Texts

Help

Select a text:
Bibliography

Select a chapter:
(no revisions)

Associated topic(s): Tīrthas

Show parallels Show headlines
Use dependency labeler

Chapter id: 9143

Click on a sentence to show its analysis
Keep the mouse pointer over a lemma to show its meanings.

janamejaya uvāca / (1.1) Par.?

vasiṣṭhasyāpavāho vai bhīmavegaḥ kathaṃ nu saḥ / (1.2) Par.?

kimarthaṃ ca saricchreṣṭhā tam ṛṣiṃ pratyavāhayat // (1.3) Par.?

kena cāsyābhavad vairaṃ kāraṇaṃ kiṃ ca tat prabho / (2.1) Par.?

śaṃsa pṛṣṭo mahāprājña na hi tṛpyāmi kathyatām // (2.2) Par.?

vaiśaṃpāyana uvāca / (3.1) Par.?

viśvāmitrasya caivarṣer vasiṣṭhasya ca bhārata / (3.2) Par.?

bhṛśaṃ vairam abhūd rājaṃstapaḥspardhākṛtaṃ mahat // (3.3) Par.?

āśramo vai vasiṣṭhasya sthāṇutīrthe 'bhavanmahān / (4.1) Par.?

pūrvataḥ paścimaścāsīd viśvāmitrasya dhīmataḥ // (4.2) Par.?

yatra sthāṇur mahārāja taptavān sumahat tapaḥ / (5.1) Par.?

yatrāsya karma tad ghoraṃ pravadanti manīṣiṇaḥ // (5.2) Par.?

yatreṣṭvā bhagavān sthāṇuḥ pūjayitvā sarasvatīm / (6.1) Par.?

sthāpayāmāsa tat tīrthaṃ sthāṇutīrtham iti prabho // (6.2) Par.?

tatra sarve surāḥ skandam abhyaṣiñcannarādhipa / (7.1) Par.?

senāpatyena mahatā surārivinibarhaṇam // (7.2) Par.?

tasmin sarasvatītīrthe viśvāmitro mahāmuniḥ / (8.1) Par.?

vasiṣṭhaṃ cālayāmāsa tapasogreṇa tacchṛṇu // (8.2) Par.?

viśvāmitravasiṣṭhau tāvahanyahani bhārata / (9.1) Par.?

spardhāṃ tapaḥkṛtāṃ tīvrāṃ cakratustau tapodhanau // (9.2) Par.?

tatrāpyadhikasaṃtāpo viśvāmitro mahāmuniḥ / (10.1) Par.?

dṛṣṭvā tejo vasiṣṭhasya cintām abhijagāma ha / (10.2) Par.?

tasya buddhir iyaṃ hyāsīd dharmanityasya bhārata // (10.3) Par.?

iyaṃ sarasvatī tūrṇaṃ matsamīpaṃ tapodhanam / (11.1) Par.?

ānayiṣyati vegena vasiṣṭhaṃ japatāṃ varam / (11.2) Par.?

ihāgataṃ dvijaśreṣṭhaṃ haniṣyāmi na saṃśayaḥ // (11.3) Par.?

evaṃ niścitya bhagavān viśvāmitro mahāmuniḥ / (12.1) Par.?

sasmāra saritāṃ śreṣṭhāṃ krodhasaṃraktalocanaḥ // (12.2) Par.?

sā dhyātā muninā tena vyākulatvaṃ jagāma ha / (13.1) Par.?

jajñe cainaṃ mahāvīryaṃ mahākopaṃ ca bhāminī // (13.2) Par.?

tata enaṃ vepamānā vivarṇā prāñjalistadā / (14.1) Par.?

upatasthe munivaraṃ viśvāmitraṃ sarasvatī // (14.2) Par.?

hatavīrā yathā nārī sābhavad duḥkhitā bhṛśam / (15.1) Par.?

brūhi kiṃ karavāṇīti provāca munisattamam // (15.2) Par.?

tām uvāca muniḥ kruddho vasiṣṭhaṃ śīghram ānaya / (16.1) Par.?

yāvad enaṃ nihanmyadya tacchrutvā vyathitā nadī // (16.2) Par.?

sāñjaliṃ tu tataḥ kṛtvā puṇḍarīkanibhekṣaṇā / (17.1) Par.?

vivyathe suvirūḍheva latā vāyusamīritā // (17.2) Par.?

tathāgatāṃ tu tāṃ dṛṣṭvā vepamānāṃ kṛtāñjalim / (18.1) Par.?

viśvāmitro 'bravīt kruddho vasiṣṭhaṃ śīghram ānaya // (18.2) Par.?

tato bhītā saricchreṣṭhā cintayāmāsa bhārata / (19.1) Par.?

