Texts

sūta uvāca / (1.1) Par.?

iti niśamya kṛtāñjalayas tadā divi mahāmunayaḥ kṛtaniścayāḥ / (1.2) Par.?

śivataraṃ śivamīśvaramavyayaṃ manasi liṅgamayaṃ praṇipatya te // (1.3) Par.?

sakaladevapatirbhagavānajo hariraśeṣapatirguruṇā svayam / (2.1) Par.?

munivarāśca gaṇāśca surāsurā naravarāḥ śivaliṅgamayāḥ punaḥ // (2.2) Par.?

śrutvaivaṃ munayaḥ sarve ṣaṭkulīyāḥ samāhitāḥ / (3.1) Par.?

saṃtyajya sarvaṃ devasya pratiṣṭhāṃ kartumudyatāḥ // (3.2) Par.?

apṛcchansūtamanaghaṃ harṣagadgadayā girā / (4.1) Par.?

liṅgapratiṣṭhāṃ vipulāṃ sarve te śaṃsitavratāḥ // (4.2) Par.?

sūta uvāca / (5.1) Par.?

pratiṣṭhāṃ liṅgamūrtervo yathāvadanupūrvaśaḥ / (5.2) Par.?

pravakṣyāmi samāsena dharmakāmārthamuktaye // (5.3) Par.?

kṛtvaiva liṅgaṃ vidhinā bhuvi liṅgeṣu yatnataḥ / (6.1) Par.?

liṅgamekatamaṃ śailaṃ brahmaviṣṇuśivātmakam // (6.2) Par.?

hemaratnamayaṃ vāpi rājataṃ tāmrajaṃ tu vā / (7.1) Par.?

savedikaṃ sasūtraṃ ca samyagvistṛtamastakam // (7.2) Par.?

viśodhya sthāpayedbhaktyā savedikamanuttamam / (8.1) Par.?

liṅgavedī umā devī liṅgaṃ sākṣānmaheśvaraḥ // (8.2) Par.?

tayoḥ sampūjanād eva devī devaśca pūjitau / (9.1) Par.?

pratiṣṭhayā ca deveśo devyā sārdhaṃ pratiṣṭhitaḥ // (9.2) Par.?

tasmātsavedikaṃ liṅgaṃ sthāpayetsthāpakottamaḥ // (10.1) Par.?

mūle brahmā vasati bhagavānmadhyabhāge ca viṣṇuḥ sarveśānaḥ paśupatirajo rudramūrtirvareṇyaḥ / (11.1) Par.?

tasmālliṅgaṃ gurutarataraṃ pūjayetsthāpayedvā yasmātpūjyo gaṇapatirasau devamukhyaiḥ samastaiḥ // (11.2) Par.?

gandhaiḥ sragdhūpadīpaiḥ snapanahutabalistotramantropahārairnityaṃ ye 'bhyarcayanti tridaśavaratanuṃ liṅgamūrtiṃ maheśam / (12.1) Par.?

garbhādhānādināśakṣayabhayarahitā devagandharvamukhyaiḥ siddhairvandyāśca pūjyā gaṇavaranamitāste bhavantyaprameyāḥ // (12.2) Par.?

tasmādbhaktyopacāreṇa sthāpayetparameśvaram / (13.1) Par.?

pūjayecca viśeṣeṇa liṅgaṃ sarvārthasiddhaye // (13.2) Par.?

samarcya sthāpayelliṅgaṃ tīrthamadhye śivāsane / (14.1) Par.?

kūrcavastrādibhirliṅgamācchādya kalaśaiḥ punaḥ // (14.2) Par.?

lokapālādidaivatyaiḥ sakūrcaiḥ sākṣataiḥ śubhaiḥ / (15.1) Par.?

utkūrcaiḥ svastikādyaiśca citratantukaveṣṭitaiḥ // (15.2) Par.?

vajrādikāyudhopetaiḥ savastraiḥ sapidhānakaiḥ / (16.1) Par.?

lakṣayetparito liṅgamīśānena pratiṣṭhitam // (16.2) Par.?

dhūpadīpasamopetaṃ vitānavitatāṃbaram / (17.1) Par.?

lokapāladhvajaiścaiva gajādimahiṣādibhiḥ // (17.2) Par.?

citritaiḥ pūjitaiścaiva darbhamālā ca śobhanā / (18.1) Par.?

sarvalakṣaṇasampūrṇā tayā bāhye ca veṣṭayet // (18.2) Par.?

tato 'dhivāsayet toye dhūpadīpasamanvite / (19.1) Par.?

pañcāhaṃ vā tryahaṃ vātha ekarātram athāpi vā // (19.2) Par.?

vedādhyayanasampanno nṛtyagītādimaṅgalaiḥ / (20.1) Par.?

kiṅkiṇīravakopetaṃ tālavīṇāravairapi // (20.2) Par.?

īkṣayetkālamavyagro yajamānaḥ samāhitaḥ / (21.1) Par.?

utthāpya svastikaṃ dhyāyenmaṇḍape lakṣaṇānvite // (21.2) Par.?

saṃskṛte vedisaṃyukte navakuṇḍena saṃvṛte / (22.1) Par.?

pūrvoktavidhinā yukte sarvalakṣaṇasaṃyute // (22.2) Par.?

aṣṭamaṇḍalasaṃyukte digdhvajāṣṭakasaṃyute / (23.1) Par.?

pūrvoktalakṣaṇopetaiḥ kuṇḍaiḥ prāgāditaḥ kramāt // (23.2) Par.?

pradhānaṃ kuṇḍamīśānyāṃ caturasraṃ vidhīyate / (24.1) Par.?

athavā pañcakuṇḍaikaṃ sthaṇḍilaṃ caikameva ca // (24.2) Par.?

