Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 6284

Click on a sentence to show its analysis
Keep the mouse pointer over a lemma to show its meanings.

yudhiṣṭhira uvāca / (1.1) Par.?

samyak tvayāyaṃ nṛpate varṇitaḥ śiṣṭasaṃmataḥ / (1.2) Par.?

yogamārgo yathānyāyaṃ śiṣyāyeha hitaiṣiṇā // (1.3) Par.?

sāṃkhye tvidānīṃ kārtsnyena vidhiṃ prabrūhi pṛcchate / (2.1) Par.?

triṣu lokeṣu yajjñānaṃ sarvaṃ tad viditaṃ hi te // (2.2) Par.?

bhīṣma uvāca / (3.1) Par.?

śṛṇu me tvam idaṃ śuddhaṃ sāṃkhyānāṃ viditātmanām / (3.2) Par.?

vihitaṃ yatibhir buddhaiḥ kapilādibhir īśvaraiḥ // (3.3) Par.?

yasminna vibhramāḥ kecid dṛśyante manujarṣabha / (4.1) Par.?

guṇāśca yasmin bahavo doṣahāniśca kevalā // (4.2) Par.?

jñānena parisaṃkhyāya sadoṣān viṣayānnṛpa / (5.1) Par.?

mānuṣān durjayān kṛtsnān paiśācān viṣayāṃstathā // (5.2) Par.?

rākṣasān viṣayāñjñātvā yakṣāṇāṃ viṣayāṃstathā / (6.1) Par.?

viṣayān auragāñjñātvā gāndharvaviṣayāṃstathā // (6.2) Par.?

pitṝṇāṃ viṣayāñjñātvā tiryakṣu caratāṃ nṛpa / (7.1) Par.?

suparṇaviṣayāñjñātvā marutāṃ viṣayāṃstathā // (7.2) Par.?

rājarṣiviṣayāñjñātvā brahmarṣiviṣayāṃstathā / (8.1) Par.?

āsurān viṣayāñjñātvā vaiśvadevāṃstathaiva ca // (8.2) Par.?

devarṣiviṣayāñjñātvā yogānām api ceśvarān / (9.1) Par.?

viṣayāṃśca prajeśānāṃ brahmaṇo viṣayāṃstathā // (9.2) Par.?

āyuṣaśca paraṃ kālaṃ loke vijñāya tattvataḥ / (10.1) Par.?

sukhasya ca paraṃ tattvaṃ vijñāya vadatāṃ vara // (10.2) Par.?

prāpte kāle ca yad duḥkhaṃ patatāṃ viṣayaiṣiṇām / (11.1) Par.?

tiryak ca patatāṃ duḥkhaṃ patatāṃ narake ca yat // (11.2) Par.?

svargasya ca guṇān kṛtsnān doṣān sarvāṃśca bhārata / (12.1) Par.?

vedavāde ca ye doṣā guṇā ye cāpi vaidikāḥ // (12.2) Par.?

jñānayoge ca ye doṣā guṇā yoge ca ye nṛpa / (13.1) Par.?

sāṃkhyajñāne ca ye doṣāstathaiva ca guṇā nṛpa // (13.2) Par.?

sattvaṃ daśaguṇaṃ jñātvā rajo navaguṇaṃ tathā / (14.1) Par.?

tamaścāṣṭaguṇaṃ jñātvā buddhiṃ saptaguṇāṃ tathā // (14.2) Par.?

ṣaḍguṇaṃ ca nabho jñātvā manaḥ pañcaguṇaṃ tathā / (15.1) Par.?

buddhiṃ caturguṇāṃ jñātvā tamaśca triguṇaṃ mahat // (15.2) Par.?

dviguṇaṃ ca rajo jñātvā sattvam ekaguṇaṃ punaḥ / (16.1) Par.?

mārgaṃ vijñāya tattvena pralaye prekṣaṇaṃ tathā // (16.2) Par.?

jñānavijñānasampannāḥ kāraṇair bhāvitāḥ śubhaiḥ / (17.1) Par.?

prāpnuvanti śubhaṃ mokṣaṃ sūkṣmā iha nabhaḥ param // (17.2) Par.?

rūpeṇa dṛṣṭiṃ saṃyuktāṃ ghrāṇaṃ gandhaguṇena ca / (18.1) Par.?

