhūmau jānubhyām agaman hayāḥ / (11.1) Par.?

tataḥ śaraḥ so 'bhyahanat kirīṭaṃ tasya dhīmataḥ // (11.2) Par.?

athārjunasyottamagātrabhūṣaṇaṃ dharāviyaddyosalileṣu viśrutam / (12.1) Par.?

balāstrasargottamayatnamanyubhiḥ śareṇa mūrdhnaḥ sa jahāra sūtajaḥ // (12.2) Par.?

divākarendujvalanagrahatviṣaṃ suvarṇamuktāmaṇijālabhūṣitam / (13.1) Par.?

puraṃdarārthaṃ tapasā prayatnataḥ svayaṃ kṛtaṃ yad bhuvanasya sūnunā // (13.2) Par.?

mahārharūpaṃ dviṣatāṃ bhayaṃkaraṃ vibhāti cātyarthasukhaṃ sugandhi tat / (14.1) Par.?

nijaghnuṣe devaripūn sureśvaraḥ svayaṃ dadau yat sumanāḥ kirīṭine // (14.2) Par.?

harāmbupākhaṇḍalavittagoptṛbhiḥ pinākapāśāśanisāyakottamaiḥ / (15.1) Par.?

surottamair apy aviṣahyam ardituṃ prasahya nāgena jahāra yad vṛṣaḥ // (15.2) Par.?

tad uttameṣūn mathitaṃ viṣāgninā pradīptam arciṣmad abhikṣiti priyam / (16.1) Par.?

papāta pārthasya kirīṭam uttamaṃ divākaro 'stād iva parvatāj jvalan // (16.2) Par.?

tataḥ kirīṭaṃ bahuratnamaṇḍitaṃ jahāra nāgo 'rjunamūrdhato balāt / (17.1) Par.?

gireḥ sujātāṅkurapuṣpitadrumaṃ mahendravajraḥ śikharaṃ yathottamam // (17.2) Par.?

mahī viyad dyauḥ salilāni vāyunā yathā vibhinnāni vibhānti bhārata / (18.1) Par.?

tathaiva śabdo bhuvaneṣv abhūt tadā janā vyavasyan vyathitāś ca caskhaluḥ // (18.2) Par.?

tataḥ samudgrathya sitena vāsasā svamūrdhajān avyathitaḥ sthito 'rjunaḥ / (19.1) Par.?

vibhāti sampūrṇamarīcibhāsvatā śirogatenodayaparvato yathā // (19.2) Par.?

balāhakaḥ karṇabhujeritas tato hutāśanārkapratimadyutir mahān / (20.1) Par.?

mahoragaḥ kṛtavairo 'rjunena kirīṭam āsādya samutpapāta // (20.2) Par.?

tam abravīd viddhi kṛtāgasaṃ me kṛṣṇādya mātur vadhajātavairam / (21.1) Par.?

tataḥ kṛṣṇaḥ pārtham uvāca saṃkhye mahoragaṃ kṛtavairaṃ jahi tvam // (21.2) Par.?

sa evam ukto madhusūdanena gāṇḍīvadhanvā ripuṣūgradhanvā / (22.1) Par.?

uvāca ko nv eṣa mamādya nāgaḥ svayaṃ ya āgād garuḍasya vaktram // (22.2) Par.?

kṛṣṇa uvāca / (23.1) Par.?

yo 'sau tvayā khāṇḍave citrabhānuṃ saṃtarpayānena dhanurdhareṇa / (23.2) Par.?

viyadgato bāṇanikṛttadeho hy anekarūpo nihatāsya mātā // (23.3) Par.?

tatas tu jiṣṇuḥ parihṛtya śeṣāṃś cicheda ṣaḍbhir niśitaiḥ sudhāraiḥ / (24.1) Par.?

nāgaṃ viyat tiryag ivotpatantaṃ sa chinnagātro nipapāta bhūmau // (24.2) Par.?

tasmin muhūrte daśabhiḥ pṛṣatkaiḥ śilāśitair barhiṇavājitaiś ca / (25.1) Par.?

vivyādha karṇaḥ puruṣapravīraṃ dhanaṃjayaṃ tiryag avekṣamāṇam // (25.2) Par.?

tato 'rjuno dvādaśabhir vimuktair ākarṇamuktair niśitaiḥ samarpya / (26.1) Par.?

nārācam āśīviṣatulyavegam ākarṇapūrṇāyatam utsasarja // (26.2) Par.?

sa citravarmeṣuvaro vidārya prāṇān nirasyann iva sādhu muktaḥ / (27.1) Par.?

karṇasya pītvā rudhiraṃ viveśa vasuṃdharāṃ śoṇitavājadigdhaḥ // (27.2) Par.?

tato vṛṣo bāṇanipātakopito mahorago daṇḍavighaṭṭito yathā / (28.1) Par.?

tathāśukārī vyasṛjaccharottamān mahāviṣaḥ sarpa ivottamaṃ viṣam // (28.2) Par.?

janārdanaṃ dvādaśabhiḥ parābhinan navair navatyā ca śarais tathārjunam / (29.1) Par.?

