Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 6231

Click on a sentence to show its analysis
Keep the mouse pointer over a lemma to show its meanings.

śuka uvāca / (1.1) Par.?

vartamānastathaivātra vānaprasthāśrame yathā / (1.2) Par.?

yoktavyo ''tmā yathāśaktyā paraṃ vai kāṅkṣatā padam // (1.3) Par.?

vyāsa uvāca / (2.1) Par.?

prāpya saṃskāram etābhyām āśramābhyāṃ tataḥ param / (2.2) Par.?

yat kāryaṃ paramārthārthaṃ tad ihaikamanāḥ śṛṇu // (2.3) Par.?

kaṣāyaṃ pācayitvā tu śreṇisthāneṣu ca triṣu / (3.1) Par.?

pravrajecca paraṃ sthānaṃ parivrajyām anuttamām // (3.2) Par.?

tad bhavān evam abhyasya vartatāṃ śrūyatāṃ tathā / (4.1) Par.?

eka eva carennityaṃ siddhyartham asahāyavān // (4.2) Par.?

ekaścarati yaḥ paśyanna jahāti na hīyate / (5.1) Par.?

anagnir aniketaḥ syād grāmam annārtham āśrayet // (5.2) Par.?

aśvastanavidhānaḥ syānmunir bhāvasamanvitaḥ / (6.1) Par.?

laghvāśī niyatāhāraḥ sakṛd annaniṣevitā // (6.2) Par.?

kapālaṃ vṛkṣamūlāni kucelam asahāyatā / (7.1) Par.?

upekṣā sarvabhūtānām etāvad bhikṣulakṣaṇam // (7.2) Par.?

yasmin vācaḥ praviśanti kūpe prāptāḥ śilā iva / (8.1) Par.?

na vaktāraṃ punar yānti sa kaivalyāśrame vaset // (8.2) Par.?

naiva paśyenna śṛṇuyād avācyaṃ jātu kasyacit / (9.1) Par.?

brāhmaṇānāṃ viśeṣeṇa naiva brūyāt kathaṃcana // (9.2) Par.?

yad brāhmaṇasya kuśalaṃ tad eva satataṃ vadet / (10.1) Par.?

tūṣṇīm āsīta nindāyāṃ kurvan bheṣajam ātmanaḥ // (10.2) Par.?

yena pūrṇam ivākāśaṃ bhavatyekena sarvadā / (11.1) Par.?

śūnyaṃ yena janākīrṇaṃ taṃ devā brāhmaṇaṃ viduḥ // (11.2) Par.?

yena kenacid ācchanno yena kenacid āśitaḥ / (12.1) Par.?

yatrakvacanaśāyī ca taṃ devā brāhmaṇaṃ viduḥ // (12.2) Par.?

aher iva gaṇād bhītaḥ sauhityānnarakād iva / (13.1) Par.?

kuṇapād iva ca strībhyastaṃ devā brāhmaṇaṃ viduḥ // (13.2) Par.?

na krudhyenna prahṛṣyecca mānito 'mānitaśca yaḥ / (14.1) Par.?

sarvabhūteṣv abhayadastaṃ devā brāhmaṇaṃ viduḥ // (14.2) Par.?

nābhinandeta maraṇaṃ nābhinandeta jīvitam / (15.1) Par.?

kālam eva pratīkṣeta nideśaṃ bhṛtako yathā // (15.2) Par.?

anabhyāhatacittaḥ syād anabhyāhatavāk tathā / (16.1) Par.?

nirmuktaḥ sarvapāpebhyo niramitrasya kiṃ bhayam // (16.2) Par.?

abhayaṃ sarvabhūtebhyo bhūtānām abhayaṃ yataḥ / (17.1) Par.?

tasya dehād vimuktasya bhayaṃ nāsti kutaścana // (17.2) Par.?

yathā nāgapade 'nyāni padāni padagāminām / (18.1) Par.?

sarvāṇyevāpidhīyante padajātāni kauñjare // (18.2) Par.?

evaṃ sarvam ahiṃsāyāṃ dharmārtham apidhīyate / (19.1) Par.?

amṛtaḥ sa nityaṃ vasati yo 'hiṃsāṃ pratipadyate // (19.2) Par.?

ahiṃsakaḥ samaḥ satyo dhṛtimānniyatendriyaḥ / (20.1) Par.?