śabde saktaṃ tathā śrotraṃ jihvāṃ rasaguṇeṣu ca // (18.2) Par.?

tanuṃ sparśe tathā saktāṃ vāyuṃ nabhasi cāśritam / (19.1) Par.?

mohaṃ tamasi saṃsaktaṃ lobham artheṣu saṃśritam // (19.2) Par.?

viṣṇuṃ krānte bale śakraṃ koṣṭhe saktaṃ tathānalam / (20.1) Par.?

apsu devīṃ tathā saktām apastejasi cāśritāḥ // (20.2) Par.?

tejo vāyau tu saṃsaktaṃ vāyuṃ nabhasi cāśritam / (21.1) Par.?

nabho mahati saṃyuktaṃ mahad buddhau ca saṃśritam // (21.2) Par.?

buddhiṃ tamasi saṃsaktāṃ tamo rajasi cāśritam / (22.1) Par.?

rajaḥ sattve tathā saktaṃ sattvaṃ saktaṃ tathātmani // (22.2) Par.?

saktam ātmānam īśe ca deve nārāyaṇe tathā / (23.1) Par.?

devaṃ mokṣe ca saṃsaktaṃ mokṣaṃ saktaṃ tu na kvacit // (23.2) Par.?

jñātvā sattvayutaṃ dehaṃ vṛtaṃ ṣoḍaśabhir guṇaiḥ / (24.1) Par.?

svabhāvaṃ cetanāṃ caiva jñātvā vai deham āśrite // (24.2) Par.?

madhyastham ekam ātmānaṃ pāpaṃ yasminna vidyate / (25.1) Par.?

dvitīyaṃ karma vijñāya nṛpate viṣayaiṣiṇām // (25.2) Par.?

indriyāṇīndriyārthāṃśca sarvān ātmani saṃśritān / (26.1) Par.?

prāṇāpānau samānaṃ ca vyānodānau ca tattvataḥ // (26.2) Par.?

avāk caivānilaṃ jñātvā pravahaṃ cānilaṃ punaḥ / (27.1) Par.?

sapta vātāṃstathā śeṣān saptadhā vidhivat punaḥ // (27.2) Par.?

prajāpatīn ṛṣīṃścaiva mārgāṃśca subahūn varān / (28.1) Par.?

saptarṣīṃśca bahūñ jñātvā rājarṣīṃśca paraṃtapa // (28.2) Par.?

surarṣīnmahataścānyānmaharṣīn sūryasaṃnibhān / (29.1) Par.?

aiśvaryāccyāvitāñ jñātvā kālena mahatā nṛpa // (29.2) Par.?

mahatāṃ bhūtasaṃghānāṃ śrutvā nāśaṃ ca pārthiva / (30.1) Par.?

gatiṃ cāpyaśubhāṃ jñātvā nṛpate pāpakarmaṇām // (30.2) Par.?

vaitaraṇyāṃ ca yad duḥkhaṃ patitānāṃ yamakṣaye / (31.1) Par.?

yonīṣu ca vicitrāsu saṃsārān aśubhāṃstathā // (31.2) Par.?

jaṭhare cāśubhe vāsaṃ śoṇitodakabhājane / (32.1) Par.?

śleṣmamūtrapurīṣe ca tīvragandhasamanvite // (32.2) Par.?

śukraśoṇitasaṃghāte majjāsnāyuparigrahe / (33.1) Par.?

sirāśatasamākīrṇe navadvāre pure 'śucau // (33.2) Par.?

vijñāyāhitam ātmānaṃ yogāṃśca vividhānnṛpa / (34.1) Par.?

tāmasānāṃ ca jantūnāṃ ramaṇīyāvṛtātmanām // (34.2) Par.?

sāttvikānāṃ ca jantūnāṃ kutsitaṃ bharatarṣabha / (35.1) Par.?

garhitaṃ mahatām arthe sāṃkhyānāṃ viditātmanām // (35.2) Par.?

upaplavāṃstathā ghorāñ śaśinastejasastathā / (36.1) Par.?

tārāṇāṃ patanaṃ dṛṣṭvā nakṣatrāṇāṃ ca paryayam // (36.2) Par.?

dvaṃdvānāṃ viprayogaṃ ca vijñāya kṛpaṇaṃ nṛpa / (37.1) Par.?

anyonyabhakṣaṇaṃ dṛṣṭvā bhūtānām api cāśubham // (37.2) Par.?

bālye mohaṃ ca vijñāya kṣayaṃ dehasya cāśubham / (38.1) Par.?

