Texts

śrīmārkaṇḍeya uvāca / (1.1) Par.?

tato 'rṇavātsamuttīrya trikūṭaśikhare sthitam / (1.2) Par.?

mahākanakavarṇābhe nānāvarṇaśilācite // (1.3) Par.?

mahāśṛṅge samāsīnaṃ rudrakoṭisamanvitam / (2.1) Par.?

mahādevaṃ mahātmānamīśānamajam avyayam // (2.2) Par.?

sarvabhūtamayaṃ tāta manunā saha suvrata / (3.1) Par.?

bhūyo vavande caraṇau sarvadevanamaskṛtau // (3.2) Par.?

tatkāle yugasāhasraṃ saha rudreṇa mānada / (4.1) Par.?

tasminnekārṇave ghore sthito 'haṃ kurunaṃdana // (4.2) Par.?

yudhiṣṭhira uvāca / (5.1) Par.?

etacchrutvā tu me tāta paraṃ kautūhalaṃ hṛdi / (5.2) Par.?

jātaṃ tatkathayasveti śṛṇvataḥ saha bāndhavaiḥ // (5.3) Par.?

kā sā padmapalāśākṣī tamobhūte mahārṇave / (6.1) Par.?

yogivadbhramate nityaṃ rudrajāṃ svāṃ ca yābravīt // (6.2) Par.?

śrīmārkaṇḍeya uvāca / (7.1) Par.?

etameva mayā praśnaṃ purā pṛṣṭo manuḥ svayam / (7.2) Par.?

tadeva te 'dya vakṣyāmi abalāyāḥ samudbhavam // (7.3) Par.?

vyatītāyāṃ niśāyāṃ tu brahmaṇaḥ parameṣṭhinaḥ / (8.1) Par.?

tataḥ prabhāte vimale sṛjyamāneṣu jantuṣu // (8.2) Par.?

manuṃ praṇamya śirasā pṛcchāmyetad yudhiṣṭhira / (9.1) Par.?

keyaṃ padmapalāśākṣī śyāmā caṃdranibhānanā // (9.2) Par.?

ekārṇave bhramatyekā rudrajāsmīti vādinī / (10.1) Par.?

sāvitrī vedamātā ca hyathavā sā sarasvatī // (10.2) Par.?

mandākinī saricchreṣṭhā lakṣmīrvā kimatho umā / (11.1) Par.?

kālarātrirbhavetsākṣāt prakṛtirvā sukhocitā // (11.2) Par.?

etadācakṣva bhagavankā sā hyamṛtasaṃbhavā / (12.1) Par.?

caratyekārṇave ghore pranaṣṭoragarākṣase // (12.2) Par.?

manuruvāca / (13.1) Par.?

śṛṇu vatsa yathānyāyamasyā vakṣyāmi saṃbhavam / (13.2) Par.?

yayā rudrasamudbhūtā yā ceyaṃ varavarṇinī // (13.3) Par.?

purā śivaḥ śāntatanuścacāra vipulaṃ tapaḥ / (14.1) Par.?

hitārthaṃ sarvalokānāmumayā saha śaṃkaraḥ // (14.2) Par.?

ṛkṣaśailaṃ samāruhya tapastepe sudāruṇam / (15.1) Par.?

adṛśyaḥ sarvabhūtānāṃ sarvabhūtātmako vaśī // (15.2) Par.?

tapatastasya devasya svedaḥ samabhavatkila / (16.1) Par.?

taṃ giriṃ plāvayāmāsa sa svedo rudrasaṃbhavaḥ // (16.2) Par.?

tasmād āsīt samudbhūtā mahāpuṇyā saridvarā / (17.1) Par.?

yā sā tvayārṇave dṛṣṭā padmapatrāyatekṣaṇā // (17.2) Par.?

strīrūpaṃ samavasthāya rudramārādhayatpurā / (18.1) Par.?

ādye kṛtayuge tasminsamānāmayutaṃ nṛpa // (18.2) Par.?

tatastuṣṭo mahādeva umayā saha śaṃkaraḥ / (19.1) Par.?

brūhi tvaṃ tu mahābhāge yatte manasi vartate // (19.2) Par.?

sariduvāca / (20.1) Par.?

pralaye samanuprāpte naṣṭe sthāvarajaṃgame / (20.2) Par.?

prasādāttava deveśa akṣayāhaṃ bhave prabho // (20.3) Par.?

saritsu sāgareṣveva parvateṣu kṣayiṣvapi / (21.1) Par.?

tava prasādāddeveśa puṇyā kṣayyā bhave prabho // (21.2) Par.?

pāpopapātakairyuktā mahāpātakino 'pi ye / (22.1) Par.?

mucyante sarvapāpebhyo bhaktyā snātvā tu śaṃkara // (22.2) Par.?

uttare jāhnavīdeśe mahāpātakanāśinī / (23.1) Par.?

bhavāmi dakṣiṇe mārge yadyevaṃ surapūjitā // (23.2) Par.?

svargādāgamya gaṃgeti yathā khyātā kṣitau vibho / (24.1) Par.?

tathā dakṣiṇagaṅgeti bhaveyaṃ tridaśeśvara // (24.2) Par.?

pṛthivyāṃ sarvatīrtheṣu snātvā yallabhate phalam / (25.1) Par.?

tatphalaṃ labhate martyo bhaktyā snātvā maheśvara // (25.2) Par.?

brahmahatyādikaṃ pāpam yadāste saṃcitaṃ kvacit / (26.1) Par.?

māsamātreṇa taddeva kṣayaṃ yātvavagāhanāt // (26.2) Par.?