ubhayoḥ śāpayor bhītā katham etad bhaviṣyati // (19.2) Par.?

sābhigamya vasiṣṭhaṃ tu imam artham acodayat / (20.1) Par.?

yad uktā saritāṃ śreṣṭhā viśvāmitreṇa dhīmatā // (20.2) Par.?

ubhayoḥ śāpayor bhītā vepamānā punaḥ punaḥ / (21.1) Par.?

cintayitvā mahāśāpam ṛṣivitrāsitā bhṛśam // (21.2) Par.?

tāṃ kṛśāṃ ca vivarṇāṃ ca dṛṣṭvā cintāsamanvitām / (22.1) Par.?

uvāca rājan dharmātmā vasiṣṭho dvipadāṃ varaḥ // (22.2) Par.?

trāhyātmānaṃ saricchreṣṭhe vaha māṃ śīghragāminī / (23.1) Par.?

viśvāmitraḥ śapeddhi tvāṃ mā kṛthāstvaṃ vicāraṇām // (23.2) Par.?

tasya tad vacanaṃ śrutvā kṛpāśīlasya sā sarit / (24.1) Par.?

cintayāmāsa kauravya kiṃ kṛtaṃ sukṛtaṃ bhavet // (24.2) Par.?

tasyāścintā samutpannā vasiṣṭho mayyatīva hi / (25.1) Par.?

kṛtavān hi dayāṃ nityaṃ tasya kāryaṃ hitaṃ mayā // (25.2) Par.?

atha kūle svake rājañ japantam ṛṣisattamam / (26.1) Par.?

juhvānaṃ kauśikaṃ prekṣya sarasvatyabhyacintayat // (26.2) Par.?

idam antaram ityeva tataḥ sā saritāṃ varā / (27.1) Par.?

kūlāpahāram akarot svena vegena sā sarit // (27.2) Par.?

tena kūlāpahāreṇa maitrāvaruṇir auhyata / (28.1) Par.?

uhyamānaśca tuṣṭāva tadā rājan sarasvatīm // (28.2) Par.?

pitāmahasya sarasaḥ pravṛttāsi sarasvati / (29.1) Par.?

vyāptaṃ cedaṃ jagat sarvaṃ tavaivāmbhobhir uttamaiḥ // (29.2) Par.?

tvam evākāśagā devi megheṣūtsṛjase payaḥ / (30.1) Par.?

sarvāścāpastvam eveti tvatto vayam adhīmahe // (30.2) Par.?

puṣṭir dyutistathā kīrtiḥ siddhir vṛddhir umā tathā / (31.1) Par.?

tvam eva vāṇī svāhā tvaṃ tvayyāyattam idaṃ jagat / (31.2) Par.?

tvam eva sarvabhūteṣu vasasīha caturvidhā // (31.3) Par.?

evaṃ sarasvatī rājan stūyamānā maharṣiṇā / (32.1) Par.?

vegenovāha taṃ vipraṃ viśvāmitrāśramaṃ prati / (32.2) Par.?

nyavedayata cābhīkṣṇaṃ viśvāmitrāya taṃ munim // (32.3) Par.?

tam ānītaṃ sarasvatyā dṛṣṭvā kopasamanvitaḥ / (33.1) Par.?

athānveṣat praharaṇaṃ vasiṣṭhāntakaraṃ tadā // (33.2) Par.?

taṃ tu kruddham abhiprekṣya brahmahatyābhayānnadī / (34.1) Par.?

apovāha vasiṣṭhaṃ tu prācīṃ diśam atandritā / (34.2) Par.?

ubhayoḥ kurvatī vākyaṃ vañcayitvā tu gādhijam // (34.3) Par.?

tato 'pavāhitaṃ dṛṣṭvā vasiṣṭham ṛṣisattamam / (35.1) Par.?

abravīd atha saṃkruddho viśvāmitro hyamarṣaṇaḥ // (35.2) Par.?

yasmānmā tvaṃ saricchreṣṭhe vañcayitvā punar gatā / (36.1) Par.?

śoṇitaṃ vaha kalyāṇi rakṣogrāmaṇisaṃmatam // (36.2) Par.?

tataḥ sarasvatī śaptā viśvāmitreṇa dhīmatā / (37.1) Par.?

avahacchoṇitonmiśraṃ toyaṃ saṃvatsaraṃ tadā // (37.2) Par.?

atharṣayaśca devāśca gandharvāpsarasastathā / (38.1) Par.?

sarasvatīṃ tathā dṛṣṭvā babhūvur bhṛśaduḥkhitāḥ // (38.2) Par.?

evaṃ vasiṣṭhāpavāho loke khyāto janādhipa / (39.1) Par.?

āgacchacca punar mārgaṃ svam eva saritāṃ varā // (39.2) Par.?

Duration=0.24569201469421 secs.