rāge mohe ca samprāpte kvacit sattvaṃ samāśritam // (38.2) Par.?

sahasreṣu naraḥ kaścinmokṣabuddhiṃ samāśritaḥ / (39.1) Par.?

durlabhatvaṃ ca mokṣasya vijñāya śrutipūrvakam // (39.2) Par.?

bahumānam alabdheṣu labdhe madhyasthatāṃ punaḥ / (40.1) Par.?

viṣayāṇāṃ ca daurātmyaṃ vijñāya nṛpate punaḥ // (40.2) Par.?

gatāsūnāṃ ca kaunteya dehān dṛṣṭvā tathāśubhān / (41.1) Par.?

vāsaṃ kuleṣu jantūnāṃ duḥkhaṃ vijñāya bhārata // (41.2) Par.?

brahmaghnānāṃ gatiṃ jñātvā patitānāṃ sudāruṇām / (42.1) Par.?

surāpāne ca saktānāṃ brāhmaṇānāṃ durātmanām / (42.2) Par.?

gurudāraprasaktānāṃ gatiṃ vijñāya cāśubhām // (42.3) Par.?

jananīṣu ca vartante ye na samyag yudhiṣṭhira / (43.1) Par.?

sadevakeṣu lokeṣu ye na vartanti mānavāḥ // (43.2) Par.?

tena jñānena vijñāya gatiṃ cāśubhakarmaṇām / (44.1) Par.?

tiryagyonigatānāṃ ca vijñāya gatayaḥ pṛthak // (44.2) Par.?

vedavādāṃstathā citrān ṛtūnāṃ paryayāṃstathā / (45.1) Par.?

kṣayaṃ saṃvatsarāṇāṃ ca māsānāṃ prakṣayaṃ tathā // (45.2) Par.?

pakṣakṣayaṃ tathā dṛṣṭvā divasānāṃ ca saṃkṣayam / (46.1) Par.?

kṣayaṃ vṛddhiṃ ca candrasya dṛṣṭvā pratyakṣatastathā // (46.2) Par.?

vṛddhiṃ dṛṣṭvā samudrāṇāṃ kṣayaṃ teṣāṃ tathā punaḥ / (47.1) Par.?

kṣayaṃ dhanānāṃ ca tathā punar vṛddhiṃ tathaiva ca // (47.2) Par.?

saṃyogānāṃ kṣayaṃ dṛṣṭvā yugānāṃ ca viśeṣataḥ / (48.1) Par.?

kṣayaṃ ca dṛṣṭvā śailānāṃ kṣayaṃ ca saritāṃ tathā // (48.2) Par.?

varṇānāṃ ca kṣayaṃ dṛṣṭvā kṣayāntaṃ ca punaḥ punaḥ / (49.1) Par.?

jarāmṛtyuṃ tathā janma dṛṣṭvā duḥkhāni caiva ha // (49.2) Par.?

dehadoṣāṃstathā jñātvā teṣāṃ duḥkhaṃ ca tattvataḥ / (50.1) Par.?

dehaviklavatāṃ caiva samyag vijñāya bhārata // (50.2) Par.?

ātmadoṣāṃśca vijñāya sarvān ātmani saṃśritān / (51.1) Par.?

svadehād utthitān gandhāṃstathā vijñāya cāśubhān // (51.2) Par.?

yudhiṣṭhira uvāca / (52.1) Par.?

kān svagātrodbhavān doṣān paśyasyamitavikrama / (52.2) Par.?

etanme saṃśayaṃ kṛtsnaṃ vaktum arhasi tattvataḥ // (52.3) Par.?

bhīṣma uvāca / (53.1) Par.?

pañca doṣān prabho dehe pravadanti manīṣiṇaḥ / (53.2) Par.?

mārgajñāḥ kāpilāḥ sāṃkhyāḥ śṛṇu tān arisūdana // (53.3) Par.?

kāmakrodhau bhayaṃ nidrā pañcamaḥ śvāsa ucyate / (54.1) Par.?

ete doṣāḥ śarīreṣu dṛśyante sarvadehinām // (54.2) Par.?

chindanti kṣamayā krodhaṃ kāmaṃ saṃkalpavarjanāt / (55.1) Par.?

sattvasaṃśīlanānnidrām apramādād bhayaṃ tathā / (55.2) Par.?

chindanti pañcamaṃ śvāsaṃ laghvāhāratayā nṛpa // (55.3) Par.?

guṇān guṇaśatair jñātvā doṣān doṣaśatair api / (56.1) Par.?

