Texts

nandyuvāca / (1.1) Par.?

tatastutoṣa bhagavān anugṛhya maheśvaraḥ / (1.2) Par.?

stutiṃ śrutvā stutasteṣāmidaṃ vacanamabravīt // (1.3) Par.?

yaḥ paṭhecchṛṇuyādvāpi yuṣmābhiḥ kīrtitaṃ stavam / (2.1) Par.?

śrāvayedvā dvijānvipro gāṇapatyamavāpnuyāt // (2.2) Par.?

vakṣyāmi vo hitaṃ puṇyaṃ bhaktānāṃ munipuṅgavāḥ / (3.1) Par.?

strīliṅgamakhilaṃ devī prakṛtirmama dehajā // (3.2) Par.?

puṃlliṅgaṃ puruṣo viprā mama dehasamudbhavaḥ / (4.1) Par.?

ubhābhyāmeva vai sṛṣṭirmama viprā na saṃśayaḥ // (4.2) Par.?

na nindedyatinaṃ tasmāddigvāsasamanuttamam / (5.1) Par.?

bālonmattaviceṣṭaṃ tu matparaṃ brahmavādinam // (5.2) Par.?

ye hi māṃ bhasmaniratā bhasmanā dagdhakilbiṣāḥ / (6.1) Par.?

yathoktakāriṇo dāntā viprā dhyānaparāyaṇāḥ // (6.2) Par.?

mahādevaparā nityaṃ caranto hyūrdhvaretasaḥ / (7.1) Par.?

arcayanti mahādevaṃ vāṅmanaḥkāyasaṃyatāḥ // (7.2) Par.?

rudralokamanuprāpya na nivartanti te punaḥ / (8.1) Par.?

tasmādetadvrataṃ divyamavyaktaṃ vyaktaliṅginaḥ // (8.2) Par.?

bhasmavratāś ca muṇḍāś ca vratino viśvarūpiṇaḥ / (9.1) Par.?

na tānparivadedvidvānna caitānnābhilaṅghayet // (9.2) Par.?

na hasennāpriyaṃ brūyādamutreha hitārthavān / (10.1) Par.?

yastānnindati mūḍhātmā mahādevaṃ sa nindati // (10.2) Par.?

yas tvetān pūjayen nityaṃ sa pūjayati śaṅkaram / (11.1) Par.?

evameṣa mahādevo lokānāṃ hitakāmyayā // (11.2) Par.?

yuge yuge mahāyogī krīḍate bhasmaguṇṭhitaḥ / (12.1) Par.?

evaṃ carata bhadraṃ vastataḥ siddhimavāpsyatha // (12.2) Par.?

atulamiha mahābhayapraṇāśahetuṃ śivakathitaṃ paramaṃ padaṃ viditvā / (13.1) Par.?

vyapagatabhavalobhamohacittāḥ praṇipatitāḥ sahasā śirobhir ugram // (13.2) Par.?

tataḥ pramuditā viprāḥ śrutvaivaṃ kathitaṃ tadā / (14.1) Par.?

gandhodakaiḥ suśuddhaiś ca kuśapuṣpavimiśritaiḥ // (14.2) Par.?

snāpayanti mahākumbhair adbhir eva maheśvaram / (15.1) Par.?

gāyanti vividhairguhyair huṃkāraiścāpi susvaraiḥ // (15.2) Par.?

namo devādhidevāya mahādevāya vai namaḥ / (16.1) Par.?

ardhanārīśarīrāya sāṃkhyayogapravartine // (16.2) Par.?

meghavāhanakṛṣṇāya gajacarmanivāsine / (17.1) Par.?

kṛṣṇājinottarīyāya vyālayajñopavītine // (17.2) Par.?

suracitasuvicitrakuṇḍalāya suracitamālyavibhūṣaṇāya tubhyam / (18.1) Par.?

mṛgapativaracarmavāsase ca prathitayaśase namo 'stu śaṅkarāya // (18.2) Par.?

tatas tān sa munīn prītaḥ pratyuvāca maheśvaraḥ / (19.1) Par.?

prīto 'smi tapasā yuṣmān varaṃ vṛṇuta suvratāḥ // (19.2) Par.?

tataste munayaḥ sarve praṇipatya maheśvaram / (20.1) Par.?

bhṛgvaṅgirā vasiṣṭhaś ca viśvāmitrastathaiva ca // (20.2) Par.?

gautamo 'triḥ sukeśaś ca pulastyaḥ pulahaḥ kratuḥ / (21.1) Par.?

marīciḥ kaśyapaḥ kaṇvaḥ saṃvartaś ca mahātapāḥ // (21.2) Par.?

te praṇamya mahādevamidaṃ vacanamabruvan / (22.1) Par.?

bhasmasnānaṃ ca nagnatvaṃ vāmatvaṃ pratilomatā // (22.2) Par.?

sevyāsevyatvamevaṃ ca hyetadicchāma veditum / (23.1) Par.?

tatasteṣāṃ vacaḥ śrutvā bhagavānparameśvaraḥ // (23.2) Par.?

sasmitaṃ prāha samprekṣya sarvānmunivarāṃstadā // (24.1) Par.?

iti śrīliṅgamahāpurāṇe pūrvabhāge ṛṣivākyaṃ nāma trayastriṃśo 'dhyāyaḥ // (25.1) Par.?