Texts

ātmā skandhā yadi bhaved udayavyayabhāg bhavet / (1.1) Par.?

skandhebhyo 'nyo yadi bhaved bhaved askandhalakṣaṇaḥ // (1.2) Par.?

ātmanyasati cātmīyaṃ kuta eva bhaviṣyati / (2.1) Par.?

nirmamo nirahaṃkāraḥ śamād ātmātmanīnayoḥ // (2.2) Par.?

nirmamo nirahaṃkāro yaśca so 'pi na vidyate / (3.1) Par.?

nirmamaṃ nirahaṃkāraṃ yaḥ paśyati na paśyati // (3.2) Par.?

mametyaham iti kṣīṇe bahirdhādhyātmam eva ca / (4.1) Par.?

nirudhyata upādānaṃ tatkṣayājjanmanaḥ kṣayaḥ // (4.2) Par.?

karmakleśakṣayānmokṣaḥ karmakleśā vikalpataḥ / (5.1) Par.?

te prapañcāt prapañcastu śūnyatāyāṃ nirudhyate // (5.2) Par.?

ātmetyapi prajñapitam anātmetyapi deśitam / (6.1) Par.?

buddhair nātmā na cānātmā kaścid ityapi deśitam // (6.2) Par.?

nivṛttam abhidhātavyaṃ nivṛttaścittagocaraḥ / (7.1) Par.?

anutpannāniruddhā hi nirvāṇam iva dharmatā // (7.2) Par.?

sarvaṃ tathyaṃ na vā tathyaṃ tathyaṃ cātathyam eva ca / (8.1) Par.?

naivātathyaṃ naiva tathyam etad buddhānuśāsanam // (8.2) Par.?

aparapratyayaṃ śāntaṃ prapañcair aprapañcitam / (9.1) Par.?

nirvikalpam anānārtham etat tattvasya lakṣaṇam // (9.2) Par.?

pratītya yad yad bhavati na hi tāvat tad eva tat / (10.1) Par.?

na cānyadapi tattasmānnocchinnaṃ nāpi śāśvatam // (10.2) Par.?

anekārtham anānārtham anucchedam aśāśvatam / (11.1) Par.?

etat tal lokanāthānāṃ buddhānāṃ śāsanāmṛtam // (11.2) Par.?

saṃbuddhānām anutpāde śrāvakāṇāṃ punaḥ kṣaye / (12.1) Par.?

jñānaṃ pratyekabuddhānām asaṃsargāt pravartate // (12.2) Par.?