hetūn hetuśataiścitraiścitrān vijñāya tattvataḥ // (56.2) Par.?

apāṃ phenopamaṃ lokaṃ viṣṇor māyāśatair vṛtam / (57.1) Par.?

cittabhittipratīkāśaṃ nalasāram anarthakam // (57.2) Par.?

tamaḥ śvabhranibhaṃ dṛṣṭvā varṣabudbudasaṃnibham / (58.1) Par.?

nāśaprāyaṃ sukhāddhīnaṃ nāśottaram abhāvagam / (58.2) Par.?

rajastamasi saṃmagnaṃ paṅke dvipam ivāvaśam // (58.3) Par.?

sāṃkhyā rājanmahāprājñāstyaktvā dehaṃ prajākṛtam / (59.1) Par.?

jñānajñeyena sāṃkhyena vyāpinā mahatā nṛpa // (59.2) Par.?

rājasān aśubhān gandhāṃstāmasāṃśca tathāvidhān / (60.1) Par.?

puṇyāṃśca sāttvikān gandhān sparśajān dehasaṃśritān / (60.2) Par.?

chittvāśu jñānaśastreṇa tapodaṇḍena bhārata // (60.3) Par.?

tato duḥkhodakaṃ ghoraṃ cintāśokamahāhradam / (61.1) Par.?

vyādhimṛtyumahāgrāhaṃ mahābhayamahoragam // (61.2) Par.?

tamaḥkūrmaṃ rajomīnaṃ prajñayā saṃtarantyuta / (62.1) Par.?

snehapaṅkaṃ jarādurgaṃ sparśadvīpam ariṃdama // (62.2) Par.?

karmāgādhaṃ satyatīraṃ sthitavratam idaṃ nṛpa / (63.1) Par.?

hiṃsāśīghramahāvegaṃ nānārasamahākaram // (63.2) Par.?

nānāprītimahāratnaṃ duḥkhajvarasamīraṇam / (64.1) Par.?

śokatṛṣṇāmahāvartaṃ tīkṣṇavyādhimahāgajam // (64.2) Par.?

asthisaṃghātasaṃghāṭaṃ śleṣmaphenam ariṃdama / (65.1) Par.?

dānamuktākaraṃ bhīmaṃ śoṇitahradavidrumam // (65.2) Par.?

hasitotkruṣṭanirghoṣaṃ nānājñānasudustaram / (66.1) Par.?

rodanāśrumalakṣāraṃ saṅgatyāgaparāyaṇam // (66.2) Par.?

punar ājanmalokaughaṃ putrabāndhavapattanam / (67.1) Par.?

ahiṃsāsatyamaryādaṃ prāṇatyāgamahormiṇam // (67.2) Par.?

vedāntagamanadvīpaṃ sarvabhūtadayodadhim / (68.1) Par.?

mokṣaduṣprāpaviṣayaṃ vaḍavāmukhasāgaram // (68.2) Par.?

taranti munayaḥ siddhā jñānayogena bhārata / (69.1) Par.?

tīrtvā ca dustaraṃ janma viśanti vimalaṃ nabhaḥ // (69.2) Par.?

tatastān sukṛtīn sāṃkhyān sūryo vahati raśmibhiḥ / (70.1) Par.?

padmatantuvad āviśya pravahan viṣayānnṛpa // (70.2) Par.?

tatra tān pravaho vāyuḥ pratigṛhṇāti bhārata / (71.1) Par.?

vītarāgān yatīn siddhān vīryayuktāṃstapodhanān // (71.2) Par.?

sūkṣmaḥ śītaḥ sugandhī ca sukhasparśaśca bhārata / (72.1) Par.?

saptānāṃ marutāṃ śreṣṭho lokān gacchati yaḥ śubhān / (72.2) Par.?

sa tān vahati kaunteya nabhasaḥ paramāṃ gatim // (72.3) Par.?

nabho vahati lokeśa rajasaḥ paramāṃ gatim / (73.1) Par.?

rajo vahati rājendra sattvasya paramāṃ gatim // (73.2) Par.?

sattvaṃ vahati śuddhātman paraṃ nārāyaṇaṃ prabhum / (74.1) Par.?

prabhur vahati śuddhātmā paramātmānam ātmanā // (74.2) Par.?

paramātmānam āsādya tadbhūtāyatanāmalāḥ / (75.1) Par.?

amṛtatvāya kalpante na nivartanti cābhibho / (75.2) Par.?

paramā sā gatiḥ pārtha nirdvaṃdvānāṃ mahātmanām // (75.3) Par.?

yudhiṣṭhira uvāca / (76.1) Par.?

sthānam uttamam āsādya bhagavantaṃ sthiravratāḥ / (76.2) Par.?

