Texts

yudhiṣṭhira uvāca / (1.1) Par.?

kena vṛttena vṛttajña vartamāno mahīpatiḥ / (1.2) Par.?

sukhenārthān sukhodarkān iha ca pretya cāpnuyāt // (1.3) Par.?

bhīṣma uvāca / (2.1) Par.?

iyaṃ guṇānāṃ ṣaṭtriṃśat ṣaṭtriṃśad guṇasaṃyutā / (2.2) Par.?

yān guṇāṃstu guṇopetaḥ kurvan guṇam avāpnuyāt // (2.3) Par.?

cared dharmān akaṭuko muñcet snehaṃ na nāstikaḥ / (3.1) Par.?

anṛśaṃsaścared arthaṃ caret kāmam anuddhataḥ // (3.2) Par.?

priyaṃ brūyād akṛpaṇaḥ śūraḥ syād avikatthanaḥ / (4.1) Par.?

dātā nāpātravarṣī syāt pragalbhaḥ syād aniṣṭhuraḥ // (4.2) Par.?

saṃdadhīta na cānāryair vigṛhṇīyānna bandhubhiḥ / (5.1) Par.?

nānāptaiḥ kārayeccāraṃ kuryāt kāryam apīḍayā // (5.2) Par.?

arthān brūyānna cāsatsu guṇān brūyānna cātmanaḥ / (6.1) Par.?

ādadyānna ca sādhubhyo nāsatpuruṣam āśrayet // (6.2) Par.?

nāparīkṣya nayed daṇḍaṃ na ca mantraṃ prakāśayet / (7.1) Par.?

visṛjenna ca lubdhebhyo viśvasennāpakāriṣu // (7.2) Par.?

anīrṣur guptadāraḥ syāccokṣaḥ syād aghṛṇī nṛpaḥ / (8.1) Par.?

striyaṃ seveta nātyarthaṃ mṛṣṭaṃ bhuñjīta nāhitam // (8.2) Par.?

astabdhaḥ pūjayenmānyān gurūn seved amāyayā / (9.1) Par.?

arced devānna dambhena śriyam icched akutsitām // (9.2) Par.?

seveta praṇayaṃ hitvā dakṣaḥ syānna tvakālavit / (10.1) Par.?

sāntvayenna ca bhogārtham anugṛhṇanna cākṣipet // (10.2) Par.?

praharenna tv avijñāya hatvā śatrūnna śeṣayet / (11.1) Par.?

krodhaṃ kuryānna cākasmānmṛduḥ syānnāpakāriṣu // (11.2) Par.?

evaṃ carasva rājyastho yadi śreya ihecchasi / (12.1) Par.?

ato 'nyathā narapatir bhayam ṛcchatyanuttamam // (12.2) Par.?

iti sarvān guṇān etān yathoktān yo 'nuvartate / (13.1) Par.?

anubhūyeha bhadrāṇi pretya svarge mahīyate // (13.2) Par.?

vaiśaṃpāyana uvāca / (14.1) Par.?

idaṃ vacaḥ śāṃtanavasya śuśruvān yudhiṣṭhiraḥ pāṇḍavamukhyasaṃvṛtaḥ / (14.2) Par.?

tadā vavande ca pitāmahaṃ nṛpo yathoktam etacca cakāra buddhimān // (14.3) Par.?