yatphalaṃ sarvavedeṣu sarvayajñeṣu śaṃkara / (27.1) Par.?

avagāhena tatsarvaṃ bhavatviti matirmama // (27.2) Par.?

sarvadānopavāseṣu sarvatīrthāvagāhane / (28.1) Par.?

tatphalaṃ mama toyena jāyatāmiti śaṃkara // (28.2) Par.?

mama tīre narā ye tu arcayanti maheśvaram / (29.1) Par.?

te gatāstava lokaṃ syur etad eva bhavecchiva // (29.2) Par.?

mama kūle maheśāna umayā saha daivataiḥ / (30.1) Par.?

vasa nityaṃ jagannātha eṣa eva varo mama // (30.2) Par.?

sukarmā vā vikarmā vā śānto dānto jitendriyaḥ / (31.1) Par.?

mṛto janturmama jale gacchatād amarāvatīm // (31.2) Par.?

triṣu lokeṣu vikhyātā mahāpātakanāśinī / (32.1) Par.?

bhavāmi devadeveśa prasanno yadi manyase // (32.2) Par.?

etāṃścānyānvarāndivyānprārthito nṛpasattama / (33.1) Par.?

narmadayā tataḥ prāha prasanno vṛṣavāhanaḥ // (33.2) Par.?

śrīmaheśa uvāca / (34.1) Par.?

evaṃ bhavatu kalyāṇi yattvayoktamanindite / (34.2) Par.?

nānyā varārhā lokeṣu muktvā tvāṃ kamalekṣaṇe // (34.3) Par.?

yadaiva mama dehāt tvaṃ samudbhūtā varānane / (35.1) Par.?

tadaiva sarvapāpānāṃ mocinī tvaṃ na saṃśayaḥ // (35.2) Par.?

kalpakṣayakare kāle kāle ghore viśeṣataḥ / (36.1) Par.?

uttaraṃ kūlamāśritya nivasanti ca ye narāḥ // (36.2) Par.?

api kīṭapataṅgāśca vṛkṣagulmalatādayaḥ / (37.1) Par.?

ā dehapatanāddevi te 'pi yāsyanti sadgatim // (37.2) Par.?

dakṣiṇaṃ kūlamāśritya ye dvijā dharmavatsalāḥ / (38.1) Par.?

ā mṛtyor nivasiṣyanti te gatāḥ pitṛmandire // (38.2) Par.?

ahaṃ hi tava vākyena kasmiṃścit kāraṇāntare / (39.1) Par.?

tvattīre nivasiṣyāmi sadaiva hyumayā samam // (39.2) Par.?

evaṃ devi mahādevi evameva na saṃśayaḥ / (40.1) Par.?

brahmendracandravaruṇaiḥ sādhyaiśca saha viṣṇunā // (40.2) Par.?

uttare devi te kūle vasiṣyanti mamājñayā / (41.1) Par.?

dakṣiṇe pitṛbhiḥ sārddhaṃ tathānye surasundari // (41.2) Par.?

vasiṣyanti mayā sārddhameṣa te vara uttamaḥ / (42.1) Par.?

gaccha gaccha mahābhāge martyānpāpādvimocaya // (42.2) Par.?

sahitā ṛṣisaṃghaiśca tathā siddhasurāsuraiḥ / (43.1) Par.?

evamuktā mahādeva umayā sahito vibhuḥ // (43.2) Par.?

vandyamāno 'tha manunā mayā cādarśanaṃ gataḥ / (44.1) Par.?

tena caiṣā mahāpuṇyā mahāpātakanāśinī // (44.2) Par.?

kathitā pṛcchyate yā te mā te bhavatu vismayaḥ / (45.1) Par.?

eṣā gaṃgā mahāpuṇyā triṣu lokeṣu viśrutā // (45.2) Par.?

daśābhiḥ pañcabhiḥ srotaiḥ plāvayantī diśo daśa / (46.1) Par.?

śoṇo mahānadaścaiva narmadā surasā kṛtā // (46.2) Par.?

mandākinī daśārṇā ca citrakūṭā tathaiva ca / (47.1) Par.?

tamasā vidaśā caiva karabhā yamunā tathā // (47.2) Par.?

citrotpalā vipāśā ca rañjanā vāluvāhinī / (48.1) Par.?

ṛkṣapādaprasūtāstāḥ sarvā vai rudrasaṃbhavāḥ // (48.2) Par.?

sarvapāpaharāḥ puṇyāḥ sarvamaṃgaladāḥ śivāḥ / (49.1) Par.?

ityetairnāmabhirdivyaiḥ stūyate vedapāragaiḥ // (49.2) Par.?

purāṇajñair mahābhāgairājyapaiḥ somapaistathā / (50.1) Par.?

ityetatsarvamākhyātaṃ mahābhāgyaṃ narottama // (50.2) Par.?

manunoktaṃ purā mahyam amṛtāyāḥ samudbhavam / (51.1) Par.?

puṇyaṃ pavitramatulaṃ rudrodgītamidaṃ śubham // (51.2) Par.?

ye narāḥ kīrtayiṣyanti bhaktyā śṛṇvanti ye 'pi ca / (52.1) Par.?

prātarutthāya nāmāni daśa pañca ca bhārata // (52.2) Par.?

te narāḥ sakalaṃ puṇyaṃ labhiṣyantyavagāhajam / (53.1) Par.?

vimānenārkavarṇena ghaṇṭāśataninādinā // (53.2) Par.?

tyaktvā mānuṣyakaṃ bhāvaṃ yāsyanti paramāṃ gatim // (54.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe narmadāpañcadaśanāmavarṇanaṃ nāma caturtho 'dhyāyaḥ // (55.1) Par.?