Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 9690

Click on a sentence to show its analysis
Keep the mouse pointer over a lemma to show its meanings.

rucirākṛtiḥ kanakasānum atho paramaḥ pumān iva patiṃ patatām / (1.1) Par.?

dhṛtasatpathas tripathagām abhitaḥ sa tam āruroha puruhūtasutaḥ // (1.2) Par.?

tam anindyabandina ivendrasutaṃ vihitālinikvaṇajayadhvanayaḥ / (2.1) Par.?

pavaneritākulavijihmaśikhā jagatīruho 'vacakaruḥ kusumaiḥ // (2.2) Par.?

avadhūtapaṅkajaparāgakaṇās tanujāhnavīsalilavīcibhidaḥ / (3.1) Par.?

parirebhire 'bhimukham etya sukhāḥ suhṛdaḥ sakhāyam iva taṃ marutaḥ // (3.2) Par.?

uditopalaskhalanasaṃvalitāḥ sphuṭahaṃsasārasavirāvayujaḥ / (4.1) Par.?

mudam asya māṅgalikatūryakṛtāṃ dhvanayaḥ pratenur anuvapram apām // (4.2) Par.?

avarugṇatuṅgasuradārutarau nicaye puraḥ surasaritpayasām / (5.1) Par.?

sa dadarśa vetasavanācaritāṃ praṇatiṃ balīyasi samṛddhikarīm // (5.2) Par.?

prababhūva nālam avalokayituṃ paritaḥ sarojarajasāruṇitam / (6.1) Par.?

sariduttarīyam iva saṃhatimat sa taraṅgaraṅgi kalahaṃsakulam // (6.2) Par.?

dadhati kṣatīḥ pariṇatadvirade muditāliyoṣiti madasrutibhiḥ / (7.1) Par.?

adhikāṃ sa rodhasi babandha dhṛtiṃ mahate rujann api guṇāya mahān // (7.2) Par.?

anuhemavapram aruṇaiḥ samatāṃ gatam ūrmibhiḥ sahacaraṃ pṛthubhiḥ / (8.1) Par.?

sa rathāṅganāmavanitāṃ karuṇair anubadhnatīm abhinananda rutaiḥ // (8.2) Par.?

sitavājine nijagadū rucayaś calavīcirāgaracanāpaṭavaḥ / (9.1) Par.?

maṇijālam ambhasi nimagnam api sphuritaṃ manogatam ivākṛtayaḥ // (9.2) Par.?

upalāhatoddhatataraṅgadhṛtaṃ javinā vidhūtavitataṃ marutā / (10.1) Par.?

sa dadarśa ketakaśikhāviśadaṃ saritaḥ prahāsam iva phenam apām // (10.2) Par.?

bahu barhicandrikanibhaṃ vidadhe dhṛtim asya dānapayasāṃ paṭalam / (11.1) Par.?

avagāḍham īkṣitum ivaibhapatiṃ vikasadvilocanaśataṃ saritaḥ // (11.2) Par.?

pratibodhajṛmbhaṇavibhīnamukhī puline saroruhadṛśā dadṛśe / (12.1) Par.?

patadacchamauktikamaṇiprakarā galadaśrubindur iva śuktivadhūḥ // (12.2) Par.?

śucir apsu vidrumalatāviṭapas tanusāndraphenalavasaṃvalitaḥ / (13.1) Par.?

smaradāyinaḥ smarayati sma bhṛśaṃ dayitādharasya daśanāṃśubhṛtaḥ // (13.2) Par.?

upalabhya cañcalataraṅgahṛtaṃ madagandham utthitavatāṃ payasaḥ / (14.1) Par.?

pratidantinām iva sa saṃbubudhe kariyādasām abhimukhān kariṇaḥ // (14.2) Par.?

sa jagāma vismayam udvīkṣya puraḥ sahasā samutpipatiṣoḥ phaṇinaḥ / (15.1) Par.?

prahitaṃ divi prajavibhiḥ śvasitaiḥ śaradabhravibhramam apāṃ paṭalam // (15.2) Par.?

sa tatāra saikatavatīr abhitaḥ śapharīparisphuritacārudṛśaḥ / (16.1) Par.?

lalitāḥ sakhīr iva bṛhajjaghanāḥ suranimnagām upayatīḥ saritaḥ // (16.2) Par.?