śareṇa ghoreṇa punaś ca pāṇḍavaṃ vibhidya karṇo 'bhyanadaj jahāsa ca // (29.2) Par.?

tam asya harṣaṃ mamṛṣe na pāṇḍavo bibheda marmāṇi tato 'sya marmavit / (30.1) Par.?

paraṃ śaraiḥ patribhir indravikramas tathā yathendro balam ojasāhanat // (30.2) Par.?

tataḥ śarāṇāṃ navatīr navārjunaḥ sasarja karṇe 'ntakadaṇḍasaṃnibhāḥ / (31.1) Par.?

śarair bhṛśāyastatanuḥ pravivyathe tathā yathā vajravidārito 'calaḥ // (31.2) Par.?

maṇipravekottamavajrahāṭakair alaṃkṛtaṃ cāsya varāṅgabhūṣaṇam / (32.1) Par.?

praviddham urvyāṃ nipapāta patribhir dhanaṃjayenottamakuṇḍale 'pi ca // (32.2) Par.?

mahādhanaṃ śilpivaraiḥ prayatnataḥ kṛtaṃ yad asyottamavarma bhāsvaram / (33.1) Par.?

sudīrghakālena tad asya pāṇḍavaḥ kṣaṇena bāṇair bahudhā vyaśātayat // (33.2) Par.?

sa taṃ vivarmāṇam athottameṣubhiḥ śaraiś caturbhiḥ kupitaḥ parābhinat / (34.1) Par.?

sa vivyathe 'tyartham ariprahārito yathāturaḥ pittakaphānilavraṇaiḥ // (34.2) Par.?

mahādhanurmaṇḍalaniḥsṛtaiḥ śitaiḥ kriyāprayatnaprahitair balena ca / (35.1) Par.?

tatakṣa karṇaṃ bahubhiḥ śarottamair bibheda marmasv api cārjunas tvaran // (35.2) Par.?

dṛḍhāhataḥ patribhir ugravegaiḥ pārthena karṇo vividhaiḥ śitāgraiḥ / (36.1) Par.?

babhau girir gairikadhāturaktaḥ kṣaran prapātair iva raktam ambhaḥ // (36.2) Par.?

sāśvaṃ tu karṇaṃ sarathaṃ kirīṭī samācinod bhārata vatsadantaiḥ / (37.1) Par.?

pracchādayāmāsa diśaś ca bāṇaiḥ sarvaprayatnāt tapanīyapuṅkhaiḥ // (37.2) Par.?

sa vatsadantaiḥ pṛthupīnavakṣāḥ samācitaḥ smādhirathir vibhāti / (38.1) Par.?

supuṣpitāśokapalāśaśālmalir yathācalaḥ spandanacandanāyutaḥ // (38.2) Par.?

śaraiḥ śarīre bahudhā samarpitair vibhāti karṇaḥ samare viśāṃ pate / (39.1) Par.?

mahīruhair ācitasānukandaro yathā mahendraḥ śubhakarṇikāravān // (39.2) Par.?

sa bāṇasaṃghān dhanuṣā vyavāsṛjan vibhāti karṇaḥ śarajālaraśmivān / (40.1) Par.?

salohito raktagabhastimaṇḍalo divākaro 'stābhimukho yathā tathā // (40.2) Par.?

bāhvantarād ādhirather vimuktān bāṇān mahāhīn iva dīpyamānān / (41.1) Par.?

vyadhvaṃsayan arjunabāhumuktāḥ śarāḥ samāsādya diśaḥ śitāgrāḥ // (41.2) Par.?

tataś cakramapatat tasya bhūmau sa vihvalaḥ samare sūtaputraḥ / (42.1) Par.?

ghūrṇe rathe brāhmaṇasyābhiśāpād rāmād upātte 'pratibhāti cāstre // (42.2) Par.?

amṛṣyamāṇo vyasanāni tāni hastau vidhunvan sa vigarhamāṇaḥ / (43.1) Par.?

dharmapradhānān abhipāti dharma ity abruvan dharmavidaḥ sadaiva / (43.2) Par.?

mamāpi nimno 'dya na pāti bhaktān manye na nityaṃ paripāti dharmaḥ // (43.3) Par.?

evaṃ bruvan praskhalitāśvasūto vicālyamāno 'rjunaśastrapātaiḥ / (44.1) Par.?

marmābhighātāc calitaḥ kriyāsu punaḥ punar dharmam agarhad ājau // (44.2) Par.?

tataḥ śarair bhīmatarair avidhyat tribhir āhave / (45.1) Par.?