ājanmamaraṇaṃ vā te smarantyuta na vānagha // (76.3) Par.?

yad atra tathyaṃ tanme tvaṃ yathāvad vaktum arhasi / (77.1) Par.?

tvad ṛte mānavaṃ nānyaṃ praṣṭum arhāmi kaurava // (77.2) Par.?

mokṣadoṣo mahān eṣa prāpya siddhiṃ gatān ṛṣīn / (78.1) Par.?

yadi tatraiva vijñāne vartante yatayaḥ pare // (78.2) Par.?

pravṛttilakṣaṇaṃ dharmaṃ paśyāmi paramaṃ nṛpa / (79.1) Par.?

magnasya hi pare jñāne kiṃ nu duḥkhataraṃ bhavet // (79.2) Par.?

bhīṣma uvāca / (80.1) Par.?

yathānyāyaṃ tvayā tāta praśnaḥ pṛṣṭaḥ susaṃkaṭaḥ / (80.2) Par.?

buddhānām api saṃmohaḥ praśne 'smin bharatarṣabha / (80.3) Par.?

atrāpi tattvaṃ paramaṃ śṛṇu samyaṅ mayeritam // (80.4) Par.?

buddhiśca paramā yatra kāpilānāṃ mahātmanām / (81.1) Par.?

indriyāṇyapi budhyante svadehaṃ dehino nṛpa / (81.2) Par.?

kāraṇānyātmanastāni sūkṣmaḥ paśyati taistu saḥ // (81.3) Par.?

ātmanā viprahīṇāni kāṣṭhakuḍyasamāni tu / (82.1) Par.?

vinaśyanti na saṃdehaḥ phenā iva mahārṇave // (82.2) Par.?

indriyaiḥ saha suptasya dehinaḥ śatrutāpana / (83.1) Par.?

sūkṣmaścarati sarvatra nabhasīva samīraṇaḥ // (83.2) Par.?

sa paśyati yathānyāyaṃ sparśān spṛśati cābhibho / (84.1) Par.?

budhyamāno yathāpūrvam akhileneha bhārata // (84.2) Par.?

indriyāṇīha sarvāṇi sve sve sthāne yathāvidhi / (85.1) Par.?

anīśatvāt pralīyante sarpā hataviṣā iva // (85.2) Par.?

indriyāṇāṃ tu sarveṣāṃ svasthāneṣveva sarvaśaḥ / (86.1) Par.?

ākramya gatayaḥ sūkṣmāścaratyātmā na saṃśayaḥ // (86.2) Par.?

sattvasya ca guṇān kṛtsnān rajasaśca guṇān punaḥ / (87.1) Par.?

guṇāṃśca tamasaḥ sarvān guṇān buddheśca bhārata // (87.2) Par.?

guṇāṃśca manasastadvannabhasaśca guṇāṃstathā / (88.1) Par.?

guṇān vāyośca dharmātmaṃstejasaśca guṇān punaḥ // (88.2) Par.?

apāṃ guṇāṃstathā pārtha pārthivāṃśca guṇān api / (89.1) Par.?

sarvātmanā guṇair vyāpya kṣetrajñaḥ sa yudhiṣṭhira // (89.2) Par.?

ātmā ca yāti kṣetrajñaṃ karmaṇī ca śubhāśubhe / (90.1) Par.?

śiṣyā iva mahātmānam indriyāṇi ca taṃ vibho // (90.2) Par.?

prakṛtiṃ cāpyatikramya gacchatyātmānam avyayam / (91.1) Par.?

paraṃ nārāyaṇātmānaṃ nirdvaṃdvaṃ prakṛteḥ param // (91.2) Par.?

vimuktaḥ puṇyapāpebhyaḥ praviṣṭastam anāmayam / (92.1) Par.?

paramātmānam aguṇaṃ na nivartati bhārata // (92.2) Par.?

śiṣṭaṃ tvatra manas tāta indriyāṇi ca bhārata / (93.1) Par.?

āgacchanti yathākālaṃ guroḥ saṃdeśakāriṇaḥ // (93.2) Par.?