adhiruhya puṣpabharanamraśikhaiḥ paritaḥ pariṣkṛtatalāṃ tarubhiḥ / (17.1) Par.?

manasaḥ prasattim iva mūrdhni gireḥ śucim āsasāda sa vanāntabhuvam // (17.2) Par.?

anusānu puṣpitalatāvitatiḥ phalitorubhūruhaviviktavanaḥ / (18.1) Par.?

dhṛtim ātatāna tanayasya hares tapase 'dhivastum acalām acalaḥ // (18.2) Par.?

praṇidhāya tatra vidhinātha dhiyaṃ dadhataḥ purātanamuner munitām / (19.1) Par.?

śramam ādadhāv asukaraṃ na tapaḥ kim ivāvasādakaram ātmavatām // (19.2) Par.?

śamayan dhṛtendriyaśamaikasukhaḥ śucibhir guṇair aghamayaṃ sa tamaḥ / (20.1) Par.?

prativāsaraṃ sukṛtibhir vavṛdhe vimalaḥ kalābhir iva śītaruciḥ // (20.2) Par.?

adharīcakāra ca vivekaguṇād aguṇeṣu tasya dhiyam astavataḥ / (21.1) Par.?

pratighātinīṃ viṣayasaṅgaratiṃ nirupaplavaḥ śamasukhānubhavaḥ // (21.2) Par.?

manasā japaiḥ praṇatibhiḥ prayataḥ samupeyivān adhipatiṃ sa divaḥ / (22.1) Par.?

sahajetare jayaśamau dadhatī bibharāṃbabhūva yugapan mahasī // (22.2) Par.?

śirasā harinmaṇinibhaḥ sa vahan kṛtajanmano 'bhiṣavaṇena jaṭāḥ / (23.1) Par.?

upamāṃ yayāv aruṇadīdhitibhiḥ parimṛṣṭamūrdhani tamālatarau // (23.2) Par.?

dhṛtahetir apy adhṛtajihmamatiś caritair munīn adharayañśucibhiḥ / (24.1) Par.?

rajayāṃcakāra virajāḥ sa mṛgān kam iveśate ramayituṃ na guṇāḥ // (24.2) Par.?

anukūlapātinam acaṇḍagatiṃ kiratā sugandhim abhitaḥ pavanam / (25.1) Par.?

avadhīritārtavaguṇaṃ sukhatāṃ nayatā rucāṃ nicayam aṃśumataḥ // (25.2) Par.?

navapallavāñjalibhṛtaḥ pracaye bṛhatas tarūn gamayatāvanatim / (26.1) Par.?

stṛṇatā tṛṇaiḥ pratiniśaṃ mṛdubhiḥ śayanīyatām upayatīṃ vasudhām // (26.2) Par.?

patitair apetajaladān nabhasaḥ pṛṣatair apāṃ śamayatā ca rajaḥ / (27.1) Par.?

sa dayāluneva parigāḍhakṛśaḥ paricaryayānujagṛhe tapasā // (27.2) Par.?

mahate phalāya tad avekṣya śivaṃ vikasannimittakusumaṃ sa puraḥ / (28.1) Par.?

na jagāma vismayavaśaṃ vaśināṃ na nihanti dhairyam anubhāvaguṇaḥ // (28.2) Par.?

tad abhūrivāsarakṛtaṃ sukṛtair upalabhya vaibhavam ananyabhavam / (29.1) Par.?

upatasthur āsthitaviṣādadhiyaḥ śatayajvano vanacarā vasatim // (29.2) Par.?

viditāḥ praviśya vihitānatayaḥ śithilīkṛte 'dhikṛtakṛtyavidhau / (30.1) Par.?

anapetakālam abhirāmakathāḥ kathayāṃbabhūvur iti gotrabhide // (30.2) Par.?