haste karṇas tadā pārtham abhyavidhyac ca saptabhiḥ // (45.2) Par.?

tato 'rjunaḥ saptadaśa tigmatejān ajihmagān / (46.1) Par.?

indrāśanisamān ghorān asṛjat pāvakopamān // (46.2) Par.?

nirbhidya te bhīmavegā nyapatan pṛthivītale / (47.1) Par.?

kampitātmā tathā karṇaḥ śaktyā ceṣṭām adarśayat // (47.2) Par.?

balenātha sa saṃstabhya brahmāstraṃ samudairayat / (48.1) Par.?

aindrāstram arjunaś cāpi tad dṛṣṭvābhinyamantrayat // (48.2) Par.?

gāṇḍīvaṃ jyāṃ ca bāṇāṃś ca anumantrya dhanaṃjayaḥ / (49.1) Par.?

asṛjaccharavarṣāṇi varṣāṇīva puraṃdaraḥ // (49.2) Par.?

tatas tejomayā bāṇā rathāt pārthasya niḥsṛtāḥ / (50.1) Par.?

prādurāsan mahāvīryāḥ karṇasya ratham antikāt // (50.2) Par.?

tān karṇas tv agrato 'bhyastān moghāṃś cakre mahārathaḥ / (51.1) Par.?

tato 'bravīd vṛṣṇivīras tasminn astre vināśite // (51.2) Par.?

visṛjāstraṃ paraṃ pārtha rādheyo grasate śarān / (52.1) Par.?

brahmāstram arjunaś cāpi saṃmantryātha prayojayat // (52.2) Par.?

chādayitvā tato bāṇaiḥ karṇaṃ prabhrāmya cārjunaḥ / (53.1) Par.?

tasya karṇaḥ śaraiḥ kruddhaś cicheda jyāṃ sutejanaiḥ // (53.2) Par.?

tato jyām avadhāyānyām anumṛjya ca pāṇḍavaḥ / (54.1) Par.?

śarair avākirat karṇaṃ dīpyamānaiḥ sahasraśaḥ // (54.2) Par.?

tasya jyāchedanaṃ karṇo jyāvadhānaṃ ca saṃyuge / (55.1) Par.?

nānvabudhyata śīghratvāt tad adbhutam ivābhavat // (55.2) Par.?

astrair astrāṇi rādheyaḥ pratyahan savyasācinaḥ / (56.1) Par.?

cakre cābhyadhikaṃ pārthāt svavīryaṃ pratidarśayan // (56.2) Par.?

tataḥ kṛṣṇo 'rjunaṃ dṛṣṭvā karṇāstreṇābhipīḍitam / (57.1) Par.?

abhyasyety abravīt pārtham ātiṣṭhāstram anuttamam // (57.2) Par.?

tato 'nyam agnisadṛśaṃ śaraṃ sarpaviṣopamam / (58.1) Par.?

aśmasāramayaṃ divyam anumantrya dhanaṃjayaḥ // (58.2) Par.?

raudram astraṃ samādāya kṣeptukāmaḥ kirīṭavān / (59.1) Par.?

tato 'grasan mahī cakraṃ rādheyasya mahāmṛdhe // (59.2) Par.?

grastacakras tu rādheyaḥ kopād aśrūṇy avartayat / (60.1) Par.?

so 'bravīd arjunaṃ cāpi muhūrtaṃ kṣama pāṇḍava // (60.2) Par.?

madhye cakram avagrastaṃ dṛṣṭvā daivād idaṃ mama / (61.1) Par.?

pārtha kāpuruṣācīrṇam abhisaṃdhiṃ vivarjaya // (61.2) Par.?

prakīrṇakeśe vimukhe brāhmaṇe ca kṛtāñjalau / (62.1) Par.?

śaraṇāgate nyastaśastre tathā vyasanage 'rjuna // (62.2) Par.?

abāṇe bhraṣṭakavace bhraṣṭabhagnāyudhe tathā / (63.1) Par.?

na śūrāḥ praharanty ājau na rājñe pārthivās tathā / (63.2) Par.?

tvaṃ ca śūro 'si kaunteya tasmāt kṣama muhūrtakam // (63.3) Par.?

yāvac cakram idaṃ bhūmer uddharāmi dhanaṃjaya / (64.1) Par.?

na māṃ rathastho bhūmiṣṭham asajjaṃ hantum arhasi / (64.2) Par.?

na vāsudevāt tvatto vā pāṇḍaveya bibhemy aham // (64.3) Par.?

tvaṃ hi kṣatriyadāyādo mahākulavivardhanaḥ / (65.1) Par.?

smṛtvā dharmopadeśaṃ tvaṃ muhūrtaṃ kṣama pāṇḍava // (65.2) Par.?

Duration=0.22716593742371 secs.