Texts

ṛṣaya ūcuḥ / (1.1) Par.?

namo digvāsase nityaṃ kṛtāntāya triśūline / (1.2) Par.?

vikaṭāya karālāya karālavadanāya ca // (1.3) Par.?

arūpāya surūpāya viśvarūpāya te namaḥ / (2.1) Par.?

kaṭaṅkaṭāya rudrāya svāhākārāya vai namaḥ // (2.2) Par.?

sarvapraṇatadehāya svayaṃ ca praṇatātmane / (3.1) Par.?

nityaṃ nīlaśikhaṇḍāya śrīkaṇṭhāya namonamaḥ // (3.2) Par.?

nīlakaṇṭhāya devāya citābhasmāṅgadhāriṇe / (4.1) Par.?

tvaṃ brahmā sarvadevānāṃ rudrāṇāṃ nīlalohitaḥ // (4.2) Par.?

ātmā ca sarvabhūtānāṃ sāṃkhyaiḥ puruṣa ucyate / (5.1) Par.?

parvatānāṃ mahāmerurnakṣatrāṇāṃ ca candramāḥ // (5.2) Par.?

ṛṣīṇāṃ ca vasiṣṭhas tvaṃ devānāṃ vāsavas tathā / (6.1) Par.?

oṅkāraḥ sarvavedānāṃ śreṣṭhaṃ sāma ca sāmasu // (6.2) Par.?

āraṇyānāṃ paśūnāṃ ca siṃhastvaṃ parameśvaraḥ / (7.1) Par.?

grāmyāṇāmṛṣabhaścāsi bhagavāṃllokapūjitaḥ // (7.2) Par.?

sarvathā vartamāno'pi yo yo bhāvo bhaviṣyati / (8.1) Par.?

tvāmeva tatra paśyāmo brahmaṇā kathitaṃ tathā // (8.2) Par.?

kāmaḥ krodhaś ca lobhaś ca viṣādo mada eva ca / (9.1) Par.?

etad icchāmahe boddhuṃ prasīda parameśvara // (9.2) Par.?

mahāsaṃharaṇe prāpte tvayā deva kṛtātmanā / (10.1) Par.?

karaṃ lalāṭe saṃvidhya vahnirutpāditastvayā // (10.2) Par.?

tenāgninā tadā lokā arcirbhiḥ sarvato vṛtāḥ / (11.1) Par.?

tasmādagnisamā hyete bahavo vikṛtāgnayaḥ // (11.2) Par.?

kāmaḥ krodhaś ca lobhaś ca moho dambha upadravaḥ / (12.1) Par.?

yāni cānyāni bhūtāni sthāvarāṇi carāṇi ca // (12.2) Par.?

dahyante prāṇinaste tu tvatsamutthena vahninā / (13.1) Par.?

asmākaṃ dahyamānānāṃ trātā bhava sureśvara // (13.2) Par.?

tvaṃ ca lokahitārthāya bhūtāni pariṣiñcasi / (14.1) Par.?

maheśvara mahābhāga prabho śubhanirīkṣaka // (14.2) Par.?

ājñāpaya vayaṃ nātha kartāro vacanaṃ tava / (15.1) Par.?

bhūtakoṭisahasreṣu rūpakoṭiśateṣu ca // (15.2) Par.?

antaṃ gantuṃ na śaktāḥ sma devadeva namo 'stu te // (16.1) Par.?

iti śrīliṅgamahāpurāṇe pūrvabhāge dvātriṃśo 'dhyāyaḥ // (17.1) Par.?