Texts

bhīṣma uvāca / (1.1) Par.?

atrāpyudāharantīmam itihāsaṃ purātanam / (1.2) Par.?

śakraśambarasaṃvādaṃ tannibodha yudhiṣṭhira // (1.3) Par.?

śakro hyajñātarūpeṇa jaṭī bhūtvā rajo'ruṇaḥ / (2.1) Par.?

virūpaṃ rūpam āsthāya praśnaṃ papraccha śambaram // (2.2) Par.?

kena śambara vṛttena svajātyān adhitiṣṭhasi / (3.1) Par.?

śreṣṭhaṃ tvāṃ kena manyante tanme prabrūhi pṛcchataḥ // (3.2) Par.?

śambara uvāca / (4.1) Par.?

nāsūyāmi sadā viprān brahmāṇaṃ ca pitāmaham / (4.2) Par.?

śāstrāṇi vadato viprān saṃmanyāmi yathāsukham // (4.3) Par.?

śrutvā ca nāvajānāmi nāparādhyāmi karhicit / (5.1) Par.?

abhyarcyān anupṛcchāmi pādau gṛhṇāmi dhīmatām // (5.2) Par.?

te viśrabdhāḥ prabhāṣante saṃyacchanti ca māṃ sadā / (6.1) Par.?

pramatteṣvapramatto 'smi sadā supteṣu jāgṛmi // (6.2) Par.?

te mā śāstrapathe yuktaṃ brahmaṇyam anasūyakam / (7.1) Par.?

samāsiñcanti śāstāraḥ kṣaudraṃ madhviva makṣikāḥ // (7.2) Par.?

yacca bhāṣanti te tuṣṭāstat tad gṛhṇāmi medhayā / (8.1) Par.?

samādhim ātmano nityam anulomam acintayan // (8.2) Par.?

so 'haṃ vāgagrasṛṣṭānāṃ rasānām avalehakaḥ / (9.1) Par.?

svajātyān adhitiṣṭhāmi nakṣatrāṇīva candramāḥ // (9.2) Par.?

etat pṛthivyām amṛtam etaccakṣur anuttamam / (10.1) Par.?

yad brāhmaṇamukhācchāstram iha śrutvā pravartate // (10.2) Par.?

etat kāraṇam ājñāya dṛṣṭvā devāsuraṃ purā / (11.1) Par.?

yuddhaṃ pitā me hṛṣṭātmā vismitaḥ pratyapadyata // (11.2) Par.?

dṛṣṭvā ca brāhmaṇānāṃ tu mahimānaṃ mahātmanām / (12.1) Par.?

paryapṛcchat katham ime siddhā iti niśākaram // (12.2) Par.?

soma uvāca / (13.1) Par.?

brāhmaṇāstapasā sarve sidhyante vāgbalāḥ sadā / (13.2) Par.?

bhujavīryā hi rājāno vāgastrāśca dvijātayaḥ // (13.3) Par.?

pravasan vāpyadhīyīta bahvīr durvasatīr vasan / (14.1) Par.?

nirmanyur api nirmāno yatiḥ syāt samadarśanaḥ // (14.2) Par.?

api cejjātisampannaḥ sarvān vedān pitur gṛhe / (15.1) Par.?

ślāghamāna ivādhīyed grāmya ityeva taṃ viduḥ // (15.2) Par.?

bhūmir etau nigirati sarpo bilaśayān iva / (16.1) Par.?

rājānaṃ cāpyayoddhāraṃ brāhmaṇaṃ cāpravāsinam // (16.2) Par.?

atimānaḥ śriyaṃ hanti puruṣasyālpamedhasaḥ / (17.1) Par.?

garbheṇa duṣyate kanyā gṛhavāsena ca dvijaḥ // (17.2) Par.?

ityetanme pitā śrutvā somād adbhutadarśanāt / (18.1) Par.?

brāhmaṇān pūjayāmāsa tathaivāhaṃ mahāvratān // (18.2) Par.?

bhīṣma uvāca / (19.1) Par.?

śrutvaitad vacanaṃ śakro dānavendramukhāccyutam / (19.2) Par.?

dvijān saṃpūjayāmāsa mahendratvam avāpa ca // (19.3) Par.?