Texts

bhṛgur uvāca / (1.1) Par.?

satyaṃ brahma tapaḥ satyaṃ satyaṃ sṛjati ca prajāḥ / (1.2) Par.?

satyena dhāryate lokaḥ svargaṃ satyena gacchati // (1.3) Par.?

anṛtaṃ tamaso rūpaṃ tamasā nīyate hyadhaḥ / (2.1) Par.?

tamograstā na paśyanti prakāśaṃ tamasāvṛtam // (2.2) Par.?

svargaḥ prakāśa ityāhur narakaṃ tama eva ca / (3.1) Par.?

satyānṛtāt tad ubhayaṃ prāpyate jagatīcaraiḥ // (3.2) Par.?

tatra tvevaṃvidhā vṛttir loke satyānṛtā bhavet / (4.1) Par.?

dharmādharmau prakāśaśca tamo duḥkhaṃ sukhaṃ tathā // (4.2) Par.?

tatra yat satyaṃ sa dharmo yo dharmaḥ sa prakāśo yaḥ prakāśastat sukham iti / (5.1) Par.?

tatra yad anṛtaṃ so 'dharmo yo 'dharmastat tamo yat tamastad duḥkham iti // (5.2) Par.?

śārīrair mānasair duḥkhaiḥ sukhaiś cāpy asukhodayaiḥ / (6.1) Par.?

atrocyate / (6.2) Par.?

lokasṛṣṭiṃ prapaśyanto na muhyanti vicakṣaṇāḥ // (6.3) Par.?

tatra duḥkhavimokṣārthaṃ prayateta vicakṣaṇaḥ / (7.1) Par.?

sukhaṃ hyanityaṃ bhūtānām iha loke paratra ca // (7.2) Par.?

rāhugrastasya somasya yathā jyotsnā na bhāsate / (8.1) Par.?

tathā tamo'bhibhūtānāṃ bhūtānāṃ bhraśyate sukham // (8.2) Par.?

tat khalu dvividhaṃ sukham ucyate śārīraṃ mānasaṃ ca / (9.1) Par.?

iha khalvamuṣmiṃśca loke sarvārambhapravṛttayaḥ sukhārthā abhidhīyante / (9.2) Par.?

na hyatastrivargaphalaṃ viśiṣṭataram asti / (9.3) Par.?

sa eṣa kāmyo guṇaviśeṣo dharmārthayor ārambhastaddhetur asyotpattiḥ sukhaprayojanā // (9.4) Par.?

bharadvāja uvāca / (10.1) Par.?

yad etad bhavatābhihitaṃ sukhānāṃ paramāḥ striya iti tanna gṛhṇīmaḥ / (10.2) Par.?

na hyeṣām ṛṣīṇāṃ mahati sthitānām aprāpya eṣa guṇaviśeṣo na cainam abhilaṣanti / (10.3) Par.?

śrūyate ca bhagavāṃstrilokakṛd brahmā prabhur ekākī tiṣṭhati / (10.4) Par.?

brahmacārī na kāmasukheṣvātmānam avadadhāti / (10.5) Par.?

api ca bhagavān viśveśvara umāpatiḥ kāmam abhivartamānam anaṅgatvena śamam anayat / (10.6) Par.?

tasmād brūmo na mahātmabhir ayaṃ pratigṛhīto na tveṣa tāvad viśiṣṭo guṇa iti naitad bhagavataḥ pratyemi / (10.7) Par.?

bhagavatā tūktaṃ sukhānāṃ paramāḥ striya iti / (10.8) Par.?

lokapravādo 'pi ca bhavati dvividhaḥ phalodayaḥ sukṛtāt sukham avāpyate duṣkṛtād duḥkham iti / (10.9) Par.?

atrocyatām // (10.10) Par.?

bhṛgur uvāca / (11.1) Par.?

anṛtāt khalu tamaḥ prādurbhūtaṃ tamograstā adharmam evānuvartante na dharmam / (11.2) Par.?

krodhalobhamohamānānṛtādibhir avacchannā na khalvasmiṃl loke na cāmutra sukham āpnuvanti / (11.3) Par.?

vividhavyādhigaṇopatāpair avakīryante / (11.4) Par.?

vadhabandharogaparikleśādibhiśca kṣutpipāsāśramakṛtair upatāpair upatapyante / (11.5) Par.?

caṇḍavātātyuṣṇātiśītakṛtaiśca pratibhayaiḥ śārīrair duḥkhair upatapyante / (11.6) Par.?

bandhudhanavināśaviprayogakṛtaiśca mānasaiḥ śokair abhibhūyante jarāmṛtyukṛtaiścānyair iti // (11.7) Par.?

yastvetaiḥ śārīrair mānasair duḥkhair na spṛśyate sa sukhaṃ veda / (12.1) Par.?

na caite doṣāḥ svarge prādurbhavanti / (12.2) Par.?

tatra bhavati khalu // (12.3) Par.?

susukhaḥ pavanaḥ svarge gandhaśca surabhistathā / (13.1) Par.?

kṣutpipāsāśramo nāsti na jarā na ca pāpakam // (13.2) Par.?

nityam eva sukhaṃ svarge sukhaṃ duḥkham ihobhayam / (14.1) Par.?

narake duḥkham evāhuḥ samaṃ tu paramaṃ padam // (14.2) Par.?

pṛthivī sarvabhūtānāṃ janitrī tadvidhāḥ striyaḥ / (15.1) Par.?

pumān prajāpatistatra śukraṃ tejomayaṃ viduḥ // (15.2) Par.?

ityetal lokanirmāṇaṃ brahmaṇā vihitaṃ purā / (16.1) Par.?

prajā viparivartante svaiḥ svaiḥ karmabhir āvṛtāḥ // (16.2) Par.?