yajñopakaraṇaiḥ sarvaiḥ śivārcāyāṃ hi bhūṣaṇaiḥ / (25.1) Par.?

vedimadhye mahāśayyāṃ pañcatūlīprakalpitām // (25.2) Par.?

kalpayetkāñcanopetāṃ sitavastrāvaguṇṭhitām / (26.1) Par.?

prakalpyaivaṃ śivaṃ caiva sthāpayetparameśvaram // (26.2) Par.?

prākśiraskaṃ nyaselliṅgamīśānena yathāvidhi / (27.1) Par.?

ratnanyāse kṛte pūrvaṃ kevalaṃ kalaśaṃ nyaset // (27.2) Par.?

liṅgamācchādya vastrābhyāṃ kūrcena ca samantataḥ / (28.1) Par.?

ratnanyāse prasakte 'tha vāmādyā nava śaktayaḥ // (28.2) Par.?

navaratnaṃ hiraṇyādyaiḥ pañcagavyena saṃyutaiḥ / (29.1) Par.?

sarvadhānyasamopetaṃ śilāyāmapi vinyaset // (29.2) Par.?

sthāpayedbrahmaliṅgaṃ hi śivagāyatrisaṃyutam / (30.1) Par.?

kevalaṃ praṇavenāpi sthāpayecchivamavyayam // (30.2) Par.?

brahmajajñānamantreṇa brahmabhāgaṃ prabhostathā / (31.1) Par.?

viṣṇugāyatriyā bhāgaṃ vaiṣṇavaṃ tvatha vinyaset // (31.2) Par.?

sūtre tattvatrayopete praṇavena pravinyaset / (32.1) Par.?

sarvaṃ namaḥ śivāyeti namo haṃsaḥ śivāya ca // (32.2) Par.?

rudrādhyāyena vā sarvaṃ parimṛjya ca vinyaset / (33.1) Par.?

sthāpayedbrahmabhiścaiva kalaśānvai samantataḥ // (33.2) Par.?

vedimadhye nyasetsarvān pūrvoktavidhisaṃyutān / (34.1) Par.?

madhyakuṃbhe śivaṃ devīṃ dakṣiṇe parameśvarīm // (34.2) Par.?

skandaṃ tayośca madhye tu skandakuṃbhe sucitrite / (35.1) Par.?

brahmāṇaṃ skandakuṃbhe vā īśakumbhe hariṃ tathā // (35.2) Par.?

athavā śivakuṃbhe ca brahmāṅgāni ca vinyaset / (36.1) Par.?

śivo maheśvaraścaiva rudro viṣṇuḥ pitāmahaḥ // (36.2) Par.?

brahmāṇyevaṃ samāsena hṛdayādīni cāṃbikā / (37.1) Par.?

vedimadhye nyaset sarvān pūrvoktavidhisaṃyutān // (37.2) Par.?

vardhanyāṃ sthāpayeddevīṃ gandhatoyena pūrya ca / (38.1) Par.?

hiraṇyaṃ rajataṃ ratnaṃ śivakuṃbhe pravinyaset // (38.2) Par.?

vardhanyām api yatnena gāyatryaṅgaiśca suvratāḥ / (39.1) Par.?

vidyeśvarāṃ diśāṃ kuṃbhe brahmakūrcena pūrite // (39.2) Par.?

ananteśādidevāṃśca praṇavādinamo'ntakam / (40.1) Par.?

navavastraṃ pratighaṭamaṣṭakuṃbheṣu dāpayet // (40.2) Par.?

vidyeśvarāṇāṃ kuṃbheṣu hemaratnādi vinyaset / (41.1) Par.?

vaktrakrameṇa hotavyaṃ gāyatryaṅgakrameṇa ca // (41.2) Par.?

jayādisviṣṭaparyantaṃ sarvaṃ pūrvavadācaret / (42.1) Par.?

secayecchivakuṃbhena vardhanyā vaiṣṇavena ca // (42.2) Par.?

paitāmahena kuṃbhena brahmabhāgaṃ viśeṣataḥ / (43.1) Par.?

vidyeśvarāṇāṃ kuṃbhaiśca secayetparameśvaram // (43.2) Par.?

vinyasetsarvamantrāṇi pūrvavatsusamāhitaḥ / (44.1) Par.?

pūjayetsnapanaṃ kṛtvā sahasrādiṣu saṃbhavaiḥ // (44.2) Par.?

dakṣiṇā ca pradātavyā sahasrapaṇamuttamam / (45.1) Par.?

itareṣāṃ tadardhaṃ syāttadardhaṃ vā vidhīyate // (45.2) Par.?

vastrāṇi ca pradhānasya kṣetrabhūṣaṇagodhanam / (46.1) Par.?

utsavaśca prakartavyo homayāgabaliḥ kramāt // (46.2) Par.?

navāhaṃ vāpi saptāham ekāhaṃ ca tryahaṃ tathā / (47.1) Par.?

homaśca pūrvavatprokto nityamabhyarcya śaṅkaram // (47.2) Par.?

devānāṃ bhāskarādīnāṃ homaṃ pūrvavadeva tu / (48.1) Par.?

abhyantare tathā bāhye vahnau nityaṃ samarcayet // (48.2) Par.?

ya evaṃ sthāpayelliṅgaṃ sa eva parameśvaraḥ / (49.1) Par.?

tena devagaṇā rudrā ṛṣayo 'psarasastathā // (49.2) Par.?

sthāpitāḥ pūjitāścaiva trailokyaṃ sacarācaram // (50.1) Par.?

iti śrīliṅgamahāpurāṇe uttarabhāge liṅgasthāpanaṃ nāma saptacatvāriṃśo 'dhyāyaḥ // (51.1) Par.?