śaraṇyaḥ sarvabhūtānāṃ gatim āpnotyanuttamām // (20.2) Par.?

evaṃ prajñānatṛptasya nirbhayasya manīṣiṇaḥ / (21.1) Par.?

na mṛtyur atigo bhāvaḥ sa mṛtyum adhigacchati // (21.2) Par.?

vimuktaṃ sarvasaṅgebhyo munim ākāśavat sthitam / (22.1) Par.?

asvam ekacaraṃ śāntaṃ taṃ devā brāhmaṇaṃ viduḥ // (22.2) Par.?

jīvitaṃ yasya dharmārthaṃ dharmo 'ratyartham eva ca / (23.1) Par.?

ahorātrāśca puṇyārthaṃ taṃ devā brāhmaṇaṃ viduḥ // (23.2) Par.?

nirāśiṣam anārambhaṃ nirnamaskāram astutim / (24.1) Par.?

akṣīṇaṃ kṣīṇakarmāṇaṃ taṃ devā brāhmaṇaṃ viduḥ // (24.2) Par.?

sarvāṇi bhūtāni sukhe ramante sarvāṇi duḥkhasya bhṛśaṃ trasanti / (25.1) Par.?

teṣāṃ bhayotpādanajātakhedaḥ kuryānna karmāṇi hi śraddadhānaḥ // (25.2) Par.?

dānaṃ hi bhūtābhayadakṣiṇāyāḥ sarvāṇi dānānyadhitiṣṭhatīha / (26.1) Par.?

tīkṣṇāṃ tanuṃ yaḥ prathamaṃ jahāti so 'nantam āpnotyabhayaṃ prajābhyaḥ // (26.2) Par.?

uttāna āsyena havir juhoti lokasya nābhir jagataḥ pratiṣṭhā / (27.1) Par.?

tasyāṅgam aṅgāni kṛtākṛtaṃ ca vaiśvānaraḥ sarvam eva prapede // (27.2) Par.?

prādeśamātre hṛdi niśritaṃ yat tasmin prāṇān ātmayājī juhoti / (28.1) Par.?

tasyāgnihotraṃ hutam ātmasaṃsthaṃ sarveṣu lokeṣu sadaivateṣu // (28.2) Par.?

daivaṃ tridhātuṃ trivṛtaṃ suparṇaṃ ye vidyur agryaṃ paramārthatāṃ ca / (29.1) Par.?

te sarvalokeṣu mahīyamānā devāḥ samarthāḥ sukṛtaṃ vrajanti // (29.2) Par.?

vedāṃśca vedyaṃ ca vidhiṃ ca kṛtsnam atho niruktaṃ paramārthatāṃ ca / (30.1) Par.?

sarvaṃ śarīrātmani yaḥ praveda tasmai sma devāḥ spṛhayanti nityam // (30.2) Par.?

bhūmāvasaktaṃ divi cāprameyaṃ hiraṇmayaṃ yo 'ṇḍajam aṇḍamadhye / (31.1) Par.?

patatriṇaṃ pakṣiṇam antarikṣe yo veda bhogyātmani dīptaraśmiḥ // (31.2) Par.?

āvartamānam ajaraṃ vivartanaṃ ṣaṇnemikaṃ dvādaśāraṃ suparva / (32.1) Par.?

yasyedam āsye pariyāti viśvaṃ tat kālacakraṃ nihitaṃ guhāyām // (32.2) Par.?

yaḥ saṃprasādaṃ jagataḥ śarīraṃ sarvān sa lokān adhigacchatīha / (33.1) Par.?

tasmin hutaṃ tarpayatīha devāṃs te vai tṛptāstarpayantyāsyam asya // (33.2) Par.?

tejomayo nityatanuḥ purāṇo lokān anantān abhayān upaiti / (34.1) Par.?

bhūtāni yasmānna trasante kadācit sa bhūtebhyo na trasate kadācit // (34.2) Par.?

agarhaṇīyo na ca garhate 'nyān sa vai vipraḥ paramātmānam īkṣet / (35.1) Par.?

vinītamoho vyapanītakalmaṣo na ceha nāmutra ca yo 'rtham ṛcchati // (35.2) Par.?

aroṣamohaḥ samaloṣṭakāñcanaḥ prahīṇaśoko gatasaṃdhivigrahaḥ / (36.1) Par.?

apetanindāstutir apriyāpriyaś carann udāsīnavad eṣa bhikṣukaḥ // (36.2) Par.?

Duration=0.1140820980072 secs.