Texts

vaiśaṃpāyana uvāca / (1.1) Par.?

athābravīnmahātejā vākyaṃ kauravanandanaḥ / (1.2) Par.?

hanta dharmān pravakṣyāmi dṛḍhe vāṅmanasī mama / (1.3) Par.?

tava prasādād govinda bhūtātmā hyasi śāśvataḥ // (1.4) Par.?

yudhiṣṭhirastu māṃ rājā dharmān samanupṛcchatu / (2.1) Par.?

evaṃ prīto bhaviṣyāmi dharmān vakṣyāmi cānagha // (2.2) Par.?

yasmin rājarṣabhe jāte dharmātmani mahātmani / (3.1) Par.?

ahṛṣyann ṛṣayaḥ sarve sa māṃ pṛcchatu pāṇḍavaḥ // (3.2) Par.?

sarveṣāṃ dīptayaśasāṃ kurūṇāṃ dharmacāriṇām / (4.1) Par.?

yasya nāsti samaḥ kaścit sa māṃ pṛcchatu pāṇḍavaḥ // (4.2) Par.?

dhṛtir damo brahmacaryaṃ kṣamā dharmaśca nityadā / (5.1) Par.?

yasmin ojaśca tejaśca sa māṃ pṛcchatu pāṇḍavaḥ // (5.2) Par.?

satyaṃ dānaṃ tapaḥ śaucaṃ śāntir dākṣyam asaṃbhramaḥ / (6.1) Par.?

yasmin etāni sarvāṇi sa māṃ pṛcchatu pāṇḍavaḥ // (6.2) Par.?

yo na kāmānna saṃrambhānna bhayānnārthakāraṇāt / (7.1) Par.?

kuryād adharmaṃ dharmātmā sa māṃ pṛcchatu pāṇḍavaḥ // (7.2) Par.?

saṃbandhino 'tithīn bhṛtyān saṃśritopāśritāṃśca yaḥ / (8.1) Par.?

saṃmānayati satkṛtya sa māṃ pṛcchatu pāṇḍavaḥ // (8.2) Par.?

satyanityaḥ kṣamānityo jñānanityo 'tithipriyaḥ / (9.1) Par.?

yo dadāti satāṃ nityaṃ sa māṃ pṛcchatu pāṇḍavaḥ // (9.2) Par.?

ijyādhyayananityaśca dharme ca nirataḥ sadā / (10.1) Par.?

śāntaḥ śrutarahasyaśca sa māṃ pṛcchatu pāṇḍavaḥ // (10.2) Par.?

vāsudeva uvāca / (11.1) Par.?

lajjayā parayopeto dharmātmā sa yudhiṣṭhiraḥ / (11.2) Par.?

abhiśāpabhayād bhīto bhavantaṃ nopasarpati // (11.3) Par.?

lokasya kadanaṃ kṛtvā lokanātho viśāṃ pate / (12.1) Par.?

abhiśāpabhayād bhīto bhavantaṃ nopasarpati // (12.2) Par.?

pūjyānmānyāṃśca bhaktāṃśca gurūn saṃbandhibāndhavān / (13.1) Par.?

arghyārhān iṣubhir hatvā bhavantaṃ nopasarpati // (13.2) Par.?

bhīṣma uvāca / (14.1) Par.?

brāhmaṇānāṃ yathā dharmo dānam adhyayanaṃ tapaḥ / (14.2) Par.?

kṣatriyāṇāṃ tathā kṛṣṇa samare dehapātanam // (14.3) Par.?

pitṝn pitāmahān putrān gurūn saṃbandhibāndhavān / (15.1) Par.?

mithyāpravṛttān yaḥ saṃkhye nihanyād dharma eva saḥ // (15.2) Par.?

samayatyāgino lubdhān gurūn api ca keśava / (16.1) Par.?

nihanti samare pāpān kṣatriyo yaḥ sa dharmavit // (16.2) Par.?

āhūtena raṇe nityaṃ yoddhavyaṃ kṣatrabandhunā / (17.1) Par.?

dharmyaṃ svargyaṃ ca lokyaṃ ca yuddhaṃ hi manur abravīt // (17.2) Par.?

vaiśaṃpāyana uvāca / (18.1) Par.?

evam uktastu bhīṣmeṇa dharmarājo yudhiṣṭhiraḥ / (18.2) Par.?

vinītavad upāgamya tasthau saṃdarśane 'grataḥ // (18.3) Par.?

athāsya pādau jagrāha bhīṣmaścābhinananda tam / (19.1) Par.?

mūrdhni cainam upāghrāya niṣīdetyabravīt tadā // (19.2) Par.?

tam uvācātha gāṅgeya ṛṣabhaḥ sarvadhanvinām / (20.1) Par.?

pṛccha māṃ tāta visrabdhaṃ mā bhaistvaṃ kurusattama // (20.2) Par.?