śucivalkavītatanur anyatamas timiracchidām iva girau bhavataḥ / (31.1) Par.?

mahate jayāya maghavann anaghaḥ puruṣas tapasyati tapajjagatīm // (31.2) Par.?

sa bibharti bhīṣaṇabhujaṃgabhujaḥ pṛthi vidviṣāṃ bhayavidhāyi dhanuḥ / (32.1) Par.?

amalena tasya dhṛtasaccaritāś caritena cātiśayitā munayaḥ // (32.2) Par.?

marutaḥ śivā navatṛṇā jagatī vimalaṃ nabho rajasi vṛṣṭir apām / (33.1) Par.?

guṇasampadānuguṇatāṃ gamitaḥ kurute 'sya bhaktim iva bhūtagaṇaḥ // (33.2) Par.?

itaretarānabhibhavena mṛgās tam upāsate gurum ivāntasadaḥ / (34.1) Par.?

vinamanti cāsya taravaḥ pracaye paravān sa tena bhavateva nagaḥ // (34.2) Par.?

uru sattvam āha vipariśramatā paramaṃ vapuḥ prathayatīva jayam / (35.1) Par.?

śamino 'pi tasya navasaṃgamane vibhutānuṣaṅgi bhayam eti janaḥ // (35.2) Par.?

ṛṣivaṃśajaḥ sa yadi daityakule yadi vānvaye mahati bhūmibhṛtām / (36.1) Par.?

caratas tapas tava vaneṣu sadā na vayaṃ nirūpayitum asya gatim // (36.2) Par.?

vigaṇayya kāraṇam anekaguṇaṃ nijayāthavā kathitam alpatayā / (37.1) Par.?

asad apy adaḥ sahitum arhati naḥ kva vanecarāḥ kva nipuṇā matayaḥ // (37.2) Par.?

adhigamya guhyakagaṇād iti tan manasaḥ priyaṃ priyasutasya tapaḥ / (38.1) Par.?

nijugopa harṣam uditaṃ maghavā nayavartmagāḥ prabhavatāṃ hi dhiyaḥ // (38.2) Par.?

praṇidhāya cittam atha bhaktatayā vidite 'py apūrva iva tatra hariḥ / (39.1) Par.?

upalabdhum asya niyamasthiratāṃ surasundarīr iti vaco 'bhidadhe // (39.2) Par.?

sukumāram ekam aṇu marmabhidām atidūragaṃ yutam amoghatayā / (40.1) Par.?

avipakṣam astram aparaṃ katamad vijayāya yūyam iva cittabhuvaḥ // (40.2) Par.?

bhavavītaye hatabṛhattamasām avabodhavāri rajasaḥ śamanam / (41.1) Par.?

paripīyamāṇam iva vo 'sakalair avasādam eti nayanāñjalibhiḥ // (41.2) Par.?

bahudhā gatāṃ jagati bhūtasṛjā kamanīyatāṃ samabhihṛtya purā / (42.1) Par.?

upapāditā vidadhatā bhavatīḥ surasadmayānasumukhī janatā // (42.2) Par.?

tad upetya vighnayata tasya tapaḥ kṛtibhiḥ kalāsu sahitāḥ sacivaiḥ / (43.1) Par.?

hṛtavītarāgamanasāṃ nanu vaḥ sukhasaṅginaṃ prati sukhāvajitiḥ // (43.2) Par.?

avimṛṣyam etad abhilaṣyati sa dviṣatāṃ vadhena viṣayābhiratim / (44.1) Par.?

bhavavītaye na hi tathā sa vidhiḥ kva śarāsanaṃ kva ca vimuktipathaḥ // (44.2) Par.?

pṛthudāmni tatra paribodhi ca mā bhavatībhir anyamunivad vikṛtiḥ / (45.1) Par.?

svayaśāṃsi vikramavatām avatāṃ na vadhūṣv aghāni vimṛṣyanti dhiyaḥ // (45.2) Par.?

āśaṃsitāpaciticāru puraḥ surāṇām ādeśam ity abhimukhaṃ samavāpya bhartuḥ / (46.1) Par.?

lebhe parāṃ dyutim amartyavadhūsamūhaḥ sambhāvanā hy adhikṛtasya tanoti tejaḥ // (46.2) Par.?

praṇatim atha vidhāya prasthitāḥ sadmanas tāḥ stanabharanamitāṅgīr aṅganāḥ prītibhājaḥ / (47.1) Par.?

acalanalinalakṣmīhāri nālaṃ babhūva stimitam amarabhartur draṣṭum akṣṇāṃ sahasram // (47.2) Par.?

Duration=0.56690788269043 secs.