Texts

ṛṣaya ūcuḥ / (1.1) Par.?

ādisargaśca yaḥ sūta kathito vistareṇa tu / (1.2) Par.?

pratisargaśca ye yeṣām adhipās tānvadasva naḥ // (1.3) Par.?

sūta uvāca / (2.1) Par.?

yadābhiṣiktaḥ sakalādhirājye pṛthurdharitryāmadhipo babhūva / (2.2) Par.?

tadauṣadhīnāmadhipaṃ cakāra yajñavratānāṃ tapasāṃ ca candram // (2.3) Par.?

nakṣatratārādvijavṛkṣagulmalatāvitānasya ca rukmagarbhaḥ / (3.1) Par.?

apāmadhīśaṃ varuṇaṃ dhanānāṃ rājñāṃ prabhuṃ vaiśravaṇaṃ ca tadvat // (3.2) Par.?

viṣṇuṃ ravīṇāmadhipaṃ vasūnām agniṃ ca lokādhipatiścakāra / (4.1) Par.?

prajāpatīnāmadhipaṃ ca dakṣaṃ cakāra śakraṃ marutāmadhīśam // (4.2) Par.?

daityādhipānāmatha dānavānāṃ prahlādamīśaṃ ca yamaṃ pitṝṇām / (5.1) Par.?

piśācarakṣaḥpaśubhūtayakṣavetālarājaṃ tv atha śūlapāṇim // (5.2) Par.?

prāleyaśailaṃ ca patiṃ girīṇām īśaṃ samudraṃ sasarinnadānām / (6.1) Par.?

gandharvavidyādharakiṃnarāṇām īśaṃ punaścitrarathaṃ cakāra // (6.2) Par.?

nāgādhipaṃ vāsukimugravīryaṃ sarpādhipaṃ takṣakamādideśa / (7.1) Par.?

diśāṃ gajānāmadhipaṃ cakāra gajendramairāvatanāmadheyam // (7.2) Par.?

suparṇamīśaṃ patatāmathāśvarājānamuccaiḥśravasaṃ cakāra / (8.1) Par.?

siṃhaṃ mṛgāṇāṃ vṛṣabhaṃ gavāṃ ca plakṣaṃ punaḥ sarvavanaspatīnām // (8.2) Par.?

pitāmahaḥ pūrvamathābhyaṣiñcaccaitānpunaḥ sarvadiśādhināthān / (9.1) Par.?

pūrveṇa dikpālam athābhyaṣiñcannāmnā sudharmāṇam arātiketum // (9.2) Par.?

tato'dhipaṃ dakṣiṇataścakāra sarveśvaraṃ śaṅkhapadābhidhānam / (10.1) Par.?

sa ketumantaṃ ca digīśamīśaścakāra paścād bhuvanāṇḍagarbhaḥ // (10.2) Par.?

hiraṇyaromāṇam udagdigīśaṃ prajāpatir devasutaṃ cakāra / (11.1) Par.?

adyāpi kurvanti diśām adhīśāḥ śatrūn dahantastu bhuvo'bhirakṣām // (11.2) Par.?

caturbhir ebhiḥ pṛthunāmadheyo nṛpo'bhiṣiktaḥ prathamaṃ pṛthivyām / (12.1) Par.?

gate'ntare cākṣuṣanāmadheye vaivasvatākhye ca punaḥ pravṛtte / (12.2) Par.?

prajāpatiḥ so 'sya carācarasya babhūva sūryānvayavaṃśacihnaḥ // (12.3) Par.?