śakyaṃ cālpena kālena śāntiṃ prāptuṃ guṇārthinā / (94.1) Par.?

evaṃ yuktena kaunteya yuktajñānena mokṣiṇā // (94.2) Par.?

sāṃkhyā rājanmahāprājñā gacchanti paramāṃ gatim / (95.1) Par.?

jñānenānena kaunteya tulyaṃ jñānaṃ na vidyate // (95.2) Par.?

atra te saṃśayo mā bhūjjñānaṃ sāṃkhyaṃ paraṃ matam / (96.1) Par.?

akṣaraṃ dhruvam avyaktaṃ pūrvaṃ brahma sanātanam // (96.2) Par.?

anādimadhyanidhanaṃ nirdvaṃdvaṃ kartṛ śāśvatam / (97.1) Par.?

kūṭasthaṃ caiva nityaṃ ca yad vadanti śamātmakāḥ // (97.2) Par.?

yataḥ sarvāḥ pravartante sargapralayavikriyāḥ / (98.1) Par.?

yacca śaṃsanti śāstreṣu vadanti paramarṣayaḥ // (98.2) Par.?

sarve viprāśca devāśca tathāgamavido janāḥ / (99.1) Par.?

brahmaṇyaṃ paramaṃ devam anantaṃ parato 'cyutam // (99.2) Par.?

prārthayantaśca taṃ viprā vadanti guṇabuddhayaḥ / (100.1) Par.?

samyag yuktāstathā yogāḥ sāṃkhyāścāmitadarśanāḥ // (100.2) Par.?

amūrtestasya kaunteya sāṃkhyaṃ mūrtir iti śrutiḥ / (101.1) Par.?

abhijñānāni tasyāhur mataṃ hi bharatarṣabha // (101.2) Par.?

dvividhānīha bhūtāni pṛthivyāṃ pṛthivīpate / (102.1) Par.?

jaṅgamāgamasaṃjñāni jaṅgamaṃ tu viśiṣyate // (102.2) Par.?

jñānaṃ mahad yaddhi mahatsu rājan vedeṣu sāṃkhyeṣu tathaiva yoge / (103.1) Par.?

yaccāpi dṛṣṭaṃ vividhaṃ purāṇaṃ sāṃkhyāgataṃ tannikhilaṃ narendra // (103.2) Par.?

yaccetihāseṣu mahatsu dṛṣṭaṃ yaccārthaśāstre nṛpa śiṣṭajuṣṭe / (104.1) Par.?

jñānaṃ ca loke yad ihāsti kiṃcit sāṃkhyāgataṃ tacca mahanmahātman // (104.2) Par.?

śamaśca dṛṣṭaḥ paramaṃ balaṃ ca jñānaṃ ca sūkṣmaṃ ca yathāvad uktam / (105.1) Par.?

tapāṃsi sūkṣmāṇi sukhāni caiva sāṃkhye yathāvad vihitāni rājan // (105.2) Par.?

viparyaye tasya hi pārtha devān gacchanti sāṃkhyāḥ satataṃ sukhena / (106.1) Par.?

tāṃścānusaṃcārya tataḥ kṛtārthāḥ patanti vipreṣu yateṣu bhūyaḥ // (106.2) Par.?

hitvā ca dehaṃ praviśanti mokṣaṃ divaukaso dyām iva pārtha sāṃkhyāḥ / (107.1) Par.?

tato 'dhikaṃ te 'bhiratā mahārhe sāṃkhye dvijāḥ pārthiva śiṣṭajuṣṭe // (107.2) Par.?

teṣāṃ na tiryaggamanaṃ hi dṛṣṭaṃ nāvāg gatiḥ pāpakṛtāṃ nivāsaḥ / (108.1) Par.?

na cābudhānām api te dvijātayo ye jñānam etannṛpate 'nuraktāḥ // (108.2) Par.?

sāṃkhyaṃ viśālaṃ paramaṃ purāṇaṃ mahārṇavaṃ vimalam udārakāntam / (109.1) Par.?

kṛtsnaṃ ca sāṃkhyaṃ nṛpate mahātmā nārāyaṇo dhārayate 'prameyam // (109.2) Par.?

etanmayoktaṃ naradeva tattvaṃ nārāyaṇo viśvam idaṃ purāṇam / (110.1) Par.?

sa sargakāle ca karoti sargaṃ saṃhārakāle ca tad atti bhūyaḥ // (110.2) Par.?

Duration=0.91558790206909 secs.